1 मिनु पावल मेको आन ङोंइती राप्‍शा, आन कली मिक्‍च मयाक्‍थु कोव़शा, “आं लोक्‍बपुकी, गो साइ रे मुल सम्‍म आं तुइश्‍शो जोक्‍शो रिम्‍शो ला पाता। एको लोव़ थमा बाक्‍ब, दे परमप्रभुमी तुइक्‍ब” देंमेनु, प्रेरित २४:१६ 2 हनानीया माइश्‍शो ठेयब चढ़ेबमी पावल आ नेक्‍था बाक्‍ब आन कली “मेरे आ शोव़ रोप्‍तीने” देंमाक्‍त। 3 मिनु पावलमी “परमप्रभु यावेमी इ कली कका इ शोव़ रोप्‍तेक्‍ल। ब्रेत्‍चशो गारोमी, बुलु ब्रुइश्‍शा, बुबु पा तांइसीशो खोदेंशो नवे। अरेशो लोव़मी दोदेंशो पा ब्रेक्‍शो बाक्‍मे, मोदेंशो पा आं कली निसाफ पचा माल्‍शो नवे। गे अरेशो लोव़ क्‍येङा दूली पा आं कली तुप्‍चा माल्‍ब, देंते” देंमाक्‍त। मत्ती २३:२७ 4 मिनु एर ओंथ बाक्‍बपुकीमी पावल कली “परमप्रभु यावेमी योव़शा वोइश्‍शो ठेयब चढ़ेब कली मोदेंशो लोव़ पचा दुम्‍बा?” देंमा बाक्‍त। 5 पावलमी “मेको मोदेंशो ठेयब चढ़ेब, दे मतुइक्‍तु, आं लोक्‍बपुकी। तुइश्‍शो नङ हना, मोदेंशो लोव़ मदेंङ वा। मारदे हना परमप्रभु यावे आ ब्रेक्‍पाइश्‍शो लोव़मी ‘इन कली अधिकार पचा, दे वोइश्‍शो आन कली मरिम्‍शो लोव़ मपचा’ दे ब्रेक्‍शो बाक्‍ब” देंमाक्‍त। प्रस्‍थान २२:२८

6 मिनु पावलमी कछडीम बाक्‍बपुकी का निक्‍शी सदुकी, का निक्‍शी फरिसी बाक्‍नीम, दे तुइश्‍शा, ठेयब सेंदा पा “आं लोक्‍बपुकी, गो फरिसी नङ। गो फरिसी आ तौ नङ। बेक्‍शो रे सेंसीशा ब्रोंइचा तांइसीब, दे थमा सुइश्‍शो लोव़मी आं कली दोस गेशा, मुददा कोप्‍ताक्‍यीमी” देंमाक्‍त। प्रेरित २२:३; प्रेरित २६:५; गलाती १:१४ 7 मो देंमेनु, फरिसी नु सदुकी ब्राशा, जिचा गोव़मे बाक्‍त। 8 मारदे हना सदुकीपुकीमी बेक्‍शो रे मसेंसीनीम, स्‍वर्ग ङा गेय पाइबपुकी मबाक्‍नीम नु परमप्रभु यावे आ सोक्‍त मबाक्‍ब देंनीम। तन्‍न फरिसीपुकीमी चहिं मेको नेल्‍ल बाक्‍ब देंनीम। मत्ती २२:२३ 9 मोपतीके आन जिचा बारना बारन लशा, शुश रेयके पामे बाक्‍त। मिनु फरिसी ङा शेंब का निक्‍शीमी बोक्‍शा “एको मुर के मारेइ दोस मबाक्‍ब, दे मिम्‍नीकी। मुर आ मिक्‍चीम मतांइसीब का नु लोव़ पवा कों? परमप्रभु यावे आ स्‍वर्ग ङा गेय पाइब नु लोव़ पवा कों? मोदेंशो यो दुम्‍ने चाप्‍ब” देंमा बाक्‍त। प्रेरित २५:२५ 10 मिनु आन जिचा बारना बारन लशा, तुम्‍मुचा गोव़मे बाक्‍त। मिनु लडाइ पाइब आन ठेयब मुर “पावल कली साइक्‍नीमी कोर में” दे हिंशा, सिपाही आन कली ब्रेश्‍शा, पावल कली ग्रुंइशा, सिपाही आन बाक्‍तीके लेश्‍शा चाक्‍पदा बाक्‍त। 11 मिनु मेको नाक्‍दो प्रभुमी पावल आ नेक्‍था जाक्‍शा “दोपा यरूसलेममी आं पर्बम शेंदीमी, मोपा रोम सहरमी यो आं पर्बम शेंशा सांकछी दुम्‍नेवे। मोपतीके महिंथु, ठेयब थुं पा बाक्‍को” देंमाक्‍त। प्रेरित १:८; प्रेरित २५:११-१२; प्रेरित २७:२३-२४

12 मिनु आ दीसा सुनी यहूदीपुकीमी “पावल कली साइश्‍शो मतया सम्‍म मारेइ मजय, मतूय” दे कसम जशा, पावल कली साइक्‍चा सल्‍ला पामे बाक्‍त। 13 मोदेंशो पा कसम जाइब ४० जना क्‍येङा शुश बाक्‍मा बाक्‍त। 14 मेकोपुकीमी ठेयब चढ़ेब नु यहूदी आन जोक्‍ब तुइक्‍ब खाल्‍पा आन कली ग्रुम्‍थ लशा “पावल कली साइश्‍शो मतका सम्‍म गो मारेइ मजाइनीकी मतूनीकी, दे कसम जाइतक। 15 मोपतीके गे ठेयब मुर नेल्‍लेमी गारशा, लडाइ पाइब आन ठेयब मुर कली ‘पावल कली मारेइ मारेइ हिल्‍लो पाइनीकी। मिनु एकेर सोइक्‍तीन’ दे मतीन। मिनु एर लां रे ग्रुंइशा पिदमेनु, लां उइ साइक्‍नीकी” देंमा बाक्‍त।

