1 परमप्रभु यावेमी आं कली थिती। मिनु परमप्रभु यावे आ सोक्‍तीम आं कली बेंसी आ दातेमी चाक्‍‍ती। मेको बेंसी रुशेइ रुशेम ब्रीशो बाक्‍त। इजीकीएल १:३ 2 मेकोम आं कली मेको रुश बाक्‍तीकेम एर ओंथ पपाइक्‍ती। मेको बेंसीम शुश रुश बाक्‍तेक्‍म। मेको थाम्‍पा सोव़शो बाक्‍तेक्‍म। 3 मिनु मेकोम आं कली “ए मुर, मार, एको रुश लेंशा ब्रोंइने चाप्‍नीमी ङा?” देंत। मिनु गो “परमप्रभु, परमप्रभु यावे, गे ला मेको तुइक्‍नीनी” देंती। 4 मिनु मेकोम आं कली “एको रुश आन कली आं लोव़ पा ‘ए सोव़शो रुश परमप्रभु यावे आ लोव़ नेनीन’ देनो” देंत। 5 मिनु परमप्रभु, परमप्रभु यावेमी “मेको रुश आन कली ‘गो इन आगाम सोक्‍त ओव़पाइक्‍नुङ। मिनु गे ब्रोंइनीनी। भजन संग्रह १०४:३० 6 गो इन कली नारीम बोइक्‍नन्‍नी। इन श्‍ये वापाइक्‍नुङ, कुशुलम गिल्‍नन्‍नी। मिनु गो इन आगाम सोक्‍त कुर पाइक्‍नुङ। मिनु गे ब्रोंइनीनी। मिनु गेपुकीम गोन परमप्रभु यावे नङ, दे तुइक्‍नीनी’ ” देंत। यसैया २६:१९

7 मोपतीके गो मेकोमी देंशो खोदेंशो पा परमप्रभु यावे आ लोव़ पाता। मिनु गो मेको परमप्रभु यावे आ लोव़ पन पन बाक्‍ङानु, मेकेर करक कुरूक पशो नेंता। मिनु मेको रुशपुकी का नु अर्को बोंइसीचा गोम्‍तेक्‍म। 8 मिनु गो आं कोव़न कोव़ना मेको आन नारी बोंइसी‍शा, श्‍ये ग्रूत। मिनु मेको कुशुलम गिल्‍साक्‍म। तन्‍न मेकोपुकी नु सोक्‍त मबा। 9 मिनु मेकोमी आं कली “ए मुर, सोक्‍त कली आं लोव़ पावो। गे मुर, आं लोव़ पावो। मेको आन कली परमप्रभु, परमप्रभु यावेमी ‘ए सोक्‍त, पूर्ब, पच्‍छिम, उत्तर दक्‍खिन रे जाक्‍कीन। मिनु एको बेक्‍शो आन कली मुइक्‍तीन। मिनु ब्रोंइम‍ल’ देनो” देंत। 10 मिनु गो परमप्रभु यावे आ अरेशो पाता। मिनु मेको ब्रोंइतीक सोक्‍त मेको आन आगाम ओव़त। मिनु मेकोपुकी ब्रोंइशा राप्‍तेक्‍म। मिनु थम ठेयब हुल का दुम्‍‍त।

11 मिनु मेकोम आं कली “ए मुर, एको रुश नेल्‍ल इस्राएल आ खिं ङा मुर बाक्‍नीम। मेकोपुकीम ‘आंइ रुश नेल्‍ल सोव़ने थुम्‍तेक्‍म। मिनु आंइ आस नेल्‍ल जाम्‍त। गो थमा पा ताइक्‍चा पुंइसाक्‍क’ देंतेक्‍म। इजीकीएल ३७:१ 12 मोपतीके मेको नेल्‍ल आन कली आं लोव़ पा ‘गो, परमप्रभु, परमप्रभु यावेमी तुरस रोक्‍शा, इन कली ग्रुंइनुङ। आं मुरपुकी, गो इन कली लेंशा इस्राएल रागीम चाक्‍नन्‍नी। 13 ए आं मुरपुकी, गो इन तुरस रोक्‍शा ग्रुंइदुनु, गेपुकीम गोन परमप्रभु यावे नङ, दे तुइक्‍नीनी। 14 गो आं सोक्‍त इन कली कुर पाइक्‍नन्‍नी। मिनु गे ब्रोंइनीनी। मिनु गो इन कली आंम इन रूम बाक्‍पाइक्‍नुङ। मिनु गेपुकीम गो परमप्रभु यावेमीन एको लोव़ पाता। मिनु मेको पाइनुङ, दे तुइक्‍नीनी’ देनो” दे परमप्रभु, यावेमी देंत।

