1 मिनु शुआह ङा बिल्‍दादमी 2 “गे एको लोव़ गेना थुम्‍नीनी? ङोंइती मिम्‍तीन। मिनु गो लोव़ पने चाप्‍नय। 3 मारदे आंइ कली बी ब्‍यफ खोदेंशो मिम्‍ती‍नी? गे मारदे आंइ कली निप्‍स मपाइश्‍शो सुइक्‍नीनी? 4 गे इन गाइश्‍शोम आंम कली खतम सेल्‍सीनीनी। मार, इन पर्बम गो रागी प्रोंइनीकी? सेरथे फुल्‍लु आन बाक्‍‍तीक रे याक्‍चा?

5 थमा पा, परमप्रभु यावे आ अरेशो मटीब आन बत्ती काप्‍ब। मिनु मेको आन मी ङा राप रे हाम्‍सो मग्रूब। हितोपदेस १३:९ 6 मेको आन ताम्‍बुम छेङछेङ, छिङछिङ दुम्‍ब। मिनु मेको आन बत्ती काप्‍शो बाक्‍ब। अय्‍युब २१:१७ 7 मेको आन लांमी आन खोइली ग्‍येत्‍थ लुक्‍च पाइब। मिनु मेको आन थुंम मिम्‍शा पशोमी मेको आन कली खोल्‍ब। 8 आंम खोइलीम मेको आन कली ब्‍वारदम लपाइक्‍‍ब। मेको ब्‍वारदम गिल्‍सीशा बिक्‍तीकेमी दोक्‍नीम। 9 मेको आन खोइली ब्रिम्‍सोम रेत्‍चा पुंइसीनीम। क्‍येयलम रेत्‍चा पुंइसीनीम। 10 मेको आन पर्बम खपीम ब्‍वारद आ डोरी ख्रुइश्‍शो बाक्‍ब। मोपा आन लांमी ब्‍वारद दाइश्‍शो बाक्‍ब। 11 शुश हिंतीकेम मेको आन कली ख्रिंख्रि पपाइक्‍ब। ते बाक्‍तेक्‍म हना यो, मेकेर हिंतीके यो बाक्‍ब। लेवी २६:३६ 12 मेकोपुकी शोव़लु बेक्‍तीके सक्ति मपाइश्‍शो बाक्‍नीम। मिनु श्‍येत दुम्‍शा गोल्‍नीम। 13 रोइ पतीकेमी मेको आन कुशुल नेल्‍ल नेक्‍शो बाक्‍ब। बेक्‍पाइक्‍ब रोइमी मेको आन गुइ खोइली मदुक्‍ब सेल्‍ब। गन्‍ती १२:१०-१२ 14 मेको आन ब्रोंइशा बाक्‍‍तीक रां आन पर्बम ‘रिम्‍शो बाक्‍ब’ दे थमा सुइश्‍शा, मुल रां रे ग्रुंइचा पुंइसीनीम। मिनु हिंपाइक्‍ब पिप आ बाक्‍‍तीके लाइक्‍चा पुंइसीनीम। 15 मेको आन ताम्‍बुम मारेइ मलीब। मेको आन बाक्‍‍तीकेम गन्‍धक ब्रुइश्‍शो बाक्‍ब। 16 मेको आन शाक्‍श खप आगाम सोव़नीम। मिनु आन राशी सोल सुल बेक्‍नीम। 17 रागी ङा मुरुम मेको आन कली प्रेंनीम। मेको आन नें ममिम्‍नीम। 18 मेको छेङछेङ रे छिङछिङम खेरचा पुंइसीनीम। मिनु रागी रे ग्रुंइचा पुंइसीनीम। 19 मेको आन आल मबाक्‍नीम। आन चच युइ यो मबाक्‍नीम। मेको आन ङोंइती ङा बाक्‍तीकेमी सुइ ब्रोंइशा मबाक्‍नी‍म। 20 पच्‍छिम ङा मुरपुकी मेको आन श्‍येत जशो नेंशा हिंनीम। पूर्ब ङा मुरपुकी शुश हिंशा ख्रिंख्रि पाइनीम। भजन संग्रह ३७:१३ 21 थमा पा, परमप्रभु आ अरेशो मटीब मुर आन बाक्‍तीके मोदेंशो दुम्‍ब। परमप्रभु कली मतुइक्‍ब मोदेंशोन दुम्‍नीम” दे बिल्‍दादम अय्‍युब कली लोव़ ले‍त्‍ता बाक्‍त।

<- अय्‍युब 17अय्‍युब 19 ->