1 ख्रीस्‍तमी रिती थिती पतीके लां खोइक्‍चा प्रोंइपा, थमा सुइक्‍तीके लां कोंइशा, इं थुं हिरताक्‍व। मोपतीके जवा लाप्‍शो खोदेंशो पा लेंशा रिती थिती पा वाइलीम वाइल मदुमीने। गलाती ४:५; प्रेरित १५:१० 2 गो पावलमी “ख्रोइक्‍तीक चिनु रिती थिती पाइतीनी हना, ख्रीस्‍त इन पा ङा बेक्‍शो, शोर गाक्‍शो मदुम्‍बा ङा? शोर गाक्‍शो दुम्‍ब” देंनुङ। 3 लोव़ थोक्‍शा का का पा शेंनन्‍नी, ख्रोइक्‍तीक चिनु ख्रोंइ‍सीबपुकीमी अरेशो लोव़ नु रिती थितीम बाक्‍शो नेल्‍ल पचा माल्‍नीम। का यो प्रोंइचा मदुम्‍ब। 4 सु सुमी रिती थिती पशोमी ठीक दुम्‍चा माल्‍मे, मेकोपुकीमी ख्रीस्‍त आ पशो साम्‍शा, मेको रे ङोन दुम्‍शा आ शिशी मताइनीम। 5 गोपुकी “ख्रीस्‍त आ पतीके ठीक दुम्‍तय” देंशा, परमप्रभु यावे आ सोक्‍तीमी तुइक्‍पाइक्‍चा पुंइसाक्‍य। 6 ख्रीस्‍त येसु नु थुं का दुम्‍शा, ख्रोइक्‍तीक चिनु ख्रोइश्‍शो, मख्रोइश्‍शो आन कली मतिल्‍थु, थमा सुइक्‍तीकेमी दुशा गारशा दाक्‍मुशा बाक्‍शोम सक्ति बाक्‍ब। गलाती ६:१५; रोमी २:२६; १कोरिन्‍थी ७:१९ 7 ङोंइती गे रिम्‍शो पाइतीनी। तन्‍न सुम इन कली थमा लोव़ मनेंथु, दूली शेंब आन लोव़ नेंचा, दे इन थुं हिरदा? 8 इन कली आ तमी तौ सेल्‍बमी मोदेंशो मपाइब। 9 बोरपाइक्‍ब ओख्‍ती इच्‍का खोइ सुप्‍शोमी शोब्‍ले नेल्‍ल बोरपाइक्‍ब, दे रुपीने। १कोरिन्‍थी ५:६ 10 गे आं शेंशो लोव़ थमा सुइक्‍चा मप्रोंइनीनी, दे प्रभु रे तुइक्‍ताक्‍ङ। सु सुमी इन कली दूली लोव़ शेंशा, इन थुं क्‍याल्‍पाइश्‍शा हिरदमे, मेको आन कली परमप्रभु यावेमी सजाइ गेब, दे यो तुइक्‍ताक्‍ङ। गलाती १:७ 11 आं लोक्‍बपुकी, नेनीन, गो ख्रोइक्‍तीक चिनु ख्रोइक्‍चा माल्‍ब, दे शेंथ गाक्‍शो नङ हना, खेदा पा श्‍येत गेचा मपुंइसीङ वा। गोमी येसु ख्रीस्‍त इं पा ङा बेक्‍त, दे थमा सुतीन, दे शेंना शेंन गाक्‍शो नङ। मेको शेंतीक आ पर्बम आन थुं मनुथु श्‍येत गेतीमी। १कोरिन्‍थी १५:३०; गलाती ६:१२; १कोरिन्‍थी १:२३ 12 इन थुं क्‍याल्‍पाइक्‍बपुकीमी आंम आन रांमी चिनु ख्रोदमेनु, खसी पशो दुम्‍मल, देंनुङ।

