1 मिनु मोसामी “गो मुलाक्‍त इन कली परमप्रभु आ शेंशो नेल्‍ल माइक्‍तन्‍नी। गेपुकीमी मेको होस पा पचा माल्‍नीनी। मो पाइतीनी हना, गेपुकी ब्रोंइचा ताइनीनी, सोशा बोशा शुश दुम्‍नीनी नु परमप्रभु यावेमी इन किकी पिपी आन कली ‘मेको गेनुङ’ दे कसम जशो रागी ओव़शा इन के सेल्‍शा बाक्‍चा ताइनीनी। 2 मिनु परमप्रभु यावे, इन परमप्रभुमी इन कली ४० बर्स सम्‍म गोरशो रागीमी बाक्‍पाइक्‍तु। इन कली मारदे मोदेंशो पाप्‍तु देंशा हना, इन कली ब्रेम्‍पाइक्‍चा, इन थुं नाक्‍चा नु गे इन नेल्‍ल थुंमी आ शेंशो पाइनीनी देय मपाइनीनी, दे तुइक्‍चा कली इन कली मेको ४० बर्स सम्‍म मेकेर गाक्‍पाइक्‍तु। ब्‍यवस्‍था १३:४; उत्‍पत्ती २२:१; प्रस्‍थान १६:४; प्रस्‍थान २०:२०; न्‍यायाधीस २:२२ 3 मिनु मेकोमी इन कली ब्रेम्‍पाइक्‍चा, दे शोव़लु बेक्‍पाइक्‍तु। मिनु मेकोमी इन किकी पिपी कली इन मतुइश्‍शो मन्‍ना जपाइक्‍तु। मारदे इन कली मन्‍ना जपाइक्‍तु देंशा हना, मुरुम जचा थोव़क जशा ला मब्रोंइनीम, तन्‍न परमप्रभु यावे आ लोव़ रे ब्रोंइनीम, दे तुइक्‍पाइक्‍चा कली मन्‍ना जपाइक्‍तु। प्रस्‍थान १६:१३-१५; मत्ती ४:४ 4 मेको ४० बर्स सम्‍म इन फेक्‍शो वा मजे। इन खोइल महोम्‍म। ब्‍यवस्‍था २९:४ 5 मिनु मुरपुकीमी दोदेंशो पा आन तौ आन कली शेंचा, दे सजाइ गेनीमी, मोदेंशो पा परमप्रभु यावे, इन परमप्रभुमी इन कली शेंचा, दे सजाइ गेप्‍तु। मेको तुइक्‍चा माल्‍नीनी। यसैया २८:२६; येरमीया ३०:११; येरमीया ४६:२८ 6 मिनु गेपुकीमी परमप्रभु यावे, इन परमप्रभु आ शेंशो पना पन बाक्‍कीन। परमप्रभु आ लां गाक्‍शा, मेको कली मान पा हिनीन। 7 परमप्रभु यावे, इन परमप्रभुमी इन कली रिम्‍शो रागी लाइक्‍ब। मेकेर खोला, दिंम नु पहाड रे बुक्‍शो ब्‍वाक्‍कु नु दोम्‍ली बाक्‍नीम। 8 मेको रागीम चेरब, क्‍योव़ज, अङगुर बोट, फोव़शी रवा, दारीम बोट, तेल रवा नु खुदो बाक्‍ब। 9 मेको रागीम गे काइ श्‍येत मजथु, मारेइमी खांचो मदुम्‍नीनी। मेको रागी ङा फुल्‍लुमी फलाम बाक्‍ब। मेको आ पहाड रे गे तांबा ग्रुंइनीनी। 10 मिनु गेपुकीमी मरूनी सम्‍म जशा तूशा, इन कली गेशो रिम्‍शो रागी आ पर्बम परमप्रभु यावे, इन परमप्रभु कली ठेयब सेल्‍चा माल्‍नीनी।

11 मिनु गे परमप्रभु यावे, इन परमप्रभु कली मप्रेंदीन। मिनु मुलाक्‍त गो इन कली देंशो आ शेंशो, आ निसाफ पतीके लोव़ नु आ फुल्‍लुम मुशा ब्रेक्‍शो लोव़ यो मप्रेंचा, दे होस पा बाक्‍कीन। 12 मिनु गेपुकी जशा तूशा, रूशा, रिम्‍शो खिं सेल्‍शा बाक्‍नीनी, 13 मिनु इन बी ब्‍यफ नु क्‍यारश भेडा शुश दुम्‍शा, इन सुन चांदी नु इन मारेइ मारेइ शुश दुम्‍मेनु, 14 गेपुकी ठेयब लेश्‍शा, वाइलीम वाइल दुम्‍तीक इजीप्‍त रे ग्रुंइब परमप्रभु यावे, इन परमप्रभु कली मप्रेंचा, दे होस पा बाक्‍कीन। 15 मेकोमी इन कली ठेयब हिंचा ङा गोरशो रागीम बाक्‍पाइक्‍तु। मेकेर बीस पाइश्‍शो बुस्‍स नु बिच्‍छी बाक्‍तेक्‍म। मेकोमी इन कली सोव़शो रागीम हिरताक्‍व। मिनु इन पर्बम ठेयब फुल्‍लु रे ब्‍वाक्‍कु बुक्‍पाइक्‍तु। गन्‍ती २१:६; प्रस्‍थान १७:६ 16 मिनु मेकोमी इन कली गोरशो रागीम मन्‍ना जचा गेप्‍तु। मेको इन किकी पिपी आन मतुइश्‍शो जचा थोव़क बाक्‍त। मारदे मोदेंशो पाप्‍तु देंशा हना, मेको नेल्‍ल इन कली ब्रेम्‍पाइक्‍चा, नाक्‍चा नु नोले रिम्‍शो पचा कली पाप्‍तु। 17 मिनु गे नोले इन थुंमी ‘गो आंम आंइ सक्तिम एको शोंप चेम्‍तक’ दे मदेनीन। 18 तन्‍न परमप्रभु यावे, इन परमप्रभुमी आंइ कली शोंप चेम्‍तीक सक्ति गेप्‍तु, दे मिम्‍तीन। मेकोमी इन किकी पिपी नु कसम जशा पशो कबल गेना हना यो लीपाइक्‍ब। मोदेंशो पा मुलाक्‍त बाक्‍ब, दे तुइक्‍नीनी। ब्‍यवस्‍था ४:३१ 19 मिनु गे परमप्रभु यावे, इन परमप्रभु कली प्रेंशा, देवी देवता आन नोले खोइक्‍तीनी, मेको आन कली पूजा पाइतीनी नु मेको आन ङोंइती बाप्‍तीनी हना, गो इन कली ‘गेपुकी थमा पा साइक्‍चा पुंइसीनीनी’ दे मुलाक्‍ती लोव़ का पाइनुङ। 20 मिनु परमप्रभु यावेमी इन ङोंइती रागी रागी ङा मुर आन कली खतम सेल्‍शो खोदेंशो पा, गेपुकीमी आ लोव़ मनेंथु, मटीतीनी हना, परमप्रभु यावे, इन परमप्रभुमी इन कली यो खतम सेल्‍ब” देंत।

<- ब्‍यवस्‍था 7ब्‍यवस्‍था 9 ->