1 मिनु इस्राएल ङा मुरपुकीमी मोसा कली डांडा रे मयिशो तशा, हारून आ बाक्‍तीक जाक्‍शा, मेको कली “लो, इं ङोंइङोंइती गाक्‍शा लां कोंइब देवता सेलो। आंइ कली इजीप्‍त रागी रे ग्रुंइशा, एक चाक्‍ब मोसा मार दुम्‍मे? मतुइक्‍तक” दे हारून कली देंमा बाक्‍त। ब्‍यवस्‍था ९:८-२१ 2 मिनु हारूनमी मेको आन कली “इन मीश, इन तमी तौ आन पांइशो सुन प्रुइश्‍शा, आं बाक्‍तीके चाक्‍कीन” दें‍माक्‍त। 3 मिनु मुर नेल्‍लेमी आन नोफामी पांइशो सुन प्रुइश्‍शा, हारून आ बाक्‍तीके चाक्ग‍मे बाक्‍त। 4 मिनु हारूनमी मेको सुन आन गुइ रे ताक्‍शा, यपाइश्‍शा, बाछा का सेला बाक्‍त। मिनु इस्राएलीपुकीमी “इस्राएल ङा मुरपुकी, एकोन इं देवता बाक्‍ब। एकोमी इं कली इजीप्‍त रागी रे ग्रुंइताक्‍व” दे मुमा बाक्‍त। १राजा १२:२८; भजन संग्रह १०६:१९-२०; प्रेरित ७:४१ 5 मिनु हारूनमी मेको आन कली तशा, बाछा आ ङोंइती चढ़ेतीक का सेला बाक्‍त। मिनु ठेयब सेंदा पा “दीसा परमप्रभु यावे कली चाड का मानेचा माल्‍ब” दें‍माक्‍त। 6 मिनु आ दीसा मेकोपुकी सुनी कना बोक्‍शा चोशा चढ़ेतीक नु दुशा बाक्‍चा आ पर्बम चढ़ेतीक चढ़ेमे बाक्‍त। मिनु मुरपुकी जचा तूचा कली निस्‍समा बाक्‍त। मिनु नोले जशा तूशा बोक्‍शा, आन द‍ला दाक्‍स पामे बाक्‍त। १कोरिन्‍थी १०:७

7 मिनु परमप्रभु यावेमी मोसा कली “डांडा रे तोंइसो। इजीप्‍त रे ग्रुंइशा चाक्‍शो इ मुरपुकीमी आन द‍ला दाक्‍स पा पाप पाम्‍तेक्‍म। 8 मेकोपुकीमी आं शेंशो लोव़ थु था प्रोंइतेक्‍म। आंम कली सुन के बाछा का सेल्‍शा, मेको कली पूजा पशा ‘इस्राएल ङा मुरपुकी, एकोन इं कली इजीप्‍त रागी रे ग्रुंइब परमप्रभु बाक्‍ब’ देंतेक्‍म” दे परमप्रभु यावेमी मोसा कली दें‍त। प्रस्‍थान २०:४,२३ 9 मिनु लेंशा परमप्रभु यावेमी मोसा कली “गो मेको मुर आन कली ताता। काइ मटीब बाक्‍नीम, दे तुइक्‍ताक्‍ङ। ब्‍यवस्‍था ९:६; यसैया ४८:४; प्रेरित ७:५१ 10 मोपतीके आं कली मतेक्‍यी। मेको आन कली तशा गाइक्‍ताक्‍यी। गो मेको आन कली साइक्‍नुङमी। मिनु गो इ लां पा ठेयब जात का सेल्‍नुङमी” दें‍त। गन्‍ती १४:११-२० 11 मिनु मोसामी परमप्रभु यावे कली “परमप्रभु यावे, आं परमप्रभु, इन मुर आन पर्बम मारदे गाइक्‍तीनी? गेमी इन ठेयब सक्तिमी मेको आन कली इजीप्‍त रागी रे ग्रुंइताक्‍नी। 12 मो पाइतीनी हना इजीप्‍त रागी ङा मुरपुकीमी ‘परमप्रभुमी मेको आन कली पहाडमी साइश्‍शा, रागी रे क्‍याम्‍चा कली एक रे ग्रुंइताक्‍व’ देंनीम। मोपतीके इन ठेयब गाइक्‍तीक प्रोनीन। इन मुर आन कली मसतीन। ब्‍यवस्‍था ९:२८; यहोसु ७:९ 13 इन गेय पाइब अब्राहाम, इसहाक नु याकूब मिम्‍तीने। मेको आन पर्बम इन नेंमी ‘गो इन कली सरीङ ङा सोरुल खोदेंशो पा शुश सेल्‍नुङ। आं देंशो रागी इन चच युइ आन कली गेनुङमी। मिनु एको रागी गेना हना यो मेको आन के दुम्‍ब’ दे कसम जाइतीनी” दें‍त। उत्‍पत्ती १५:५; उत्‍पत्ती २२:१६-१७; उत्‍पत्ती २६:४ 14 मिनु परमप्रभु यावेमी आ थुं लेश्‍शा, आ मुर आन कली मसाइक्‍मी। भजन संग्रह ८५:-

