1 मिनु परमप्रभु यावेमी मोसा कली “गे फाराओ कली आं चिन्‍डपुकी कोंइचा कली ग्रुम्‍थ लसे। मारदे हना गो मेको नु आ गेय पाइब आन कली काइ मटीब दुम्‍पाइक्‍ता। 2 मिनु गे इ चच युइ आन कली ‘गो इजीप्‍त ङा मुर आन कली मार मार पङा’ मेको शेंदो। गो मोदेंशो चिन्‍ड कोंइब बाक्‍नुङ। ‘गो परमप्रभु यावे नङ’ दे नेल्‍लेमी तुइक्‍तमेक्‍ल” दें‍त। प्रस्‍थान ६:२-८ 3 मिनु मोसा नु हारून फाराओ आ बाक्‍तीके जाक्‍दीश्‍शा, मेको कली “हिब्रू आंइ परमप्रभु यावे, हिब्रू मुर आन परमप्रभुमी इन कली ‘गेना सम्‍म गे आं ङोंइती ठेयब लेश्‍शा बाक्‍नेवे? आं मुर आन कली आं कली चढ़ेथ लचा गेवो। प्रस्‍थान ५:३ 4 नेनो, गे आं मुर आन कली लचा मगेनेवे हना, दीसा इ रागीम शुश सल्‍हा माले जाक्‍पाइक्‍नुङ। 5 मेकोपुकीमी रागी मतचा ङा पा सुम्‍नीम। मिनु मुप्‍स रे पा गिग खाइ मार मार लीशो बाक्‍मा, मेको नेल्‍ल नेक्‍नीम। रवा आन सफा यो नेल्‍ल नेक्‍नीम। 6 मिनु मेकोपुकी इ खिं, इ दरवार ङा गेय पाइब आन खिं नु नेल्‍ल इजीप्‍त ङा मुर आन खिं खिंम ओव़शा ब्रीनीम। इ किकी पिपीम मोदेंशो गेनायो मतामे’ दे परमप्रभुमी इन कली देंत” दे मोसामी दें‍त। मिनु मोसा फो ग्रूशा गाक्‍त। 7 मिनु फाराओ आ दरवार ङा गेय पाइबपुकीमी फाराओ कली “मेको मुरुम आंइ कली गेना सम्‍म श्‍येत गेबा? मेको मुर आन कली परमप्रभु यावे, आन परमप्रभु कली चढ़ेचा गेने। इजीप्‍त रागी मुल थुम्‍साक्‍व, दे मतुइक्‍नीनी?” देंमा बाक्‍त। 8 मिनु मेकोपुकीमी मोसा नु हारून आस कली फाराओ आ बाक्‍तीके लेश्‍शा चाक्‍तेक्‍म। मिनु फाराओमी मेको आस कली “गे लने। परमप्रभु यावे, इन परमप्रभु कली गेय पने। सु सु लाइक्‍नीनी?” दे हिल्‍लो पाप्‍तु।

9 मिनु मोसामी “परमप्रभु यावे आ चाड मानेचा कली गो तमी तौ, खाल्‍पी खाल्‍पा, बी ब्‍यफ नु क्‍यारश भेडा नेल्‍ल लाइश्‍शा, लचा माल्‍नीकी” दें‍त। प्रस्‍थान ५:१ 10 मिनु फाराओमी मेको आस कली “इन परमप्रभु यावे गे नु बाक्‍शो खोदेंशो पा गो इन कली नु इन आल नु लचा मगेनुङ। गे मरिम्‍शो पचा माल्‍नीनी, दे आंमा तुइक्‍नीसी। 11 मोदेंशो मदुम्‍ब। वोंइश मुरपुकी ला परमप्रभु यावे कली चढ़ेथ लने। मारदे हना एकोन इन माल्‍शो बाक्‍ब” दे हुइक्‍ताक्‍व। मिनु फाराओ आ ङोंइती रे खेरतु।

12 मिनु परमप्रभु यावेमी मोसा कली “सल्‍हा माले ग्रूपाइक्‍चा कली इ गुइ इजीप्‍त रागी तार दिंदो। मेकोपुकीम रागीमी मार मार गिग खाइपुकी मुप्‍सीम हेंशो बाक्‍मा, मेको ब्‍वाइनीमी” दें‍त। प्रस्‍थान ९:३२ 13 मिनु मोसामी आ कोक्‍के इजीप्‍त रागी तार दिंताक्‍व। मेको नाक्‍त रे आ दीसा सुनी सम्‍म परमप्रभु यावेमी पूर्ब रे फश पपाइक्‍तु। मिनु सुनी नां सोव़मेनु, पूर्ब रे पिशो फशेमी सल्‍हापुकी चाक्‍तु। योएल १:२-१२; योएल २:१-११ 14 मिनु सल्‍हा मालेमी इजीप्‍त रागी नेल्‍ल सुम्‍तेक्‍म। ङोंइती रे मोदेंशो शुश सल्‍हा माले गेनायो मबाक्‍शो बाक्‍मा बाक्‍त। मिनु नोले यो मोदेंशो गेनायो मदुम्‍माक्‍त। 15 मेको शुश सल्‍हा माले बेरमानु, नाक्‍ती यो नाक्‍दो खोदेंशो पा छिङछिङ दुम्‍त। मेको सल्‍हा मालेमी मुप्‍स रे लीशो रू ङा वाशो नु रवा ङा फल नेल्‍ल नेक्‍तेक्‍म। मार मार गिग बाक्‍मा, मारेइ महेंदेम। इजीप्‍त रागी ङा रवा नु गिग खाइ नेल्‍ल नेक्‍तेक्‍म।

