1 मिनु परमप्रभु यावेमी याकूब कली शिशी पा, इस्राएल कली योव़शा लेंशा मेको आन कली आन रागीमी वोइक्‍ब। मिनु अर्को रागी ङा मुरपुकी याकूब आ खिं ङा मुर नु गारशा बाक्‍नीम। जकरिया १:१७ 2 मेना रागी रागी ङा मुरपुकीमी इस्राएली आन कली आन रागी चोव़दीनीम। इस्राएलीपुकीमी मेको रागी ङा मुर आन कली परमप्रभु यावे आ रागीमी बाक्‍शा, आन वाइलीम वाइल सेल्‍नीम। ङोंइती आन कली ग्‍याइश्‍शा चोक्‍ब आन कली ग्‍याइश्‍शा चोक्‍नीम। मिनु आन कली दिप्‍ब आन कली हुकुम पाइनीम। यसैया ४९:२२; लेवी २५:२३

3 मिनु परमप्रभु यावेमी इन कली श्‍येत जतीके, खेदा पचा पुंइसीतीके नु शुश गेय पतीक रे नाइक्‍चा गेप्‍तु हना, 4 गेपुकीमी बेबीलोन ङा पिप आ पर्बम “मुर आन कली दिप्‍ब, दोपा थुम्‍‍से? आ श्‍येत गेशा हुकुम पतीके, दोपा बेक्‍‍मे?” दे शुक्‍शी लोव़ पाइनीनी। 5 परमप्रभु यावेमी आ अरेशो लोव़ मटीब आन कोक्‍के जिक्‍तु। मिनु श्‍येत गेब पिप आ सासन पतीक कोक्‍के रोइक्‍ताक्‍व। 6 ङोंइती मेकोमी गाइश्‍शा, मुर आन कली तुप्‍ना तुप्‍न बाक्‍त। मेको पिपपुकीमी रागी रागी कली आन गाइक्‍तीकेमी मनाइक्‍थु खेदा पा श्‍येत गेम्‍तेक्‍म। 7 मुल रागी ङा मुर नेल्‍ल सिक्‍सी पा नाइश्‍शा बाक्‍चा ताइनीम। मिनु ग्‍येरशा कुम्‍सो पाइनीम। 8 तोव़शी रवापुकी नु लेबानोन ङा लाइश्‍शो रवापुकीमी यो ग्‍येरशा “गे खतम दुमे रे आंइ कली क्‍योरब सुइ मजाक्‍म” देंनीम। 9 मिनु बेक्‍शो मुर आन बाक्‍तीकेमी इ जाक्‍दीश्‍शो आ पर्बम ग्रांग्‍‍‍ये माग्‍ये दुम्‍नीम। रागी ङा मुरपुकीमी “इन कली ताक्‍चा कली बोक्‍नीम। रागी रागी नु जात जात ङा पिप आन कली आन नित्‍तीक रे पोक्‍शा राप्‍पाइक्‍नीम। 10 मेको नेल्‍लेमी इ कली ‘गे यो आंइ खोदेंशो पा सक्ति मपाइश्‍शो दुमे बाक्‍त। गे यो आंइ खोदेंशो दुम्‍ते। 11 इ दारस नु इ ठेयब ताप्‍तीके नेल्‍ले यो बेक्‍शो मुर आन बाक्‍तीके जाक्‍तेक्‍म। लुस्‍पु इ ब्राख्‍ये दुम्‍नीम। बुस्‍स इ फेक्‍तीक दुम्‍ब’। इजीकीएल ३२:१८-१९

