1 मिनु मेको नोले, पारसी रागी ङा पिप आरता-सास्‍तमी सासन पची ना, सेरायाह आ तौ एज्रा बेबीलोन रे कुत। मेको सेरायाह आ आफ अजारयाह बाक्‍‍त। अजारयाह आ आफ हिल्‍‍कीयाह बाक्‍त। १इतिहास ५:३९-४० 2 हिल्‍‍कीयाह आ आफ शाल्‍लुम बाक्‍त। शाल्‍लुम आ आफ सादोक बाक्‍त। सादोक आ आफ अहीतुब बाक्‍त। 3 अहीतुब आ आफ अमारयाह बाक्‍त। अमारयाह आ आफ अजारयाह बाक्‍त। अजारयाह आ आफ मेरायोथ बाक्‍त। 4 मेरायोथ आ आफ जेराह बाक्‍त। जेराहीयाह आ आफ उज्‍जी बाक्‍त। उज्‍जी आ आफ बुक्‍की बाक्‍त। 5 बुककी आ आफ अबीशुआ बाक्‍त। अबीशुआ आ आफ फिनेहास बाक्‍त। फिनेहास आ आफ एलाजर बाक्‍त। एलाजर आ आफ नेल्‍ल क्‍येङा ठेयब चढ़ेब हारून बाक्‍त। 6 मेको एज्रा बेबीलोन रागी रे जाक्‍त। मोसा रे पा गेशो, परमप्रभु यावे, इस्राएली आन परमप्रभु आ अरेशो लोव़ जोक्‍ब तुइक्‍ब बाक्‍त। मिनु पिपमी आ पुंइशो नेल्‍ल गेप्‍तु। मारदे हना आ परमप्रभु यावे आ गुइ मेको आ तारी बाक्‍त। एज्रा ८:१८-२२; नेहेम्‍याह २:८

7 आरता-सास्‍त पिप दुम्‍शो ७ बर्स जाक्‍दीम्‍मेनु, का निक्‍शी इस्राएली, का निक्‍शी चढ़ेब, लेवी, कुम्‍सो पाइब, लाप्‍चोम खाल पाइब नु परमप्रभु आ खिंमी गेय पाइब मेको नु यरूसलेम लाम्‍तेक्‍म। 8 मिनु पिपमी सासन पशो ७ बर्स ङा ५ महिना दुम्‍मेनु, मेकोपुकी यरूसलेममी जाक्‍दीत्‍‍तेक्‍म। 9 मिनु ङोंइती ङा महिना ङा ङोंइती ङा नाक्‍तीमी बेबीलोन रागी रे यरूसलेम लचा गोम्‍तेक्‍म। मिनु मेकोपुकी ५ महिना ङा ङोंइती ङा नाक्‍तीमी यरूसलेम जाक्‍तेक्‍म। मारदे हना परमप्रभु यावे, आ परमप्रभु आ शिशी पतीक गुइ मेको आन तारी बाक्‍त। 10 एज्रामी परमप्रभु यावे आ अरेशो लोव़ रुप्‍चा नु पचा कली आ थुं फ्रेंशो बाक्‍त। मिनु परमप्रभु आ फुल्‍लुम मुशा ब्रेक्‍शो नु आ ठीक पतीक लोव़ इस्राएलम शेंचा कली मिम्‍शो बाक्‍त।

11 मेको पिप आरता-सास्‍तमी चढ़ेब एज्रा कली गेशो ब्रेक्‍स ङा लोव़ एको बाक्‍ब “मेको एज्रा नेल्‍ल ब्रेक्‍स तुइक्‍ब, परमप्रभु यावेमी इस्राएली आन कली शेंशो नु फुल्‍लुम मुशा ब्रेक्‍शो लोव़ रुप्‍शा जोक्‍ब बाक्‍‍त। 12 ‘पिप आन पिप आरता-सास्‍तमी स्‍वर्ग ङा परमप्रभु आ अरेशो लोव़ जोक्‍ब तुइक्‍ब चढ़ेब एज्रा कली थुं नाइश्‍शा बाक्‍को!’ 13 गो हुकुम का गे‍न‍न। मार हुकुम गे‍न‍न देंशा हना, आं रागीम बाक्‍शो इस्राएल ङा मुर, चढ़ेबपुकी नु लेवीपुकी यरूसलेममी सु सु लचा दाक्‍नीमी, मेको गे नु लने चाप्‍नीम। 14 गो, पिप नु आं ७ जना अर्ती गेबपुकीमी इन कली यहूदा नु यरूसलेममी मार दुम्‍ना दुम्‍न बाक्‍मे, मेको कोव़चा कली सोइश्‍शो बाक्‍नीकी। गे नु बाक्‍ब इन परमप्रभु आ अरेशो लोव़ पशो बाक्‍मा कों, मपशो बाक्‍मा, मेको कोव़ङो। 15 गो, पिप नु आं ७ जना अर्ती गेबपुकीमी ग्‍येरशा गेशो सुन चांदी यरूसलेममी बाक्‍ब इस्राएली आन परमप्रभु कली लतीन। 16 मिनु गे बेबीलोन रागी नेल्‍लेमी इ कली गेशो सुन चांदी लाइश्‍शा लने। मुर नु चढ़ेबपुकीमी यरूसलेम सहरम बाक्ब आन परमप्रभु आ खिं कली ग्‍येरशा गेशो मार मार यो लतीन। 17 मिनु मेको क्‍येटीमी यरूसलेममी इन परमप्रभु कली चढ़ेतीकेमी चढ़ेचा कली ब्‍यफ, सांड नु पाठापुकी ग्यापीन। मेको नु चढ़ेचा कली अन्‍न नु तूचा थोव़क यो ग्‍याप्‍चा माल्‍नीनी। 18 मेको मोपा ग्‍याप्‍शा यो सुन चांदी हेंत हना, इन परमप्रभु आ दाक्‍स पा, गे नु इन लोक्‍बपुकीमी मार पशो नु रिम्‍शो लाक्‍नीनी, मेको पने चाप्‍नीनी। 19 इन परमप्रभु आ खिंमी गेय पचा कली गेशो बोसपुकी, गे मेको यरूसलेममी परमप्रभु आ ङोंइती वोइक्‍चा माल्‍नीनी। 20 मिनु इन परमप्रभु आ खिं कली मारेइ माल्‍ताक्‍व हना, मेको पिप आ क्‍येट वोइक्‍तीक रे शोल्‍शा, गेय पने चाप्‍नीनी।

