4 मिनु नोले मेकोमी आं कली उत्तर गे ङा ठेयब लाप्चो रे पा परमप्रभु यावे आ खिं आ ङोंइती चाक्ती। मिनु मेको कोव़ङुनु, परमप्रभु यावे आ छेङछेङम मेको आ खिं ब्रीशो बाक्त। मिनु गो खुम्की पा बाप्ती।
5 मिनु परमप्रभु यावेम आं कली “ए मुर, आं नेक्था जाक्शा, कोव़ङो। आं खिं आ पर्बम पचा माल्शो गेय नु मेको आ पर्बम अरेशो लोव़ नेल्ल इ नोफा दाइश्शा रिम्शो पा नेनो। सु सु आं खिं ओव़चा ताइनीमी नु सु सु मताइनीम, दे रिम्शो पा कोव़शा अरेवो।
6 मेको मटीब मुर, इस्राएल आ खिं ङा मुर आन कली परमप्रभु, परमप्रभु यावेमी इन कली ‘ए इस्राएल आ खिं ङा मुरपुकी, गे इन ग्रांग्रा दिशो गेय नेल्ल प्रोनीन।
7 गेपुकी आं कली आं जचा थोव़क बोंसो नु हुश चढ़ेची ना आन थुं नु रांम ख्रोइक्तीक चिनु मख्रोइश्शो अर्को रागी ङा मुर आन कली आं बाक्तीकेम ओव़चा गेतीनी। मोपा गे आं खिं, मुर आ खिं खोदेंशो सेल्तीनी। मिनु इन ग्रांग्रा दिशो गेयम आं कबल प्रोंइतीनी।
यसैया ५२:१; येरमीया ९:२५ 8 गेपुकीम आं कली चढ़ेशो आ पर्बम होस मपनी। आं बाक्तीकेम इन गेय पचा कली गे अर्को रागी ङा मुर आन कली वोइश्शा आं खिं कोव़ब सेल्तीनी’ ” देंत।
9 मिनु परमप्रभु, परमप्रभु यावेमी “इस्राएली आन दातेम बाक्शो अर्को रागी ङा आन थुं नु रांम ख्रोइक्तीक चिनु मख्रोइश्शो मुर आं बाक्तीकेम ओव़चा मताइनीम। 10 तन्न इस्राएली हेंथे गाक्मानु, लेवीपुकी हेंथे गाक्शा, आं कली प्रोंइशा, आन मूर्ति कली पूजा पशो बाक्तेक्म। मेकोपुकीम आन पाप आ सजाइ तचा माल्नीम। 11 मिनु मेको लेवीपुकी आं बाक्तीकेम गेय पचा माल्नीम। मिनु आं खिं ङा लाप्चो खाल पाइब दुम्चा माल्नीम। मिनु आं खिंम गेय पचा माल्नीम। मेकोपुकीम मुर आन पर्बम चोशा चढ़ेतीक क्योरचा माल्नीम। मेकोपुकीम मुर आन कली वारच पा गेय पचा माल्नीम। 12 तन्न लेवीपुकीम मुर आन कली आन मूर्ति पूजा पतीकेम वारच पाम्तेक्म। मोपा मेकोपुकी इस्राएल आ खिं ङा मुर आन कली मरिम्शो पपाइक्तेक्म। मोपतीके मेकोपुकी सजाइ तचा माल्नीम, दे कसम जाता। 13 मेकोपुकी चढ़ेब आ गेय पचा कली आं नेक्था जाक्चा मताइनीम। मेकोपुकी तेकोइ आं कली चढ़ेशो आ नेक्था जाक्चा मताइनीम। मारदे हना मेको चढ़ेशो नेल्ल क्येङा चोव़खो बाक्ब। तन्न मेको मुने दोक्चा माल्नीम। मिनु मेकोपुकीम आन मूर्ति पूजा पशो ङा सजाइ तचा माल्नीम। 14 मो हना यो गो मेको आन कली आं खिं कली कोव़शा नु मार मार पचा माल्शो गेय पपाइक्नुङ।
15 तन्न चढ़ेब लेवी आ थर ङा सादोक आ चच युइ, इस्राएली आं रे हेंथे गाक्तेक्म हना यो, मेकोपुकीम आं खिं ङा पचा माल्शो गेय रिम्शो पा कोव़तेक्म। मेकोपुकी आं गेय पचा कली आं नेक्था जाक्चा ताइनीम। मेकोपुकी आं ङोंइती बोंसो नु हुश चढ़ेथ जाक्चा ताइनीम।
इजीकीएल ४०:४६ 16 मेकोपुकी ला आं बाक्तीकेम ओव़ने चाप्नीम। मिनु आं टेबल आ नेक्था जाक्शा, आं गेय पचा ताइनीम।
17 मेकोपुकी आगा ङा लाङगा ङा लाप्चो रे ओव़मानु, सुती के वा फेक्शो बाक्चा माल्नीम। मेकोपुकीम आगा ङा लाङगा ङा लाप्चो नु आं खिं आगाम गेय पामेनु, ऊन के मारेइ वा फेक्चा मदुम्नीम।