15 मिनु मोसा परमप्रभु यावे आ देंशो लोव़ ब्रेक्‍शो फुल्‍लु निक्‍शी कुरशा, डांडा रे ब्रुप्‍त। मेको फुल्‍लु निक्‍शी निम्‍फा पटटीम मुशा ब्रेक्‍शो बाक्‍त। 16 परमप्रभुमी मेको फुल्‍लु आंमा चेश्‍शा सेल्‍शो बाक्‍माक्‍त। मिनु मुशा ब्रेक्‍शो बाक्‍त। प्रस्‍थान ३१:१८ 17 मिनु यहोसुमी मुर आन कली रेयके पशो नेंशा, मोसा कली “इस्राएल ङा मुर आन बाक्‍तीकेमी लडाइ पशो रेयके खोदेंशो नेंसाक्‍व” दें‍त। 18 तन्‍न मोसामी “एको रेयके लडाइ ग्राब आन रेयके ममाइ, ब्रुइब आन रेयके यो ममाइ। गो कुम्‍सो पशो नेंता” दें‍त।

19 मिनु मोसा इस्राएली आन बाक्‍तीके आ नेक्‍था जाक्‍मेनु, बाछा नु बाछा आ एर ओंथ मुरपुकी सिल पशो तशा, शुश गाइश्‍शा, फुल्‍लु निम्‍फा ताइश्‍शा, डांडा आ पुंम प्रोल्‍तु। 20 मिनु मोसामी इस्राएली आन सेल्‍शो बाछा लाइश्‍शा, मीम हुम्‍शा, तुप्‍शा फस सेल्‍शा, ब्‍वाक्‍कुम फुइश्‍शा, इस्राएली आन कली तूपाइक्‍तीमी। 21 मिनु नोले मोसामी हारून कली “एको मुरपुकीमी इ कली मार पामे ङा? मारदे मेको आन कली ओदेंशो ठेयब पाप पपाइक्‍मी?” दे हिल्‍लो पाप्‍तु। 22 मिनु हारूनमी “आं पर्बम मगाइक्‍तीन। गे एको मुर आन कली तुइक्‍नीनी। एकोपुकी दूली पाइब ला बाक्‍नीम। 23 आं कली ‘आंइ ङोंइङोंइती गाक्‍शा लां कोंइब देवता सेलो। मारदे हना आंइ कली इजीप्‍त रे ग्रुंइशा, एक चाक्‍ब मोसा कली मार दुम्‍मे, मतुइक्‍तक’ देंतेक्‍म। 24 मिनु गो मेको आन कली ‘सु सु इन के सुन बाक्‍मे, मेको प्रुइश्‍शा, एक चाक्‍कीन’ दे माइक्‍तामी। मिनु मेकोपुकीमी चाक्‍तेक्‍म। मिनु गो मेको सुन मीम हुम्‍ताक्‍ङ। मिनु एको बाछा दुम्‍त” दें‍त।