13 आं लोक्‍बपुकी, प्रभुमी रिती थिती पचा प्रोंइपाइक्‍तीकी, दे गेनायो मप्रेंदीने। मोपा ब्रोंइशा यो इन दला दाक्‍स मपने। तन्‍न दाक्‍मुशा, वारच पमुशा बाक्‍कीने। १पत्रुस २:१६; २पत्रुस २:१९ 14 “आंम इ कली दाक्‍शो खोदेंशो पा, इ नेक्‍था बाक्‍ब आन कली यो दाक्‍तो” देंशो लोव़मी परमप्रभु यावे आ अरेशो लोव़ नेल्‍ल बाक्‍ब। लेवी १९:१८ 15 गेपुकी कुचुम जिशा क्राइक्‍मुशो खोदेंशो पा जीतीनी हना, खतम दुम्‍नीकी, दे तुइक्‍तीन। याकूब ४:२

16 लोव़ थोक्‍शा, का निक्‍शी नु तेम्‍शा शेंनन्‍नी, परमप्रभु यावे आ सोक्‍त रे पा ब्रोंइशा गेय पने। मो पाइतीनी हना ला, इन दला दाक्‍स मपाइनीनी, इन थुंमी मिम्‍शा मरिम्‍शो मपाइनीनी। 17 मुर आ थुंमी मिम्‍शो पचा नु परमप्रभु यावे आ सोक्‍तीम ब्रीशो थुं आ मिम्‍शो पचा मगारब। रिम्‍शो पय देंतीनी हना यो, रिम्‍शो पने मचाप्‍नीनी। रोमी ७:१५,२३ 18 परमप्रभु यावे आ सोक्‍तीमी चहिं इन कली गेय पपाइक्‍तु हना, रिम्‍शो पाइनीनी, अरेशो लोव़ मटीब यो मदुम्‍नीनी।

19 आन दला दाक्‍स पा मुर आ थुंमी मिम्‍शो पाइबपुकीमी दोदेंशो गेय पाइनीम देंशा हना, तेल्‍लेम पाइनीमी, ग्रांग्रा दिचा ङा गेय पाइनीमी, हेंथे गाक्‍नीमी, १कोरिन्‍थी ६:९-१० 20 मूर्ति पूजा पाइनीमी, मन्‍तर तन्‍तर पाइ‍नीमी, जिचा पोक्‍नीमी, थुं खाइक्‍पाइक्‍नीमी, रुश पाइनीमी, शुश चुरनीमी, आंम कली ला मिम्‍नीमी, गाइश्‍शा बाक्‍नीमी, दुशा गारशा बाक्‍ब आन कली फ्रानीमी, 21 गेहे पाइनीमी, तूशा दुक्‍शा हेंथे पाइनीमी, शुश जाइनीमी। मारेइ मारेइ मरिम्‍शो पशा गाक्‍नीम। साइ गोमी मोदेंशो गेय पाइबपुकी परमप्रभु यावे आ राज्‍य ओव़चा मताइनीम, दे शेंताक्‍न्‍नी। मुल लेंशा मिम्‍पाइक्‍तन्‍नी। एफिसी ५:५; प्रकाश २२:१५

22 परमप्रभु यावे आ सोक्‍तीमी ब्रीशो थुं पाइश्‍शोपुकीमी परमप्रभु यावे आ सोक्‍त रे पा दोदेंशो पाइनीम देंशा हना, दाक्‍मुइनीमी, ग्‍येरनीमी, थुं नाइक्‍नीमी, शुश फाल्‍नीमी, रिम्‍शो पाइनीमी, शिशी पाइनीमी, कबल खाप्‍नीमी, 23 ब्रेम्‍शो दुम्‍नीमी नु आंम कली चलेस जोक्‍नीमी। मोदेंशो पाइब मुर कली परमप्रभु यावे आ अरेशो लोव़मी मारेइ मपाइब। १तिमोथी १:९

24 सु ख्रीस्‍त येसु आ मुर दुम्‍शो बाक्‍नीमी, मेकोपुकीमी आंम रां ङा दला दाक्‍स येसु ख्रीस्‍त खोदेंशो पा शीम क्‍याइक्‍ने थुम्‍शो बाक्‍नीमी। रोमी ६:६ 25 गो परमप्रभु यावे आ सोक्‍तीमी ब्रोंइतय हना, इं गेय यो परमप्रभु यावे आ सोक्‍तीमीन पय। रोमी ८:४ 26 मोपतीके ठेयब मसेल्‍सीय, मगाइक्‍मुय अरु आन कली रिम्‍शो दुम्‍शो तशा गेहे मपय। फिलिप्‍पी २:३

<- गलाती 4गलाती 6 ->