12 गे सुनी आ तौ, सुकुर सोरुल, दोपा सरीङ रे दोक्‍ङे? रागी रागी ङा मुर आन कली ग्राब, दोपा क्‍योरचा पुंइसीशा दोक्‍ङे?” देंनीम। 13 गे इ थुंमी “गो स्‍वर्ग ङोइश्‍शा लाइनुङ। परमप्रभु आ सोरुल आन क्‍येङा आइक्‍था आं नित्‍तीके वोइक्‍नुङ। मिनु गो उत्तर ङा देवी देवता ग्रुम्‍तीक डांडाम नित्‍नुङ। भजन संग्रह ४८:३; इजीकीएल २८:१४ 14 गो गोस्‍स क्‍येङा ग्‍येत्‍थ ङोइश्‍शा लाइनुङ। मोपा गो नेल्‍ल क्‍येङा ठेयब नु उइक्‍थ दुम्‍नुङ” देंते। 15 तन्‍न गे बेक्‍शो मुर आन बाक्‍तीकेम तोक्‍चा पुंइसाक्‍वे। तुरस क्‍येङा यो उइ तोक्‍चा पुंइसाक्‍वे। 16 इ कली ताइबपुकीमी “मार, मेरे मुरुम रागी हिम्‍पाइश्‍शा, राज्‍यपुकी ख्रिंख्रि पपदा? 17 मेरेम रागी नेल्‍ल गोरशो रागी सेल्‍शा, सहर नेल्‍ल खतम पोक्‍गा? चोक्‍सीशो मुर आन कली आन खिं लेत्‍चा मगेब मुर मेरेन बाक्‍बा?” देंनीम। 18 मिनु रागी नेल्‍ल ङा बेक्‍शो पिपपुकी बेक्‍शो पिप आन कली वोइक्‍तीकेम वोइश्‍शो बाक्‍नीम। 19 तन्‍न गे सोव़शो राशी खोदेंशो पा इ तुरस रे ङोन ताइक्‍चा पुंइसाक्‍वे। तरवारम तूशा साइश्‍शो मुर बाक्‍तीके लशो मुरपुकी इ सुम्‍तीके दुम्‍तेक्‍म। गे बेक्‍शा दिम्‍शो खोदेंशो दुम्‍ते। यसैया ३४:३ 20 गे अरु पिप खोदेंशो पा थिम्‍चा मपुंइसे। मारदे हना गे इ रागी खतम सेल्‍शा इ मुर आन कली साइक्‍तीवी। मोपतीके मरिम्‍शो पाइब आन चच युइ आन नें गेनायो ममिम्‍सीब। 21 आन आफ आन मरिम्‍शो पशो आ पर्बम आन तौ आन कली क्‍योरचा कली ठीक दुमीन। मुर आन रागी कली आंम के सेल्‍ब नु रागी कली सहरम प्रिंब कली बोक्‍चा मगेन। प्रस्‍थान २०:५

22 मुर नेल्‍ल आन परमप्रभु यावेमी “गो बेबीलोन ङा मुर आन नें, लीशो नु आन आल नु खिं ङा मुर नेल्‍ल क्‍याम्‍नुङ। 23 गो मेको आन सहर काश्‍श आन बाक्‍तीके नु ब्‍वाक्‍कु देम्‍तीके सेल्‍नुङ। गो मेको आन कली खतम सेल्‍ब ब्राक्‍सुम फिक्‍नुङ” दे मुर नेल्‍ल आन परमप्रभु यावेम देंत।

24 मिनु मुर नेल्‍ल आन परमप्रभु यावेमी कसम जशा “थमा पा, आं ङोंइती मिम्‍शो खोदेंशो पा दुम्‍पाइक्‍नुङ। गो आं देंशो पाइनुङ। 25 गो अस्‍सुर ङा मुर आन कली आं रागीम साइश्‍शा, आं डांडा दिम्‍पाइक्‍नुङमी। मोपा आं जुवा ग्रुंइनुङ। मिनु आन श्‍येत आन बला रे फेत्‍नुङ। 26 एको रागी नेल्‍ल कली देंशो लोव़ बाक्‍ब। एको रागी रागी नेल्‍ल तार दिंशो गुइ बाक्‍ब। 27 मारदे हना मुर नेल्‍ल आन परमप्रभु यावेमी मोदेंशो पचा कली मिम्‍शो बाक्‍ब। सुम मेको कली तेक्‍ने चाप्‍बा ङा? आ दिंशो गुइ सुम लेप्‍पाइक्‍ने चाप्‍बा ङा? सुइम मचाप्‍नीम” देंत।