16 मिनु फाराओमी रीब पा मोसा नु हारून आस कली ब्रेप्‍पाइक्‍तु। मिनु मेकोमी “गो परमप्रभु यावे, इन परमप्रभु आ ङोंइती पाप पाता। मिनु इस कली यो मरिम्‍शो पाता। प्रस्‍थान ९:२७ 17 मुल खेयप का ला आं कली माफ गेयीसी, दे पुंइनुङ। मिनु आं पर्बम परमप्रभु यावे, इन परमप्रभु कली पुनीस। सल्‍हा माले खेरशा, अन्‍काल रे मबेक्‍पाइक्‍चा नम, दे पुनीस” दे मोसा नु हारून आस कली माइक्‍तीम्‍सी। प्रस्‍थान ८:४ 18 मो देंम नोले मोसा फाराओ आ ङोंइती रे लशा, परमप्रभु यावे कली पुंइतु। 19 मिनु परमप्रभु यावेमी नां पेरतीक रागी रे ठेयब फश गिवार सोइक्‍ताक्‍व। मेको फश गिवारमी सल्‍हा माले आन कली हुरशा, लल समुन्‍द्रम ताइक्‍ताक्‍व। मिनु मोपा इजीप्‍त रागीम सल्‍हा माले काइ मलीम। 20 तन्‍न परमप्रभु यावेमी फाराओ कली मबिप्‍पाइक्‍चा कली काइ मटीब दुम्‍पाइक्‍तु। मोपतीके मेकोमी इस्राएली आन कली लचा मगेव। प्रस्‍थान ४:२१

21 मिनु परमप्रभु यावेमी मोसा कली “इ गुइ सरीङ गे पोक्‍को। मो पवीनु, इजीप्‍त रागीम हिंचा ङा पा छिङछिङ दुम्‍ब” दे माइक्‍तु। 22 मिनु मोसामी आ गुइ सरीङ गे पोक्‍तु। मिनु इजीप्‍त रागीमी नाक्‍त सां सम्‍म शुश छिङछिङ दुम्‍त। मारेइ मतांइस। 23 मिनु मेकोपुकी मतमुथु, आन बाक्‍तीक रे बोक्‍ने मचबेम। तन्‍न इस्राएली आन बाक्‍तीकेमी चहिं छेङछेङ बाक्‍त।

24 मिनु फाराओमी मोसा कली ब्रेश्‍शा “लने, परमप्रभु यावे कली गेय पने। इन आल नु मीश आन कली यो लाइक्‍ने चाप्‍नीनी। इन बी ब्‍यफ नु क्‍यारश भेडा चहिं मेकेरेन बाक्‍मल” दें‍त। प्रस्‍थान १०:१० 25 मोसामी चहिं “आंइ चढ़ेतीक नु चोशा चढ़ेतीक बस्‍तु भाव नेल्‍ल लाइक्‍चा माल्‍नीकी। मेको ला परमप्रभु यावे, आंइ परमप्रभु कली चढ़ेने चाप्‍नीकी। 26 गोपुकी आंइ बी ब्‍यफ, क्‍यारश भेडा नेल्‍ल लाइश्‍शा, लचा माल्‍नीकी। का यो मप्रोंइथु लाइक्‍चा माल्‍नीकी। परमप्रभु यावे, आंइ परमप्रभु कली मार चढ़ेचा माल्‍नीकी मुल मजाक्‍दीश्‍शो सम्‍म मतुइक्‍नीकी” दे फाराओ कली माइक्‍तु।

27 परमप्रभु यावेमी चहिं फाराओ कली काइ मटीब दुम्‍पाइक्‍तु। मोपतीके फाराओमी इस्राएली आन कली लचा मगेव। प्रस्‍थान ४:२१ 28 मिनु फाराओमी मोसा कली “मुल एकेर रे लावो। आं कली ग्रुम्‍थ मपिवो। गे लेंशा आं कली ग्रुम्‍थ पिते हना, गो इ कली साइक्‍नन” देंत। 29 मिनु मोसामी “दुम्‍ब, गो इन कली लेंशा ग्रुम्‍थ मपीनुङ” दें‍त।

<- प्रस्‍थान 9प्रस्‍थान 11 ->