12 मेको परमप्रभु यावे आ खिं आ लाङगा गे हिरशो पच्छिम गे ङा खिं ७० कुबीत ब्रेम्शो बाक्त। मेको खिं आ एर ओंथ ङा गारो ५ कुबीत थांइशो बाक्त। मिनु मेको आ लाइश्शो ९० कुबीत बाक्त। कुबीत का ०.५ मिटर बाक्ब।
13 मिनु परमप्रभु यावे आ खिं पुक्गानु, मेको सहे का कुबीत लाइश्शो नु सहे का कुबीत ब्रेम्शो बाक्त। आ आगा ङा लाङगा नु खिं आ गारो नु मेको आ गारो सहे का कुबीत ब्रेम्शो बाक्त। 14 परमप्रभु यावे आ खिं आ पूर्ब गे ङा लाङगा यो सहे का कुबीत बाक्त।
15 मिनु नोले मेकोमी परमप्रभु यावे आ खिं ङा लाङगा पच्छिम गे पुक्गानु, निम्फा पटटी ङा लतीक लां सहे का कुबीत बाक्त। मिनु परमप्रभु यावे आ खिं, आ चोव़खो बाक्तीके नु आ ङोंइती ङा पिंडी ङा गारो नेल्ल शीम क्येप्शो बाक्तेक्म। 16 मिनु मेको सांफा आन एर ओंथ नेल्ल गे झेल बाक्तेक्म। लाप्चो गे कोव़चा कली नेल्ल शीम क्येप्शो बाक्त। उइ खप रे झेल सम्म शीम क्येप्शो बाक्तेक्म। 17 लाप्चो आ इर गे, चोव़खो बाक्तीके नु परमप्रभु यावे आ बाक्तीके आगाम लतीक लाप्चोम फारतीक वा बाक्तेक्म। मिनु खिं आ एर ओंथ ङा गारो, चोव़खो बाक्तीके नु खिं ङा ठेयब कोठा नेल्ल बुटा आप्शो बाक्तेक्म। 18 मेकेर करूब नु खजूर रवा आन बुटा आप्शो बाक्तेक्म। मेको करूब का खजूर रवा का नु करूब का पा आप्शो बाक्त। मेको करूब नेल्ल आन के कुल निक्शी बाक्तेक्म। 19 मेको करूब आ मुर आ कुल खजूर रवा का गे कोव़शो, नु अर्को ठिटा गुप्स आ कुल खोदेंशो अर्को खजूर रवा गे कोव़शो बाक्त। मेको परमप्रभु यावे आ खिं ङा गारो नेल्लेम मुशा बुटा आप्शो बाक्तेक्म। 20 उइ खप रे लाप्चो इर सम्म करूब नु खजूर रवा आन बुटा मुशा आप्शो बाक्तेक्म।
21 परमप्रभु यावे आ खिं ङा ओव़तीक ङा लाप्चो ङा शी दारपाइक्चा कली ४ ओटा ख्रोप्शो बाक्त। मिनु चोव़खो बाक्तीके आ ङोंइती यो मेको खोदेंशो पा बाक्त। मिनु लाङगा ङा चोव़खो बाक्तीक ओव़तीक लाप्चो ङा शी नेल्ल उइक्थ उइक्थ पा ४ पाटे बाक्तेक्म। मिनु थम चोव़खो बाक्तीक आ ङोंइती गे ङा लाप्चो ङा शी यो मोदेंशोन बाक्तेक्म। प्रस्थान २५:२३-३०; प्रस्थान ४०:२२-२३ 22 मेकेर शी के चढ़ेतीक का बाक्त। मेको कुबीत सां ग्येत्थ लाइश्शो, कुबीत निक्शी पित्थ लाइश्शो नु कुबीत निक्शी ब्रेम्शो बाक्त। मेको आ सुर, मेको आ तार नु आ एर ओंथ नेल्ल शी के बाक्त। मिनु मेकोमी आं कली “एको टेबल परमप्रभु यावे आ ङोंइती बाक्ब” देंत। 23 परमप्रभु यावे आ खिं नु आ चोव़खो बाक्तीक निक्शी के लाप्चो निक्शी बाक्तेक्म। 24 मेको लाप्चो आन के चोक्तीक निक्शी पाइश्शो बाक्तेक्म। 25 मिनु परमप्रभु यावे आ खिं ङा लाप्चोम गारो ङा खोदेंशो पा करूब नु खजूर रवा आन बुटा मुशो बाक्तेक्म। पिंडी आ ङोंइतीम शी के खाट बाक्शो बाक्त। 26 पिंडी ङा गारो आ निम्फा पटटी खजूर रवा आ बुटा मुशा आप्शो बाक्तेक्म।
<- इजीकीएल 40इजीकीएल 42 ->