1 मेना हिज्कीयाह रोइ पा बेक्चा चिक्ता बाक्त। मिनु परमप्रभु यावे आ लोव़ पाइब आमोज आ तौ, यसैया जाक्शा, पिप कली “परमप्रभु यावेमी इन कली ‘गे बेक्नेवे, मब्रोंइनेवे। इ खिं नेल्ल ठीक सेलो’ देंत” दे माइक्तु। 2 मिनु हिज्कीयाहमी, आ कुल गारो गे हिरशा, परमप्रभु यावे कली 3 “परमप्रभु यावे, गो इन ङोंइती थमा पा थुं निक्शी मपथु, बाक्ती। मेको मिम्तीने। गो इन ङोंइती नेल्ल रिम्शो पाता” देंत। मिनु हिज्कीयाह शुश ङाक्त। २राजा १८:२-६
4 मिनु परमप्रभु यावेमी यसैया कली 5 “हिज्कीयाह आ बाक्तीक लावो। मेको कली परमप्रभु यावे, इ किकी दाऊद आ परमप्रभुमी इ कली ‘गो इ पुंइशो लोव़ नेंता। इ प्रेक्कु ताता। नेनो, गो इ ब्रोंइतीक नाक्ती १५ बर्स तेम्नुङ। 6 मिनु गो इ कली नु एको सहर कली अस्सुर ङा पिप आ गुइ रे प्रोंइनुङ। एको सहर कली वारच पाइनुङ।
7 परमप्रभु यावेमी आ देंशो पाइब दे इ कली आ गेशो चिन्ड मार बाक्ब देंशा हना, 8 आहाज आ घरी आ वांकु उइ लने थुम्शो बाक्ब। मेको कली परमप्रभु यावेमी १० खेयप नोले लेप्पाइक्ब’ दे मतो” देंत। मिनु नां आ वांकु लाक्ने थुम्शा यो, १० खेयप नोले लेत्त।
