1 मिनु गेपुकीम आंम इन शोंप सेल्चा कली रागी योक्शा गेनीनु, मेको रे परमप्रभु यावे कली १५ हजार कुबीत लाइश्शो नु २० हजार कुबीत ब्रेम्शो रू का तिल्चा माल्नीनी। मिनु मेको रू नेल्ल परमप्रभु यावे केन दुम्ब। कुबीत का ०.५ मिटर बाक्ब।2 मेको रे पा ५ हजार कुबीत लाइश्शो नु ५ हजार कुबीत ब्रेम्शो रू का परमप्रभु यावे आ बाक्तीके दुम्ब। मेको आ एर ओंथ नेल्ल ५० कुबीत ब्रेम्शो श्येत्थ लां बाक्चा माल्ब। 3 मिनु मेको परमप्रभु यावे आ बाक्तीकेम २५ हजार कुबीत लाइश्शो नु १० हजार कुबीत ब्रेम्शो पुक्चा माल्नीनी। मेकेर परमप्रभु यावे आ खिं ङा नेल्ल क्येङा चोव़खो बाक्तीक दुम्चा माल्ब। 4 मेको बाक्तीक चहिं परमप्रभु यावे के बाक्ब। मेको परमप्रभु यावे आ खिंम गेय पाइब नु परमप्रभु आ नेक्था जाक्ब आन खिं कली नु परमप्रभु यावे आ खिं कली दुम्ब। 5 मेको अर्को २५ हजार कुबीत लाइश्शो नु १० हजार कुबीत ब्रेम्शो रू का परमप्रभु यावे आ खिंम गेय पाइब लेवी आन के दुम्ब। मेको आन बाक्तीक सहर कली दुम्ब।
6 गेपुकीम परमप्रभु आ रू प्रोंइशा अर्को ५ हजार कुबीत ब्रेम्शो नु २५ हजार कुबीत लाइश्शो रू का सहर कली वोइक्चा माल्नीनी। मेको इस्राएल ङा मुर नेल्ल आन कली दुम्ब। इजीकीएल ४८:१५-२०
सासन पाइब आन भाग
7 मेको परमप्रभु यावे आ रू आ निम्फा पटटी सासन पाइब आन के दुम्ब। मेको आ नेक्था ङा सहर ङा रू आन पूर्ब गे नु पच्छिम गे सासन पाइब आन के दुम्ब। मेको थर का ङा रू खोदेंशो पा लाइश्शो दुम्ब। मेको पच्छिम ङा सांद रे पूर्ब ङा सांद सम्म दुम्ब। इजीकीएल ४८:२१-२२8 मेको रू चहिं इस्राएलम सासन पाइब आन रू दुम्ब। मिनु मुल रे आं सासन पाइबपुकीम आं मुर आन कली दिप्चा मदुम्नीम। तन्न मेकोपुकीम इस्राएल आ खिं ङा मुर आन कली, मेको आन थर थर खोदेंशो पा आन रू आन के दुम्ब, दे रोइक्चा मताइनीम। इजीकीएल ४६:१८
10 गेपुकीम ठीक नाक्तीक नु पुक्तीकपुकी चलेचा माल्नीनी। लेवी १९:३६; ब्यवस्था २५:१५11 एफाह नु बाथ माइश्शो पुक्तीक खाल का ङा दुम्चा माल्नीम। होमेर का १० बाथ दुम्चा माल्ब। मिनु १० एफाह यो होमेर का बाक्ब। होमेर चहिं थाप्तीक दुम्चा माल्ब। एफाह का २२ लिटर रिक्ब ठेयब अन्न पुक्तीक बोस बाक्ब। बाथ का २२ लिटर रिक्ब बोस बाक्ब। होमेर का २२० लिटर रिक्ब बोस ताप्तीक बाक्ब।12 शेकेल का २० गेराह दुम्चा माल्ब। २० शेकेल, २५ शेकेल नु १५ शेकेल नेल्ल पा मीना का दुम्चा माल्ब” देंत। शेकेल का ११.५ ग्राम बाक्ब। गेराह का ०.६ ग्राम बाक्ब। मीना का ६०० ग्राम खोदेंशो बाक्ब।
सासन पाइब आन चढ़ेचा माल्शो