15 परमप्रभु यावेमी आं कली लोव़ पाप्‍तु। 16 मार लोव़ पाप्‍तु देंशा हना “ए मुर, कोक्‍के का चाक्‍शा ‘यहूदा नु इस्राएल ङा मुर’ दे ब्रेक्‍तो। मिनु नोले अर्को कोक्‍के का चाक्‍शा ‘योसेफ, एफ्राइम नु मेको नु बाक्‍ब इस्राएल आ खिं नेल्‍ल’ दे ब्रेक्‍तो। 17 मिनु मेको निम्‍फा फ्रिप्‍शा कान सेल्‍सी। मोपा मेको इ गुइम कोक्‍के कान दुम्‍ब। 18 मिनु इ मुरपुकीम इ कली ‘मेको आ अर्थ मार बाक्‍बा गे आंइ कली मशेंनीनी?’ दे हिल्‍लो पाइनीम। 19 गे मेको आन कली परमप्रभु, परमप्रभु यावेमी गो एफ्राइम आ गुइम बाक्‍शो योसेफ आ कोक्‍के, इस्राएली आन थर ङा यहूदा आ कोक्‍के नु फ्रिप्‍नुङ। मोपा गो मेको आस कली कोक्‍के कान सेल्‍नुङ। मिनु मेको आं गुइम कान दुम्‍नीस। 20 मिनु मेको इन ब्रेक्‍शो कोक्‍के इन ङोंइती इन गुइम ग्‍याइश्‍शा बाक्‍नीस” देंत। 21 मेना परमप्रभु, परमप्रभु यावेमी मेको आन कली “इस्राएल ङा मुर तेको तेको रागीम लमा, गो मेको आन कली रागी नेल्‍ल रे खुप्‍नुङमी। मिनु मेको आन कली आंम आन रागीम चाक्‍नुङमी। यसैया ११:१२-१३ 22 गो मेको आन कली इस्राएल रागी ङा पहाडम रागी कान सेल्‍नुङमी। मिनु मेको नेल्‍ल आन के पिप कान दुम्‍ब। मिनु गेनायो रागी निक्‍शी मदुम्‍नीस। मिनु राज्‍य निक्‍शी मदुम्‍नीस। इजीकीएल ३४:२३; येरमीया ३:१८; होसे २:२ 23 मिनु मेकोपुकीम लेंशा गेनायो आन मूर्ति नु अरु ग्रांग्रा दिशो थोव़क नु हेंथे मपाइनीम। मारदे हना गो मेको आन कली नेल्‍ल आन हेंथे पतीक रे प्रोंइ‍नुङमी। मिनु मेको आन कली आं मुर सेल्‍नुङमी। मिनु मेकोपुकी आं मुर दुम्‍नीम। मिनु गो मेको आन परमप्रभु दुम्‍नुङ। इजीकीएल ११:२०

24 आं गेय पाइब दाऊद मेको आन पिप दुम्‍ब। मिनु मेको आन गोठला कान दुम्‍ब। मिनु मेकोपुकीम आं निसाफ पतीक लोव़ टीनीम। मिनु मेकोपुकीम आं फुल्‍लुम मुशा ब्रेक्‍शो लोव़ होस पा पाइनीम। इजीकीएल ३४:२३; इजीकीएल ३६:२७ 25 मिनु मेकोपुकी आं गेय पाइब याकूब कली गेशो रागीम बाक्‍नीम। मेकेर आन किकी पिपी बाक्‍शो बाक्‍तेक्‍म। मिनु मेकेर मेको आन आल, चच युइ गेना हना यो बाक्‍नीम। मिनु आं गेय पाइब दाऊद गेना हना यो मेको आन कली सासन पाइब दुम्‍ब। लूका १:३२-३३ 26 गो मेकोपुकी नु थुं नाइश्‍शा बाक्‍तीक कबल का पाइनुङ। मेको गेना हना यो लीब कबल बाक्‍ब। गो मेको आन कली आसीक गेशा शुश दुम्‍पाइक्‍नुङमी। मिनु गो मेको आन दातेम गेना हना यो कली आं बाक्‍तीक सेल्‍नुङ। प्रस्‍थान २५:८; इजीकीएल ३४:२५; यसैया ५४:३० 27 आं बाक्‍तीक मेकोपुकी नुन दुम्‍ब। मिनु गो मेको आन परमप्रभु दुम्‍नुङ। मिनु मेकोपुकी आं मुर दुम्‍नीम। इजीकीएल ११:२० 28 मेना रागी रागी ङा मुरपुकीम गो, परमप्रभु यावेमीन इस्राएली आन कली आं मुर सेल्‍ता। मिनु आं बाक्‍तीके मेको आन दातेम गेना हना यो बाक्‍ब, दे यो तुइक्‍नीम” दे परमप्रभु यावेमी देंत। इजीकीएल ३६:२३

<- इजीकीएल 36इजीकीएल 38 ->