1 मिनु लेआ आ तमी, दीना मेको रागी ङा मीश आल आन कली ग्रुम्‍थ लमाक्‍त। 2 हिव्‍वी ङा हमोर आ तौ शेकेम, मेको रागी ङा पिप आ तौमी दीना कली तशा, ग्‍याइश्‍शा मेको नु इप्‍‍शा, बिथोलो पवा बाक्‍त। न्‍यायाधीस ९:२८ 3 मिनु याकूब आ तमी दीना कली शुश दाक्‍शा, रिम्‍शो लोव़ पवा बाक्‍त। 4 मिनु शेकेममी आ आफ कली “मेको मीश आल आं कली चाक्‍कीन” दे मदा बाक्‍त। 5 मिनु याकूबमी “शेकेममी इन तमी दीना कली बिथोलो पाप्‍तु” देंशो नेना बाक्‍त। आ तौपुकी चहिं रू ङा गोठीम बाक्‍मा बाक्‍त। याकूब आ तौपुकी मजाक्‍मा सम्‍म सिक्‍सी पा बाक्‍माक्‍त। 6 मिनु शेकेम आ आफ हमोर याकूब नु लोव़ पचा कली जाक्‍माक्‍त। 7 मिनु मेको नेंशा, याकूब आ तौपुकी यो रू रे जाक्‍मा बाक्‍त। आन थुं मनुथु, शुश चुरमा बाक्‍त। मारदे हना शेकेमम इस्राएल आ तमी नु इप्‍‍शा, बिथोलो पशो बाक्‍माक्‍त। मो पचा मदुम्‍शो बाक्‍माक्‍त। 8 मिनु हमोरमी इस्राएल कली “आं तौ शेकेममी इन तमी कली शुश दाक्‍ब, चाक्‍चा गेने। 9 मिनु आंइ तमीपुकी इन तौपुकीमी चाक्‍ग्‍मेक्‍ल। इन तमीपुकी आंइ कली चाक्‍चा गेने। 10 गे गोपुकी नु बाक्‍कीन। आंइ रागी इन कली ग्‍याप्‍चा लेयचा, बाक्‍चा कली गेनीकी” देंमाक्‍त। 11 मिनु शेकेममी मीश आल आ आफ याकूब नु आ लोक्‍ब आन कली “इन ङोंइती शिशी तङल। गे मार देंनीनी इन कली गेनुङ। 12 मेको मीश आल चाक्‍चा गेतीनी हना, गो इन माल्‍शो मारेइ मारेइ गेनुङ” देंमाक्‍त। प्रस्‍थान २२:१५ 13 याकूब आ तौपुकीमी आन समी कली बिथोलो पाइब, शेकेम नु आ आफ हमोर आस कली जोल पा 14 “गो आंइ समी ख्रोइक्‍तीक चिनु मख्रोइश्‍शो मुर आन कली गेने मचाप्‍नीकी। मेको आंइ कली मशिरब। 15 गे आंइ खोदेंशो पा वोंइश आल वोंइश मुर नेल्‍लेमी ख्रोइक्‍तीक चिनु ख्रोइक्‍तीनी हना, उत्‍पत्ती १७:१०-१४ 16 आंइ तमीपुकी इन कली लाइक्‍चा गेनीकी। मिनु इन तमीपुकी गो चाक्‍नीकी। मिनु गो गेपुकी नु बाक्‍शा, मुर का खोदेंशो दुम्‍नीकी। 17 गेपुकी आंइ देंशो मबिस्‍साक्‍नी हना, आंइ तमी लाइश्‍शा, गाक्‍नीकी” दे लोव़ पामे बाक्‍त। 18 मिनु हमोर नु आ तौ शेकेम मेको आस देंशो नेंशा, ग्‍येरससा बाक्‍त। 19 मिनु मेको ठिटा मेको पचा बिस्‍से बाक्‍त। मारदे हना याकूब आ तमी कली शुश दाक्‍ता बाक्‍त। मेको आ आफ आ खिं ङा नेल्‍ल क्‍येङा मान ताइब बाक्‍माक्‍त।

20 मिनु हमोर नु आ तौ शेकेम आस सहर ङा लाप्‍चो ओव़शा, मेको निक्‍शीमी मुर आन कली 21 “एको मुरपुकी गो नु दुशा बाक्‍चा दाक्‍नीम। मोपतीके एक बाक्‍चा गेने। मारदे हना इं रागी ठेयब बाक्‍ब। मेको आन कली यो गारब। गोपुकी मेको आन तमी चाक्‍य। इं तमी मेको आन कली गेय। 22 गो वोंइश मुर नेल्‍ल ख्रोइक्‍तीक चिनु ख्रोइक्‍साक्‍य हना ला, मेकोपुकी गो नु बाक्‍ने बित्‍नीम। 23 मार, मेको आन बी ब्‍यफ, क्‍यारश भेडा नु आन शोंप नेल्‍ल इं के मदुम्‍बा ङा? गो मेको आन लोव़ बिश्‍शा हना, इं दातेमी बाक्‍नीम” देंसा बाक्‍त। 24 मिनु सहर ङा मुर नेल्‍ल हमोर नु शेकेम आस लोव़ टिशा, ख्रोइक्‍तीक चिनु ख्रोइक्‍चा गेमे बाक्‍त। सहर नेल्‍ल ङा वोंइश मुरुम मोदेंशो पामे बाक्‍त।

25 मिनु नाक्‍त सां नोले आन ख्रोइक्‍तीके नेल्‍ल क्‍येङा खाइक्‍मानु, याकूब आ तौ निक्‍शी, दीना आ लोक्‍ब, सिमियोन नु लेवी, आस तरवार लाइश्‍शा, सुइ आन मतुइक्‍थु, सहर ओव़शा, सहर ङा वोंइश मुर नेल्‍ल सदसे बाक्‍त। उत्‍पत्ती ४९:५-७ 26 मिनु मेको निक्‍शीमी हमोर नु शेकेम आस कली यो साइश्‍शा, दीना शेकेम आ खिं रे ग्रुंइशा, लदसे बाक्‍त। 27 मिनु याकूब आ अर्को तौपुकी यो सहर ओव़मा बाक्‍त। मेकोपुकीमी सहर ङा मारेइ मारेइ लदमे बाक्‍त। मारदे हना शेकेममी आन समी कली बिथोलो पवा बाक्‍त। 28 मिनु आन क्‍यारश भेडा, बी ब्‍यफ, गधा नु मार मार सहर नु आन रूमी बाक्‍मा, मेको नेल्‍ल लदमे बाक्‍त। 29 आन शोंप नेल्‍ल, आन आलपुकी, आन मीश नु आन खिं ङा मारेइ मारेइ नेल्‍ल लदमे बाक्‍त। 30 मिनु याकूबमी सिमियोन नु लेवी आस कली “गे आं कली श्‍येत गेतीसी। मुल एको रागी ङा मुरुमी आं कली मदाक्‍नीम। कनानी नु परि‍ज्‍जी आन दातेम आं कली मरिम्‍शो रिना पाइश्‍शो खोदेंशो सेल्‍तीसी। गोपुकी नु शुश मुर मबाक्‍नीम। इं कली लडाइ तोशा, इं खिं ङा मुर नेल्‍ल साइक्‍नीम” दे मेको आस कली हुइक्‍तीम्‍सी बाक्‍त। 31 मिनु मेको निक्‍शीमी “मार, मेकोमी आंस समी कली तेल्‍लेम खोदेंशो सेल्‍चा दुम्‍बा?” देंसा बाक्‍त।

<- उत्पत्ती 33उत्पत्ती 35 ->