लेवी १६:४ 18 मेकोपुकीम पियाम सुती के गुप्तीक गुप्चा माल्नीम। मिनु सुती के आगाम फेक्तीक वा फेक्चा माल्नीम। मेकोपुकीम गल शाइक्ब तेकोइ वा फेक्चा मदुम्नीम।
19 मेकोपुकी लाङगा गे ङा लाङगा, मुर आन बाक्तीक लमानु, आगाम गेय पामेनु, फेक्शो वा प्रुइक्चा माल्नीम। मिनु मेको चोव़खो कोठाम वोइश्शा, अर्को वा फेक्चा माल्नीम। मोपा परमप्रभु आ थोव़क नु मुर आ थोव़क मखाल्दमेक्ल।
इजीकीएल ४२:१४ 20 मेकोपुकीम आन चां प्रेक्चा मदुम्नीम। मेको शुश लाइश्शो दुम्चा गेचा यो मदुम्ब। मेकोपुकीम आन चां ख्रोइक्चा ला दुम्नीम।
लेवी १९:२७ 21 चढ़ेबपुकीम आगा ङा लाङगा लमानु, अङगुर शांबु तूचा मदुम्नीम।
लेवी १०:९ 22 मेको चढ़ेबपुकीमी आन वोंइश बेक्शो नु प्रोंइचा पुंइसीशो मीश मुर ग्युंबे पचा मदुम्नीम। मेकोपुकीम इस्राएल आ खिं मुर रे जरमेशो कन्ने मीश आल नु आन वोंइश बेक्शो चढ़ेब आन मीश कली ला ग्युंबे पने चाप्नीम।
23 मेकोपुकीम आं मुर आन कली आं मार मार नु मुर आन मार मार खाल का ङा मबाक्नीम, दे शेंचा माल्नीम। मिनु मेको आन कली ग्रांग्रा दिशो नु मदिशो थोव़क खाल का ङा मबाक्नीम, दे कोंइचा माल्नीम।
इजीकीएल २२:२६; लेवी १०:१० 24 मारेइ जितीक खेतीक दुम्मेनु, चढ़ेबपुकीमीन निसाफ पाइब आन गेय पचा माल्नीम। मिनु आं निसाफ पतीक लोव़ खोदेंशो पा मेकोपुकीम निसाफ पचा माल्नीम। मेकोपुकीम चाड मानेचा आ पर्बम आं अरेशो नु आं फुल्लुम मुशा ब्रेक्शो लोव़ खोदेंशो पा पचा माल्नीम। मेकोपुकीम आं नाइक्तीक नाक्ती मानेचा माल्नीम।
ब्यवस्था १७:८-९ 25 मेकोपुकीम बेक्शो मुर आ नेक्था लशा, आंम कली ग्रांग्रा दिशो सेल्सीचा मदुम्नीम। मो हना यो आन आम आफ, तमी तौ, आन लोक्ब नु ग्युंबे मपशो आंम समी आन बेक्शो रां आ नेक्था लशा ग्रांग्रा दिशो दुम्ने चाप्नीम।
गन्ती १९:११; लेवी २१:१-४ 26 मिनु मेको ग्रांग्रा मदिशो दुम्मा नोले, ७ नाक्त सम्म रिम्चा माल्नीम।
27 मेकोपुकी आं खिं ङा आगा ङा लाङगाम गेय पचा कली ओव़तीक नाक्त मेकोपुकीमी पाप आ पर्बम चढ़ेचा माल्नीम” दे परमप्रभु, परमप्रभु यावेमी देंत।
28 मिनु परमप्रभुमी “चढ़ेब आन शोंप गो नङ। मेको आन कली इस्राएलम रू गेचा मदुम्ब। गो मेको आन शोंप नङ। गन्ती १८:२० 29 मेकोपुकीम अन्न चढ़ेशो, पाप आ पर्बम चढ़ेशो नु दोस आ पर्बम चढ़ेशो जचा माल्नीम। इस्राएलम परमप्रभु यावे कली गेचा माल्शो थोव़क नेल्ल मेको आन के दुम्ब। गन्ती १८:१४ 30 ङोंइती मीशो फल आन नेल्ल क्येङा रिम्शो फल नु इन चढ़ेशो मारेइ मारेइ नेल्ल चढ़ेब आन केन दुम्ब। गे इन खिंम आसीक तचा कली इन निशो फस नेल्ल क्येङा ङोंइती ङा डल्ला यो चढ़ेब आन कली गेचा माल्नीनी। प्रस्थान २५:२; गन्ती १५:२०; नेहेम्याह १०:३८ 31 चढ़ेबपुकीम आंमा बेक्शो चिक्ब नु बी ब्यफ, क्यारश भेडा कि जन्तुपुकीम साइश्शो, मारेइ ब्वचा मदुम्नीम” दे परमप्रभु यावेमी देंत। लेवी २२:८
<- इजीकीएल 43इजीकीएल 45 ->
