1 मिनु नोले परमप्रभु यावेमी मोसा कली “गे फाराओ आ बाक्‍तीक लावो। परमप्रभु यावेमी आ मुर आन कली लचा गेमी। प्रस्‍थान ५:१ 2 गे लचा मगेतीनी हना, क्रुक्‍क्रुपुकीमी इ रागी ङा मुर नेल्‍ल आन कली श्‍येत गेपाइक्‍नुङमी। 3 नील खोलाम शुश क्रुक्‍क्रु ग्रूपाइक्‍नुङ। मेकोपुकी इन खिंम बाक्‍थ जाक्‍नीम। इन इप्‍तीक कोठामी यो ओव़नीम। इन खाट तार ङोइक्‍नीम। मिनु इन दरवार ङा गेय पाइब आन खिंमी यो ओव़नीम। मुर आन तार नु आन चुप्‍लुमी यो बाक्‍नीमी। आन फस नित्‍तीके बोस आगाम ओव़नीम। 4 मेको क्रुक्‍क्रुपुकी इन तारी, इन मुर आन तारी नु इन दरवार ङा गेय पाइब आन तारी जाक्‍नीम, दे परमप्रभु यावे आ देंशो लोव़ बाक्‍ब, दे मतो” दे मोसा कली देंत।

5 मिनु नोले परमप्रभु यावेमी मोसा कली “गेमी हारून कली ‘इ कोक्‍के खोला नेल्‍ल आन तार दिंदो। मोपा गे इजीप्‍त रागीम क्रुक्‍क्रु ग्रूपाइक्‍नेवे’ दे हारून कली देनो” दें‍त। 6 मिनु हारूनमी आ गुइ इजीप्‍त ङा ब्‍वाक्‍कु तारी दिंताक्‍व। मिनु क्रुक्‍क्रुपुकी ग्रूशा, इजीप्‍त रागी नेल्‍ल ब्रीतेक्‍म। 7 इजीप्‍त रागी ङा जादू टुना मुना पाइबपुकीमी यो आन मन्‍तरमी हारून खोदेंशो पा क्रुक्‍क्रु ग्रूपाइक्‍तेक्‍म। प्रस्‍थान ७:११

8 मिनु फाराओमी मोसा नु हारून आस कली ब्रेप्‍पाइश्‍शा “आं पर्बम नु आं मुर आन पर्बम परमप्रभु यावे कली पुनीस। क्रुक्‍क्रु लमल, दे पुनीस। गोमी इस्राएल जात ङा मुर आन कली परमप्रभु यावे कली चढ़ेथ लचा गेनुङ” दे मोसा नु हारून आस कली देंत। प्रस्‍थान ८:२४; प्रस्‍थान ९:२८; प्रस्‍थान १०:१७ 9 मिनु मोसामी फाराओ कली “हजुर, इन कली नु इन गेय पाइब आन कली, इन मुर आन खिं नु इन खिं रे क्रुक्‍क्रु लमल, नील खोलाम ला बाक्‍मल, दे गेना पुंइचा माल्‍नस्‍कु?” दे हिल्‍लो पाप्‍तु। 10 मिनु “दीसा कली पुनीस” दे लोव़ लेत्‍ताक्‍व। मोसामी “परमप्रभु यावे आंइ परमप्रभु खोदेंशो सुइ मबा, दे तुइक्‍पाइक्‍चा कली इन देंशो दीसा दुम्‍ब। प्रस्‍थान ९:१४; प्रस्‍थान १५:११; ब्‍यवस्‍था ३३:२६; २सामुएल ७:२२; येरमीया १०:६ 11 दीसा क्रुक्‍क्रुपुकी इन बाक्‍तीक, इन गेय पाइब नु इन मुर इन खिं नेल्‍ल रे गाक्‍नीमी। नील खोलाम ला बाक्‍नीम” देंत।

12 मोपा मोसा नु हारून फाराओ आ खिं रे लाम्‍ताक्‍स। मिनु मोसामी मेको परमप्रभु यावे आ सोइश्‍शो क्रुक्‍क्रु आ पर्बम पुंइतु। 13 मिनु परमप्रभु यावेमी मोसामी पुंइशो नेंशा पाप्‍तु। खिंम, लाङगाम नु रूम बाक्‍शो क्रुक्‍क्रु नेल्‍ल बेक्‍‍तेक्‍म। 14 मुरुमी बेक्‍शो क्रुक्‍क्रु नेल्‍ल खुप्‍ताक्‍म। मिनु रागी नेल्‍ल थाम्‍पा रिना पाइक्‍तु। 15 इजीप्‍त रागी ङा फाराओ चहिं मेको क्रुक्‍क्रु रे ब्रोंइशो तशा, आ थुं ङोंइती ङा खोदेंशो पा काइ मटीब दुम्‍माक्‍त। मिनु मोसा नु हारूनम देंशो लोव़ मपव। ङोंइती परमप्रभु यावेमी मो देंशो बाक्‍माक्‍त। प्रस्‍थान ४:२१