25 मोसामी मुर आन कली आन द‍ला दाक्‍स पशो ताप्‍तु। मारदे हना हारूनमी आन दला दाक्‍स पचा गेवा बाक्‍त। मिनु आन जोरी सत्रु नेल्‍ल ग्‍येरसमा बाक्‍त। 26 मिनु मोसामी इस्राएली आन बाक्‍तीक ओव़तीकेम राप्‍शा “सु सु परमप्रभु यावे गे बाक्‍नी, मेकोपुकी आं गे पिने” दें‍त। मिनु लेवी आ थर ङा मुर नेल्‍ल मोसा गे लशा, आ एर ओंथ राप्‍तेक्‍म। 27 मिनु मोसामी मेको आन कली “परमप्रभु यावे, इस्राएली आन परमप्रभुमी ‘गे नेल्‍लेमी इन तरवार पिप्‍शा, मुर आन बाक्‍तीके लशा, इन लोक्‍ब, इन खिं ङा मुर, इन वारच नु सु बाक्‍तेक्‍म हना यो, सतीन’ देंत” दें‍त। 28 मिनु लेवी आ थर ङा मुरपुकीमी मोसा आ देंशो खोदेंशो पा पाम्‍तेक्‍म। मेको नाक्‍ती हजार सां मुर साइक्‍चा पुंइसाक्‍म। 29 मिनु मोसामी लेवी आ थर ङा मुर आन कली “गेपुकीमी मुलाक्‍ती परमप्रभु यावे आ गेय पा, आंम आंम इन तौ नु आंम आंम इन लोक्‍ब आन कली मप्रोंइथु साइक्‍तीनी। मिनु मुलाक्‍ती गे आसीक राइनीनी” दें‍त। प्रस्‍थान २६:४१; गन्‍ती ३:६-१०; ब्‍यवस्‍था ३३:८-११

30 आ दीसा मोसामी मुर आन कली “गेपुकीमी ठेयब पाप पाइतीनी। मिनु गो परमप्रभु यावे आ बाक्‍तीक ङोइश्‍शा, लाइनुङ। गो इन पशो पाप क्‍याम्‍तीक गेय पने चाप्‍नुङा, कों?” दें‍त। 31 मिनु मोसा परमप्रभु यावे आ बाक्‍तीक लशा मेको कली “मुरपुकीमी थमा पा ठेयब पाप पाम्‍तेक्‍म। आंम कली सुन के देवता सेल्‍तेक्‍म। 32 मो हना यो गे मेको आन पाप क्‍याम्‍दीन, दे पुंइनुङ। मक्‍याम्‍ताक्‍नी हना, इन ब्रेक्‍शो किताब रे आं नें क्‍याम्‍दीने” दें‍त। भजन संग्रह ६९:२९; लूका १०:२०; रोमी ९:३ 33 मिनु परमप्रभु यावेमी मोसा कली “सुमी आं देंशो मटिथु पाप पाइबा, मेको आ नें आं ब्रेक्‍शो किताब रे क्‍याम्‍नुङ। 34 तन्‍न मुल लावो। मेको मुर आन कली आं देंशो रागी लाइक्‍मी। नेनो, आं स्‍वर्ग ङा गेय पाइब इ ङोंइङोंइती सोइक्‍नुङ। तन्‍न काबु मेको आन कली पाप पशो आ पर्बम सजाइ गेनुङ” दें‍त। प्रस्‍थान ३३:२,१४; गन्‍ती १४:२७-३० 35 मिनु परमप्रभु यावेमी इस्राएल ङा मुर आन कली बेक्‍तीक रोइ पपाइक्‍तु। मारदे हना मेकोपुकीमी हारून कली मेको सुन के बाछा सेल्‍पाइश्‍शो बाक्‍तेक्‍म।

<- प्रस्‍थान 31प्रस्‍थान 33 ->