13 मिनु परमप्रभु यावेमी “गेपुकीम चढ़ेचा माल्शो अन्न गिश बाक्ब देंशा हना, होमेर का का चेरब रे एफाह ङा भाग ङा भाग का चढ़ेचा माल्नीनी। होमेर का का क्योव़ज रे एफाह ङा ६ भाग ङा भाग का चढ़ेचा माल्नीनी। 14 गेपुकीम चढ़ेचा माल्शो तेल कोर का बाथ ङा १० भाग ङा भाग का बाक्ब। मेको ४ माना खोदेंशो बाक्ब। कोर नु होमेर उइक्थ उइक्थ बाक्नीम। मिनु होमेर का के १० बाथ बाक्नीम। कोर नु होमेर खाल का ङा २२० लिटर बाक्ब। बाथ का एफाह का खोदेंशो बाक्ब, मेको २२ लिटर बाक्ब।15 गेपुकीम सहे निक्शी भेडा रे का चढ़ेचा माल्नीनी। मेको इस्राएली आन योव़तीके रे चाक्चा माल्नीनी। मेको अन्न चढ़ेशो, चोशा चढ़ेशो नु दुशा बाक्चा आ पर्बम चढ़ेशो बाक्ब। मेको पाप क्याम्चा कली बाक्ब” दे परमप्रभु यावेमी देंत। 16 मिनु मेकोमी लेंशा “इस्राएल ङा मुर नेल्लेमी मेको सासन पाइब कली मोदेंशो गेचा माल्नीम। 17 तन्न सासन पाइबमी मेको चोशा चढ़ेतीक, अन्न चढ़ेतीक नु तूचा थोव़क चढ़ेतीक आं देंशो चाडम चढ़ेचा माल्ब। मेकोमी औंसी, नाइक्तीक नाक्ती नु इस्राएल आ खिं ङा मुर आन चाड नेल्लेमी चढ़ेचा माल्ब। मेकोमी पाप आ पर्बम चढ़ेतीक, अन्न चढ़ेतीक, चोशा चढ़ेतीक नु दुशा बाक्चा आ पर्बम चढ़ेतीक इस्राएली आन पाप क्याम्चा कली चाक्चा माल्ब” दे परमप्रभु यावेमी देंत। २सामुएल ६:१७-१८
परमप्रभु आ चाडपुकी
18 मिनु परमप्रभु, परमप्रभु यावेमी “ङोंइती ङा महिना नु ङोंइती ङा नाक्त, गेपुकीम मारेइ मदुम्शो बोहोर का चाक्शा, परमप्रभु यावे आ बाक्तीक ग्रांग्रा मदिशो सेल्चा माल्नीनी। 19 मिनु चढ़ेबमी पाप आ पर्बम चढ़ेशो आ हुश इच्का लाइश्शा, परमप्रभु यावे आ खिं ङा लाप्चो ङा शीमी, चढ़ेतीक आ ४ कुना नु आ सुर नेल्लेम नु आगा लाङगा ङा लाप्चो ङा शीमी ब्रुइक्चा माल्ब। 20 मिनु सुइम ममिम्थु मतुइक्थु पाप पशो बाक्त हना, महिना ङा ७ नाक्त गेपुकीम मो पचा माल्नीनी। मोपा गे परमप्रभु यावे आ खिं कली यो पाप क्याम्तीक गेय पचा माल्नीनी। लेवी ४:२२; लेवी ५:१७-१८
21 मिनु ङोंइती ङा महिना ङा १४ नाक्ती गेपुकीम पास्सा चाड मानेचा माल्नीनी। मेना गे ७ नाक्त सम्म बोरब ओख्ती मसुप्शो शोब्ले जचा माल्नीनी। 22 मेको नाक्त सासन पाइबमी आंम कली नु रागी ङा मुर नेल्ल आन कली पाप आ पर्बम बोहोर का चढ़ेचा माल्ब। 23 मिनु मेकोमी मेको चाड ङा ७ नाक्त नेल्लेम मारेइ मदुम्शो ७ ओटा बोहोर नु ७ ओटा सांड नाक्त किंत किंत चोशा चढ़ेचा माल्ब। मिनु चाड ङा नाक्त किंत किंत पाप आ पर्बम बोका का का यो चढ़ेचा माल्ब। गन्ती २८:१७-२५24 मेको बोहोर का नु एफाह का अन्न चढ़ेचा माल्ब। सांड का नु एफाह का अन्न चढ़ेचा माल्ब। मिनु मेको का का पा, एफाह का कली हिन का तेल चढ़ेचा माल्ब। एफाह का २२ लिटर पुक्तीके बाक्ब। हिन का ४ लिटर बाक्ब।इजीकीएल ४६:५; गन्ती १५:४-१२25 मेकोम ७ महिना ङा १५ नाक्त रे मेको ७ नाक्त ङा चाड सम्म मेको मोदेंशो चढ़ेचा माल्ब। मेको पाप आ पर्बम चढ़ेतीके, चोशा चढ़ेतीके नु अन्न चढ़ेतीक बाक्ब। मेको नु तेल यो चढ़ेचा माल्ब” देंत। लेवी २३:३४