16 मिनु नोले परमप्रभु यावेमी मोसा कली “गेमी हारून कली ‘इ कोक्‍के दिंशा, फुरक तुपो’ दे मतो। मिनु मो पवानु, इजीप्‍त रागीमी फुरक नेल्‍ल भुस्‍ना दुम्‍शा फोंइनीम” दे मोसा कली माइक्‍तु। प्रस्‍थान 17 मिनु हारूनमी फुरक तुबानु, इजीप्‍त रागी नेल्‍लेमी मुर नु बस्‍तु भाव आन तारी भुस्‍ना शुश फोंइतेक्‍म। 18 इजीप्‍त रागी ङा जादू टुना मुना पाइबपुकीम यो हारून खोदेंशो पा भुस्‍ना ग्रूपाइक्‍चा माल्‍तेक्‍म। तन्‍न मचबेम। मुर नु बस्‍तु भाव आन तारी भुस्‍ना शुश जुक्‍ताक्‍म। प्रस्‍थान ७:११ 19 मिनु जादू टुना मुना पाइबपुकीमी फाराओ कली “एको परमप्रभुमी पाप्‍तु” देंमा बाक्‍त। फाराओ चहिं काइ मटीब दुम्‍माक्‍त। मिनु मोसा नु हारून आस देंशो लोव़ मटिव। परमप्रभु यावेम ङोंइती देंशो खोदेंशो दुम्‍त। भजन संग्रह ६४:१०; भजन संग्रह ७२:१८; लूका ११:२०

20 मिनु परमप्रभु यावेमी मोसा कली “सुनी कना बोक्‍को। फाराओ खोला लमेनु, मेको कली ग्रुम्‍थ लावो। मिनु फाराओ कली ‘परमप्रभु यावेमी, आं मुर आन कली आं कली चढ़ेथ लचा गेवो। प्रस्‍थान ५:१ 21 नेनो, गे आं मुर आन कली लचा मगेप्‍तीवी हना, गो इ कली, इ गेय पाइब आन कली नु इ मुर नेल्‍ल आन कली श्‍येत जपाइक्‍चा कली इ खिंमी, इ रागी ङा मुर आन खिंमी डांसम ब्रीपाइक्‍नुङ। रू नेल्‍ल डांसम ब्रीपाइक्‍नुङ। 22 मेको मो दुम नाक्‍ती आं मुर आन बाक्‍तीक गोशेनमी चहिं डांस मग्रूपाइक्‍नुङ। अरु इजीप्‍त रागीमी ग्रूपाइक्‍नुङ। आं पर्बम तुइक्‍पाइक्‍चा कली मो पाइनुङ। मिनु गे आं पर्बम परमप्रभु यावे मेको रागीम बाक्‍ब, दे तुइक्‍चा माल्‍नेवे। प्रस्‍थान ७:५ 23 मोदेंशो पा गो आं मुर आन बाक्‍तीकेमी डांस मग्रूपाइक्‍नुङ। इ मुर आन बाक्‍तीकेमी ला डांस ग्रूपाइक्‍नुङ। दीसा गे तुइक्‍नेवे, देनो’ देंत” दे परमप्रभु यावेमी मोसा कली देंत। 24 मिनु परमप्रभु यावेमी आ देंशो पाप्‍तु। डांस शुश फोंइशा फाराओ आ खिं, आ दरवारम गेय पाइब आन खिं, इजीप्‍त रागी नेल्‍लेमी शुश डांस फोंइशा ब्रीतेक्‍म। मिनु डांसमी मेको रागी नेल्‍ल खतम सेल्‍तेक्‍म।

25 मिनु नोले फाराओमी मोसा नु हारून आस कली ब्रेप्‍पाइश्‍शा “लने, इन परमप्रभु कली आं रागी उइ चढ़ेने” दें‍त। 26 मोसामी चहिं “मो पचा मदुम्‍ब। मारदे हना परमप्रभु यावे, आंइ परमप्रभु कली चढ़ेशो तशा, इजीप्‍त ङा मुर ग्रांग्रा दी‍नीम। मोपा इजीप्‍त ङा मुर आन ङोंइती आन मदाक्‍शो गेय पकानु, मेकोपुकीमी आंइ कली फुल्‍लु आप्‍शा, साइक्‍नीम। उत्‍पत्ती ४३:३२; उत्‍पत्ती ४६:३४ 27 गोपुकी नाक्‍त सां ङा लां गाक्‍शा, गोरशो रागीम लशा, परमप्रभु यावेम देंशो खोदेंशो पा चढ़ेचा माल्‍नीकी” दें‍त। प्रस्‍थान ३:१८ 28 मिनु फाराओमी “गो इन कली गोरशो रागीम परमप्रभु यावे, इन परमप्रभु कली चढ़ेथ लचा गेनुङ। शुश ङोन चहिं मलने। आं पर्बम यो पुनीस” दें‍त। 29 मिनु मोसामी “मुल गो एकेर रे लशा, परमप्रभु यावे कली पुंइनुङ। मार पुंइनुङ देंशा हना ‘दीसा फाराओ, आ गेय पाइब नु रागी ङा मुर नेल्‍ल आन बाक्‍तीक रे डांस प्रोक्‍पतीने’ दे पुंइनुङ। तन्‍न लोव़ का पाइनुङ। गे आंइ कली परमप्रभु यावे कली चढ़ेचा दुम्‍ब, दे नोले ‘लचा मगेनुङ’ देंशा, जोल मपने” दे मोसामी फाराओ कली दें‍त। 30 मो देंशा मोसा फाराओ आ खिं रे लशा, परमप्रभु यावे कली पुंइतु। प्रस्‍थान ८:८ 31 मिनु परमप्रभु यावेमी मोसा आ पुंइशो लोव़ नेंशा पाप्‍तु। मिनु डांस फाराओ आ खिं, आ गेय पाइब नु मुर नेल्‍ल रे तिल्‍तु। काइ मलीम। 32 तन्‍न फाराओ लेंशा काइ मटीब दुम्‍शा, इस्राएली आन कली लचा मगेव। प्रस्‍थान ४:२१

<- प्रस्‍थान 7प्रस्‍थान 9 ->