1 गेपुकी ख्रीस्‍त नु सेंसीशो बाक्‍तीनी हना, स्‍वर्गमी बाक्‍ब दोपा बाक्‍मा, मेको मालीन। मेकेर ख्रीस्‍त परमप्रभु यावे आ ग्‍युरा गे निश्‍शो बाक्‍ब। कलस्‍सी २:१२ 2 इन थुंमी स्‍वर्गम बाक्‍ब कली मिम्‍तीन। रागी ङा थोव़क ममिम्‍तीन। मत्ती ६:३३ 3 मारदे हना गे बेक्‍तीनी। इन थुं ख्रीस्‍त नु परमप्रभु यावेमी ख्रुइश्‍शा वोइश्‍शो बाक्‍ब। रोमी ६:२ 4 इं कली ब्रोंइचा गेब ख्रीस्‍त ग्रूत हना, गे यो मेको नु परमप्रभु यावे आ छेङछेङ ङा बाक्‍तीकेमी ग्रूनीनी। १कोरिन्‍थी १५:४३ 5 मोपतीके इन आगामी बाक्‍शो माइत रागी ङा थुं कली सतीन। रागी ङा मुर आन थुंमी मार बाक्‍ब देंशा हना, हेंथे पचा, मार मार ग्रांग्रा दिचा ङा गेय पचा, आंम दला दाक्‍स पचा, मरिम्‍शो मिम्‍तीके नु शिंम दुम्‍तीके बाक्‍ब। शिंम दुम्‍तीके चहिं मूर्ति पूजा पचा खोदेंशो बाक्‍ब। एफिसी ५:३ 6 परमप्रभु यावे मोदेंशो पाइब मटीब मुर आन पर्बम शुश गाइक्‍ब। एफिसी ५:६ 7 गेपुकी यो ङोंइती मोदेंशो पना पन बाक्‍तीनी। 8 मुल चहिं मेको नेल्‍ल ताइक्‍तीन। गाइक्‍चा, चुरचा, मरिम्‍शो पचा, अरु आन पर्बम मरिम्‍शो लोव़ पचा, ओल ओल लोव़ पचा ताइक्‍तीने। एफिसी ४:२९,३१ 9 गेपुकी जोल मपमुने। मारदे हना, गे ङोंइती ङा पतीक नेल्‍ल ताइक्‍ताक्‍नी। एफिसी ४:२२-२५ 10 रिम्‍शो पाइब नक मुर दुमीन। परमप्रभु यावेमी इन थुं आ थुं खोदेंशो पा नक सेल्‍ना सेल्‍न बाक्‍ब। मारदे मो पाइब देंशा हना, आंम कली नेल्‍ल तुइक्‍पाइक्‍चा कली मोदेंशो पाइब। एफिसी ४:२४; उत्‍पत्ती १:२६-२७ 11 मुल रे ग्रीक नु यहूदी ख्रोइक्‍तीक चिनु ख्रोइक्‍पांइसीशो नु मख्रोइक्‍पांइसीशो मुरपुकी उइक्‍थ उइक्‍थ दुम्‍तेक्‍म। रागी रागी ङा मरुप्‍चा ङा लोव़ पाइबपुकी, ब्‍वाकी मुरपुकी, वाइलीम वाइलपुकी नु ठेयब मुर उइक्‍थ उइक्‍थ दुम्‍तेक्‍म। ख्रीस्‍त नेल्‍ल क्‍येङा ठेयब बाक्‍ब। मिनु नेल्‍ल आन आगामी बाक्‍ब। गलाती ३:२८

12 गेपुकी परमप्रभु यावे आ योव़शो, आंम आ दाक्‍शो मुर दुम्‍तीनी। मोपतीके शिशी पचा, रिम्‍शो पमुचा, ब्रेम्‍शो थुं पाइश्‍शो, ठेयब मलेत्‍थु टीब नु फाल्‍ब मुर दुमीने। 13 का निक्‍शीमी दोस गेचा पुंइसाक्‍म हना, फाल्‍मुशा, माफ गेमुशा बाक्‍कीन। प्रभुमी दोपा इन कली माफ गेवा, मोपा माफ गेमुने। एफिसी ४:२; मत्ती ६:१४; एफिसी ४:३२ 14 मेको नेल्‍ल पा इन नेल्‍ल क्‍येङा ठेयब गेय दाक्‍मुचा बाक्‍ब। मारदे हना मेकोम नेल्‍ल इन कली थुं का ङा सेल्‍ब। रोमी १३:८,१० 15 ख्रीस्‍त आ थुं इन थुंम नाइश्‍शा हुकुम पचा गेने। गेपुकी रां का ङा दुम्‍चा कली योव़सीशो बाक्‍नीनी। गेपुकीमी प्रभु कली “गे रिम्‍शो पाइब बाक्‍नीनी” दे शुश देनीन। फिलिप्‍पी ४:७; १कोरिन्‍थी १२:१३,२७; एफिसी ४:३-४ 16 ख्रीस्‍त आ लोव़ खोत ब्रेक्‍शा वोतीन। गेपुकीमी शुश तुइश्‍शा, शेंमुशा थुं बारपमुने। परमप्रभु यावे आ लोव़ ङा कुम्‍सो, परमप्रभु यावे कली “गे ठेयब बाक्‍नीनी” दे पशो कुम्‍सो नु परमप्रभु यावे आ सोक्‍तीमी इन कली शेंशो कुम्‍सोमी “गे रिम्‍शो पाइब बाक्‍नीनी” दे इन थुंमी परमप्रभु यावे कली कुम्‍सो पने। एफिसी ५:१९ 17 मार मार लोव़पुकी, गेयपुकी, मारेइ मारेइ पनीनु, नेल्‍ल प्रभु येसु आ नेंमी पने। इं आफ परमप्रभु यावे कली “गे रिम्‍शो पाइतीनी” दे येसु आ नेंमी देनीन। १कोरिन्‍थी १०:३१

18 गे मीश मुरपुकी, आंम वोंइश आ देंशो लोव़ टिने। मो पाइतीनी हना, प्रभु नु गारशो मुर दुम्‍नीनी। १पत्रुस ३:७

19 गे वोंइश मुरपुकी, आंम मीश कली दाक्‍शा, काइ श्‍येत मगेने।

20 गे आलपुकी, इन आंम आफ कली नेल्‍लेम टिने। मो पाइतीनी हना, प्रभु ग्‍येरब।

21 गे आल आन आफपुकी यो, इन आल आन कली रिम्‍शो पने। काइ श्‍येत मगेने। श्‍येत गेतीनी हना, आन थुं जिक्‍ब।

22 वाइलीम वाइलपुकी, इन ठेयब मुरुमी मार मार देंनीमी, मेको नेल्‍ल टिचा माल्‍नीनी। इन ठेयब मुरुमी कोव़तेक्‍म हना यो, मकोव़तेक्‍म हना यो, थुं का पशा, प्रभु कली मान पा हिनीन। 23 इन गेय मार बाक्‍त हना यो, इन थुं नेल्‍लेमी मुर आन कली ममाइ, प्रभु कली गेय पने। 24 गे प्रभु आ गुइ रे इनाम ताइब बाक्‍नीनी, दे तुइक्‍नीनी। मेकोन मिम्‍ना मिम्‍न गेय पने। गेपुकी प्रभु ख्रीस्‍त कली गेय पाइब बाक्‍नीनी। 25 मरिम्‍शो पाइबपुकीम मरिम्‍शो पतीके कुल मकोव़थु निसाफ पचा पुंइसीनीम। रोमी २:११

<- कलस्‍सी 2कलस्‍सी 4 ->