21 गो, पिप आरता-सास्‍तमी, युफ्रेटीस आइक्‍ची हांबु ङा रागी ङा क्‍येट कोव़शा वोइक्‍ब आन कली हुकुम गेतामी। नेल्‍ल आन कली ‘स्‍वर्ग ङा परमप्रभु आ अरेशो लोव़ जोक्‍ब तुइक्‍ब चढ़ेब एज्रामी इन कली मार पुंइतु हना यो, रीब पा गेने। 22 सहे का टलेन्‍ट चांदी, सहे का कोर चेरब, सहे का बाथ अङगुर शांबु, सहे का बाथ तेल नु हिक्‍सी दोशो माल्‍नीमी मोशो गेन। टलेन्ट का ३४ किलो बाक्‍ब। कोर का २२० लिटर, ठेयब पुक्‍तीके बाक्‍ब। बाथ का २२ लिटर बाक्‍ब। 23 स्‍वर्ग ङा परमप्रभुमी मार अरेशो बाक्‍मे आ खिं कली मार माल्‍दा मेको रीब पा स्‍वर्ग ङा परमप्रभु कली गेने। मो मदुम्‍त हना, आ गाइश्‍शो पिप आ राज्‍य नु आ तौ चच आन तार मोंइसीब। 24 मिनु गो इन कली मार तुइक्‍पाइक्‍चा दाक्‍नीकी देंशा हना, चढ़ेब, लेवी, कुम्‍सो पाइब, लाप्‍चो खाल पाइब, परमप्रभु आ खिंमी गेय पाइब नु अरु गेय पाइब आन कली पिप कली गेतीक क्‍येट नु तिरो पोक्‍चा मताइनीम’ दे हुकुम गे‍नन्‍नी।

25 मिनु गे, एज्रा इ परमप्रभुमी इ कली तुइक्ब थुं गेशो बाक्‍त। मोपतीके युफ्रेटीस आइक्‍ची हांबु ङा रागी कली हुकुम पाइब नु निसाफ पाइब योव़शा वोइक्‍चा माल्‍नेवे। मेकोपुकीमी युफ्रेटीस आइक्‍ची हांबु ङा मुर नेल्‍ल आन कली निसाफ पचा माल्‍नीम। मेको परमप्रभु आ अरेशो लोव़ तुइक्‍ब दुम्‍चा माल्‍नीम। गे मतुइक्‍ब आन कली शेंचा माल्‍नेवे। 26 इ परमप्रभु आ लोव़ मटीब नु पिप आ अरेशो मटीब, नेल्‍ल आन कली सजाइ गेचा माल्‍नीम। मेको आन कली साइक्‍चा पुंइसीचा ङा, रागी रे तिल्‍चा पुंइसीतीके, मेको आन शोंप नेल्‍ल रोइक्‍चा पुंइसीतीके नु चोक्‍चा पुंइसीतीके, मार सजाइ हना यो गेचा माल्‍नीम” दे ब्रेक्‍शो बाक्‍त।

27 मिनु एज्रामी “परमप्रभु यावे, आंइ किकी पिपी आन परमप्रभु, गे ठेयब बाक्‍नीनी। यरूसलेममी बाक्‍शो परमप्रभु यावे, इन खिं आ मान नु छेङछेङ बारपाइक्‍चा कली पिप आ थुंमी मोदेंशो रिम्‍शो पतीके कुर पाइतीनी। 28 मिनु पिप, आ अर्ती गेबपुकी नु गेय पाइब आन ठेयब मुरपुकीमी आं कली दाक्‍ब सेल्‍तीनी” देंत। मारदे हना परमप्रभु यावे, आं परमप्रभु आ गुइ आं तारी बाक्‍ब, दे तुइश्‍शा, आं थुं ठेयब सेल्‍ता। मिनु गो नु यरूसलेम लचा कली बेबीलोनम बाक्‍शो इस्राएली आन ठेयब मुर आन कली पुक्‍ताक्‍मी।

<- एज्रा 6एज्रा 8 ->