1 मिनु नोले परमप्रभु यावेमी अब्राम कली ङोमु खोदेंशो पा कोंइतीक कोंइदा बाक्त। मिनु मेकोमी अब्राम आ नें थिशा “अब्राम महिनो। गो इ कली कोव़नन। शुश आसीक गेनन” देंमाक्त। गन्ती २४:४,१६; भजन संग्रह ३:४ 2 तन्न अब्राममी “आं कली मार गेनीनी ङा? आं के आल मबाक्नीम। आ अङस ताइब दमस्कस ङा एलीएजर दुम्ब। 3 गे आं कली तमी तौ मगेयीनी। मुल आं खिंम जरमेशो वाइलम आं अङस ताइब दुम्त” देंमाक्त। 4 मिनु परमप्रभु यावेमी लेंशा “मेको मुरुम इ अङस मताइब। इ आंम रां ङा इ तौमी इ अङस ताइब” देंमाक्त।
5 मिनु मेकोमी अब्राम कली ताम्बु रे ग्रुंइशा “सरीङ गे कोव़ङो, सोरुल आन कली हिक्को। मेको हिक्ने चाप्नेवे? गिश बाक्मा, इ चच युइ यो मिश दुम्नीम” देंमाक्त। उत्पत्ती २२:१७; प्रस्थान ३२:१३; ब्यवस्था १:१०; हिब्रू ११:१२ 6 मिनु अब्राममी परमप्रभु यावे आ लोव़ थमा सुदा बाक्त। मिनु परमप्रभु यावेमी अब्राममी थमा सुइश्शो तशा “ठीक पाइब मुर का बाक्त” दे तुइक्ता बाक्त। रोमी ४:३-५; याकूब २:२३
7 मिनु लेंशा अब्राम कली “गो परमप्रभु यावे नङ। गो एको रागी इ कली गेचा कली कल्दी ङा ऊर सहर रे ग्रुंइताक्न” देंमाक्त। उत्पत्ती ११:३१; प्रस्थान ३:१४; यसैया ४५:५; यूहन्ना ८:२४-२९ 8 मिनु अब्राममी “परमप्रभु, परमप्रभु यावे, आं के रागी दुम्ब, दे दोपा तुइक्नुङा ङा?” दे हिल्लो पवा बाक्त। 9 मिनु मेकोमी “आं कली बर्स सां ङा बी का, बर्स सां ङा क्यारश का, बर्स सां ङा सांड का, ढुकुर का परवा आ चाइक्ब का चाक्ती” देंमाक्त। 10 मिनु अब्राममी मेको नेल्ल चाक्शा क्योरशा, फेके पा रिक्शा, फेके का एर गे, फेके का ओंथ गे पा वोदा बाक्त। ढुकुर नु परवा चहिं फेके मसेला बाक्त, येरमीया ३४:१८-१९ 11 मिनु ठेयब चिक्बपुकी मेको श्ये तशा, जुक्तमे बाक्त। तन्न अब्राममी “हाइ हाइ” दे ग्रीशा खेरमी बाक्त।