1 मिनु इच्‍का नोले चेरब रिक्‍ची ना सिम्‍सोन पाठा का कुरशा, आ मीश कली ग्रुम्‍थ लमाक्‍त। मिनु “गो आं मीश आ कोठामी ओव़चा दाक्‍नुङ” देंमाक्‍त। तन्‍न आ शिउमी ओव़चा मगेवा बाक्‍त। 2 मिनु आ शिउमी “आं तमी काइ मदाक्‍नीनी, दे मिम्‍ताक्‍ङ। मोपतीके इन कली वारच पाइब कली गेता। मेको आ लोक्‍ब मेको क्‍येङा दारशो मबाक्‍बा ङा? मुल इ मीश आ पा ङा मेको कली लतो” देंमाक्‍त। न्‍यायाधीस १४:२० 3 मिनु सिम्‍सोनमी “गो मुल पलिस्‍ती आन कली थम मरिम्‍शो पाता हना यो, दोस मताइब दुम्‍ती” देंमाक्‍त। 4 मिनु सिम्‍सोनमी लशा, सहे सां सिवार ग्‍याइश्‍शा, निक्‍‍निक्‍शी पा आस मीलु फ्रेंशा, आस दातेमी रांको का यो फ्रेंदा बाक्‍त। 5 मिनु रांको जेश्‍शा, पलिस्‍ती आन रिक्‍शा वोइश्‍शो चेरब, मीशो चेरब रू, अङगुर रू नु तेल रवा रू आगा सोइक्‍ता बाक्‍त। 6 मिनु पलिस्‍तीपुकीमी “एको सुम पवा?” दे हिल्‍लो पामे बाक्‍त। मिनु का निक्‍शीमी “तिम्‍ना ङा मुर आ चांइवा सिम्‍सोनमी पाप्‍तु। मारदे हना आ शिउमी आ तमी, सिम्‍सोन आ मीश दुम्‍शा यो आ वारच कली गेप्‍तु” देंमा बाक्‍त। मिनु पलिस्‍तीपुकी लशा, सिम्‍सोन आ मीश नु आ आफ कली मीम क्रोइश्‍शा सद‍मे बाक्‍त। 7 मिनु सिम्‍सोनमी मेको आन कली “क्‍येक्‍क मलेत्‍थु मप्रोंइनुङ” दे कसम जवा बाक्‍त। 8 मिनु सिम्‍सोनमी मेको आन कली शुश श्‍येत गेशा, शुश मुर आन कली साइक्‍मी बाक्‍त। मिनु मेकेर रे लशा, एताम ङा रोंगु ङा पुक्‍खीमी बाक्‍माक्‍त।

9 मिनु पलिस्‍तीपुकी कुशा यहूदामी ताम्‍बु कीशा, लेही सहर आ नेक्‍था बाक्‍मा बाक्‍त। 10 मिनु यहूदा आ थर ङा मुरपुकीमी मेको आन कली “गे मारदे आंइ कली लडाइ तोइनीनी?” दे हिल्‍लो पामे बाक्‍त। मिनु मेकोपुकीमी “गो सिम्‍सोन कली ग्‍याइश्‍शा, फ्रेंचा कली पीतक। मेकोमी आंइ कली मार पवा, गो यो मेको कली मोदेंशोन पाइनीक” देंमा बाक्‍त। 11 मिनु यहूदा ङा हजार सां मुर एताम ङा रोंगु ङा पुक्‍खीमी यिमा बाक्‍त। मिनु मेकोपुकीमी सिम्‍सोन कली “पलिस्‍तीपुकी आंइ सासन पाइब बाक्‍नीम, दे गे तुइक्‍नीनी। गे मारदे आंइ कली मोदेंशो पा मरिम्‍शो पनी?” देंमा बाक्‍त। मिनु सिम्‍सोनमी “मेकोपुकीमी आं कली दोदेंशो पामे, गो यो में मोदेंशो ला पाता” देंमाक्‍त। 12 मिनु मेकोपुकीमी “गो दा इ कली फ्रेंशा पलिस्‍ती आन गुइमी गेचा कली जाक्‍तक” देंमा बाक्‍त। मिनु सिम्‍सोनमी “मो हना आं कली मसाइक्‍नीक, देंशा, कसम जने” देंमाक्‍त। 13 मिनु मेकोपुकीमी “इन कली फ्रेंशा ला पलिस्‍ती आन गुइमी गेनीक। गो इन कली मसाइक्‍नीक” देंमा बाक्‍त। मिनु मेकोपुकीमी सिम्‍सोन कली नक डोरी निक्‍शीमी फ्रेंशा, पुक्‍खी क्‍येङा आइक्‍था कुत्‍मे बाक्‍त।

14 मिनु मेकोपुकी लेहीमी जाक्‍दीत्‍चामेनु, पलिस्‍तीपुकीमी मेको कली तशा ग्रीना ग्रीन पिमा बाक्‍त। मेना परमप्रभु यावे आ सोक्‍तीमी सिम्‍सोन कली सुमा बाक्‍त। मिनु सिम्‍सोनमी आ कली फ्रेंशो डोरी निक्‍शी मीम दुप्‍शो पले खोदेंशो पा प्रोदा बाक्‍त। न्‍यायाधीस १३:२५ 15 मिनु गधा आ पिया ङा रुश खप रे गुप्‍शा, मेकोमी हजार का मुर आन कली तुप्‍शा सदा बाक्‍त। 16 मिनु मेकोमी “गो गधा आ पिया ङा रुशेमी तुम्‍ना तुम्‍न शुश मुर साइक्‍ता। तेन्‍ना तेन्‍न हजार का मुर साइक्‍ता” देंमाक्‍त। 17 मेकोमी मो देंने थुम्‍शा, मेको रुश ताइक्‍ता बाक्‍त। मोपतीके मेको ठाउं कली रामाथ-लेही नें वोदमे बाक्‍त।

18 मिनु सिम्‍सोनमी ब्‍वाक्‍कु तूतू दाक्‍शा, परमप्रभु यावे कली पुंइशा, “गे इन वाइल कली ठेयब लडाइ ग्रापाइक्‍तीनी। मुल गो तूतू दाक्‍शा बेक्‍नुङा? एको ख्रोइक्‍तीक चिनु मख्रोइश्‍शो आन गुइमी बेक्‍नुङा?” देंमाक्‍त। 19 मिनु परमप्रभुमी लेही ङा खाल्‍टा कली प्रोल्‍शा, मेक रे ब्‍वाक्‍क ग्रुंइदा बाक्‍त। मिनु सिम्‍सोनमी ब्‍वाक्‍कु तूङा बाक्‍त। मिनु लें‍शा, बोल्‍यो दुम्‍माक्‍‍त। मोपतीके लेही ङा ब्‍वाक्‍कु बुक्‍तीक कली मुलाक्‍त सम्‍म एन-हाकोरे देंनीम। 20 मिनु पलिस्‍तीपुकीमी इस्राएली आन कली दिप्‍शा सासन पामेनु, सिम्‍सोनमी २० बर्स सम्‍म इस्राएली आन निसाफ पशो बाक्‍माक्‍त।

<- न्‍यायाधीस 14न्‍यायाधीस 16 ->