२राजा २०:१२-१९; २इतिहास ३२:२७-३१

1 मेना बेबीलोन ङा पिप बालादन आ तौ मेरोदाक-बालादानमी हिज्‍कीयाह कली चिठी नु कोसेली कुर पाइश्‍शा, मुर आन कली सोइक्‍ता बाक्‍त। मारदे हना मेकोमी “हिज्‍कीयाह रोइ पशा, छक लाक्‍चा ङा पा सात” देंशो लोव़ नेना बाक्‍त। 2 मिनु हिज्‍कीयाहमी मेको आन कली तशा, ग्‍येरशा आ शोंप वोइक्‍तीके खिं नेल्‍ल कोंइदा बाक्‍त। मार कोंइदा बाक्‍त देंशा हना, सुन चांदी, मस्‍लापुकी, रिम्‍शो शुश क्‍येट लाइब थोव़क, तेल, आ या वोइक्‍तीके नेल्‍ल नु आ शोंप नेल्‍ले कोंइदा बाक्‍त। आ खिं नु आ रागीमी मेको आन कली मकोंइशो मारेइ मलीमाक्‍त। 3 मिनु परमप्रभु यावे आ लोव़ पाइब यसैया, पिप हिज्‍कीयाह आ बाक्‍तीके जाक्‍शा “मेको मुरपुकीम मार देंमा, ते रे जाक्‍मा?” देंत। मिनु हिज्‍कीयाहमी “एकोपुकी ङोन रागी बेबीलोन रे जाक्‍शो नम” देंत। 4 मिनु “मेकोपुकीम इन खिंमी मार मार तामे?” दे हिल्‍लो पाप्‍तु। मिनु हिज्‍कीयाहमी “आं खिंमी बाक्‍शो मारेइ मारेइ ताम्‍तेक्‍म। मेको आन कली मारेइ मारेइ कोंइताक्‍ङ” देंत।

5 मिनु यसैयामी हिज्‍कीयाह कली “मुर नेल्‍ल आन परमप्रभु यावे आ लोव़ नेनीन 6 ‘इ खिंम बाक्‍शो, इ किकी पिपीमी तेल्‍शा वोइश्‍शो मुल सम्‍म बाक्‍शो मारेइ मारेइ काबु बेबीलोन चाक्‍दीत्‍नीम। मारेइ मलीनीम’ दे परमप्रभु यावेमी देंत। २राजा २४:१३ 7 मिनु इ तौ कोइ कोइ आन कली लाइश्‍शा, बेबीलोन ङा पिप आ दरवारमी गेय पाइब सेल्‍नीम” दें‍त। 8 मिनु हिज्‍कीयाहमी यसैया कली “इ देंशो परमप्रभु यावे आ लोव़ रिम्‍शो बाक्‍ब” देंत। मारदे हना मेकोम “गो ब्रोंइङा सम्‍म लडाइ मदुम्‍ब रिम्‍शो दुम्‍ब” दे मिम्‍शो बाक्‍माक्‍त।

<- यसैया 38यसैया 40 ->