7 मेकोपुकीमी फश शोक्नीम। मिनु ठेयब फश गिवार खुप्नीम। मेको आन चेरब बोटमी बाला मबाक्नीम। मिनु मेकोपुकीमी फस सेल्ने मचाप्नीम। आन बाला बाक्तेक्म हना यो, रागी रागी ङा मुरपुकीमी मेको खुप्शा जाइनीम। येरमीया १२:१३ 8 इस्राएल खतम पोक्चा पुंइसाक्व। मुल मेकोपुकी रागी रागी ङा मुर आन दातेमी शोर गाक्शो मुर खोदेंशो दुम्शो बाक्नीम। येरमीया २२:२८ 9 ब्वाकी ङा गधा हेंथे गाक्शो खोदेंशो पा मेकोपुकी अस्सुरमी लाम्तेक्म। एफ्राइम ङा मुरपुकी आंम कली दाक्बपुकी कली लेयसीशो बाक्नीम। होसे ५:१३ 10 मेकोपुकी आंम कली लेयसाक्म हना यो, मुल गो मेको आन कली खुप्नुङमी। मिनु मेकोपुकी सक्ति पाइश्शो पिप आ गुइ रे क्याम्चा पुंइसीनीम।
11 एफ्राइममी आ पाप पतीके चढ़ेतीक शुश सेल्तु। मेको चढ़ेतीके शुश सेल्तीके मेको कली पाप दुम्शो बाक्ब। 12 मिनु गो मेको आन कली आ अरेशो शुश ब्रेक्ताक्ङ। तन्न मेकोपुकीमी आं लोव़ थमा मसुदेम। 13 मेकोपुकीमी आं कली चढ़ेनीम। मिनु श्ये ब्वाइनीम। तन्न परमप्रभु यावे मेकोपुकी नु मग्येरसीशो बाक्ब। मुल परमप्रभु यावेमी मेको आन मरिम्शो पशो मिम्शा, मेको आन कली सजाइ गेब। मिनु मेकोपुकी इजीप्त रागीमी लेश्शा लाइनीम। 14 इस्राएलीपुकीमी आंम कली सेल्ब कली प्रेंशा, ठेयब दरवार सेल्शो बाक्नीम। यहूदा ङा मुरपुकीमी शुश सहर एर ओंथ गारो सेल्शो बाक्नीम। तन्न गो मेको आन सहरमी मी सुइश्शा दरवार नेल्ल क्रोइक्नुङ” दे परमप्रभुम देंत। येरमीया १७:२७; आमोस २:५
<- होसे 7होसे 9 ->