1 इस्राएली, मग्येरसीन। अर्को रागी रागी ङा मुर खोदेंशो पा, सोम्शा मग्येरसीन। मारदे हना गे इन परमप्रभु क्येङा नोले शोंइसाक्नी। गे अन्न ओंइतीक चाडमी तेल्लेम पशो आ पर्बम क्येट ताक्चा दाक्नीनी।
होसे १:२ 2 मुल अन्न आ खला ङा अन्नम नु अङगुर कोल ङा अङगुर शांबुम मुर आन कली मरूपाइक्ब। नक अङगुर शांबु मेको आन कली मजाक्दीप्ब।
3 मेकोपुकी परमप्रभु यावे आ रागीमी बाक्चा मताइनीम। एफ्राइम इजीप्त रागीमी लेश्शा लाइब। मिनु मेकोपुकीमी अस्सुरमी ग्रांग्रा दिचा ङा थोव़की जाइनीम।
होसे ८:१३4 मेकोपुकीमी परमप्रभु यावे कली अङगुर शांबु चढ़ेनीम। क्योरशा चढ़ेतीक मचढ़ेनीम। आन जचा थोव़क मोन खमे खोदेंशो पा जाइनीम। मेको जाइब नेल्ल ग्रांग्रा दिशो दुम्नीम। मेको आन जचा थोव़कीम मेको आन शोव़लु साइक्चा ला दुम्ब। परमप्रभु यावे आ खिंमी चाक्ने मचाप्नीम।
5 गेपुकी इन ठेयब चाड नु परमप्रभु आ चाडमी मार पाइनीनी? 6 मेकोपुकी खतम दुम्चा कली प्रोक्तेक्म हना यो, इजीप्त रागीमी मेको आन कली खुप्ब। मिनु मेम्फीस ङा मुरपुकीमी मेको आन कली थिम्नीम। मेको आन चांदी के सेल्शो थोव़कपुकी चू नु चोंकम सुम्ब। मिनु आन ताम्बुमी चू वानीम। होसे १०:८
7 मिनु सजाइ गेतीक नाक्त जाक्शो बाक्ब। क्येक्क लेत्तीक नाक्त यो जाक्शो बाक्ब। इस्राएल ङा मुरपुकीमी मेको तुइक्नीम। परमप्रभु यावे आ लोव़ पाइब गुक्शो खोदेंशो पा बाक्नीम। मेकोपुकी गशो दुम्तेक्म। मारदे हना इन मरिम्शो पचा नु मदाक्चा आ पर्बम मोदेंशो दुम्त। 8 परमप्रभु यावेमी आ लोव़ पाइब कली एफ्राइम कली कोव़ब सेल्तु। मेको आ लां नेल्लेमी चिक्ब रेत्तीक ब्वारद खोदेंशो बाक्नीम। आ परमप्रभु आ खिंमी यो मेको कली काइ मदाक्नीम। 9 गिबा ङा नाक्त खोदेंशो पा मेकोपुकी काइ मरिम्शो गेय पाम्तेक्म। परमप्रभु यावेमी मेको आन मरिम्शो पशो मिम्शा सजाइ गेब। होसे १०:९; न्यायाधीस १९:२२-३०; न्यायाधीस २०:१३
10 दोदेंशो पा गोरशो रागीमी अङगुर थित्नीमी, मोदेंशो पा गो इस्राएल कली थित्ता। फोव़शी रवामी नेल्ल क्येङा ङोंइती ङा फोव़शी फल सिश्शो खोदेंशो पा गो इन किकी पिपी आन कली थित्तामी। तन्न मेकोपुकी बाल-पेओर गे लाम्तेक्म। मिनु मेकोपुकी आंम कली बाल कली जिम्मा गेसाक्म। मिनु मेको आन दाक्शो मूर्ति खोदेंशो पा ग्रांग्रा दित्चा ङा दुम्तेक्म।
ब्यवस्था ३२:१०; गन्ती २५:३ 11 एफ्राइम आ सक्ति चिक्ब खोदेंशो पा बेरशा लाइब। मेको आन दातेमी सुइ यो आल थीब मदुम्नीम।
12 मेकोपुकीमी आल थिशा कोल्पाइक्तेक्म हना यो, गो का सम्म यो मप्रोंइथु लाइक्नुङ। मिनु गो मेको आन कली प्रोंइशा ङोन लाइक्नुङ। मिनु मेको आन कली ठेयब श्येत दुम्ब।
13 एफ्राइम आ तौपुकी साइक्चा पुंइसीनीम। एफ्राइममी आ तौ आन कली क्योरचा कली लाइक्चा माल्ब।
इजीकीएल २७:३ 14 परमप्रभु यावे, गे मेको आन कली मार गेनीनी? मेको आन आल शाम्सेक्ल। मिनु मेको आन दूध सोव़ल।
15 मेको आन मरिम्शो पतीके नेल्ल गिल्गालम पाम्तेक्म। मेक रे गो मेको आन कली तशा ग्रांग्रा दिचा गोव़ता। मेको आन काइ मरिम्शो पतीके, गो आं खिं रे खेरनुङमी। मेको आन ठेयब मुर नेल्ल मटीब बाक्नीम।
16 एफ्राइम आप्चा पुंइसीशो बाक्ब। मेको आन शाक्श सोव़शो बाक्ब। मेकोपुकी मसित्नीम। मेकोपुकीमी आल थिम्तेक्म हना यो, गो मेको आन दाक्शो आल आन कली साइक्नुङ।
17 आं परमप्रभुमी मेको आन कली प्रोंइब। मारदे हना मेकोपुकीमी आ देंशो मटीम। मोपतीके मेकोपुकी रागी रागी ङा मुर आन दातेमी हिरशा गाक्ब दुम्नीम।
<- होसे 8होसे 10 ->