16 मेको लोव़ पावल आ भानीजमी नेंना बाक्‍त। मिनु सिपाही बाक्‍तीके लशा, पावल कली माल्‍शा ग्रुम्‍शा तुइक्‍पदा बाक्‍त। 17 मिनु पावलमी कप्‍तान का ब्रेश्‍शा “एको ठिटा कली लडाइ पाइब आन ठेयब मुर नु ग्रुम्‍पतीने। मारदे हना लोव़ का निक्‍शी तुइक्‍पाइक्‍चा माल्‍ताक्‍व” देंमाक्‍त। 18 मिनु कप्‍तानमी ठिटा कली लडाइ पाइब आन ठेयब मुर आ बाक्‍तीके चाक्‍दीश्‍शा “हजुर, चोक्‍सीशो पावलमी आं कली ब्रेश्‍शा, एको ठिटा कली इन बाक्‍तीके चाक्‍दीत्‍चा। मारदे हना इन कली लोव़ का निक्‍शी तुइक्‍पाइक्‍चा माल्‍ताक्‍व देंशा, हजुर, इन बाक्‍तीक चोव़थ सोइक्‍ताक्‍यी” देंमाक्‍त। 19 मिनु लडाइ पाइब आन ठेयब मुरुमी पावल आ भानीज कली गुइमी ग्‍याइश्‍शा, सुइ मबाक्‍तीक कोठामी लाइश्‍शा “मार देंचा दाक्‍नेवे, लो देनो” दे हिल्‍लो पवानु, 20 पावल आ भानीजमी “हजुर, यहूदीपुकीमी गारशा, पावल कली ग्रुंइशा, आंइ बाक्‍तीके सोइक्‍तीने। लोव़ का निक्‍शी हिल्‍लो पचा माल्‍ताक्‍व देंखु पा इन कली पुंइनीम। 21 मेको आन लोव़ मनेंचा। मारदे हना ४० जना क्‍येङा शुश मुरुमी पावल कली साइक्‍चा, दे लांम बाप्‍शा बाक्‍नीम। मेकोपुकीमी ‘पावल कली साइश्‍शो मतका सम्‍म मारेइ मजाइनीकी, मतूनीकी’ दे कसम जने थुम्‍तेक्‍म। मिनु हजुरमी पावल कली गेना सोइक्‍बा, तेको लां रे सोइक्‍बा, दे योव़की पा बाक्‍शो बाक्नीम” देंमाक्‍त। 22 मिनु लडाइ पाइब आन ठेयब मुर “एको लोव़ सुइ कली मशेंदो” देंशा सोइक्‍ता बाक्‍त।

23 मिनु लडाइ पाइब आन ठेयब मुरुमी कप्‍तान निक्‍शी आस कली ब्रेश्‍शा “एको चोक्‍सीशो पावल कली सिजरिया सहर चोव़दीचा माल्‍ताक्‍व। मोपतीके गे निक्‍शीमी आपो नाक्‍दो ९ बजे सहे निक्‍शी सिपाही, ७० जना शारा ङोइक्‍ब नु सहे निक्‍शी भाला शेयब आन कली साशा वोतीसे। 24 पावल कली यो शारा का साशा वोतीसे। लांमी पावल कली सुइमी मारेइ पाइक्‍ने मचाप्‍मेक्‍ल, दे रिम्‍शो पा हुकुम पाइब फेलीक्‍स आ ङोंइती चाक्‍दीत्‍तीसे” दे माइक्‍सी बाक्‍त। 25 मिनु हुकुम पाइब कली चिठी ब्रेक्‍ता बाक्‍त। 26 मेको चिठीमी “हुकुम पाइब फेलीक्‍स हजुर, गो क्‍लौदीयस लिसीयस आं के नमस्‍ते। हजुर, आं के लोव़ का निक्‍शी नेनीने। 27 एको मुर कली यहूदीपुकीमी ग्‍याइश्‍शा, हेरर हेररा साइक्‍तेक्‍म। साइक्‍चाम्‍तेक्‍म देंशो नेंशा, गो सिपाही आन कली लाइश्‍शा, आन गुइ रे प्रोंइता। रोमी नागरिक बाक्‍माक्‍त, दे यो तुइक्‍ताक्‍ङ। प्रेरित २१:३३; प्रेरित २२:२५ 28 एको के मार दोस बाक्‍मे? दे हिल्‍लो पथ यहूदी आन कछडमी लाइक्‍पाइक्‍ता। प्रेरित २२:३० 29 हिल्‍लो हिक्‍सी पामेनु, यहूदी आन अरेतीक लोव़ आ पर्बम दोस गेमे बाक्‍त। जेल्‍खानमी चोक्‍चा, साइक्‍चा पुंइसीचा ङा गेय मारेइ मपशो बाक्‍त, दे रुप्‍ता। 30 मिनु यहूदीपुकीमी ‘मेको कली साइक्‍चा, दे गारशो बाक्‍नीम’ देंशो नेंशा, हजुर, इन बाक्‍तीक सोइक्‍ताक्‍ङ। एको कली दोस गेब आन कली ‘सिजरिया ङा हुकुम पाइब आ बाक्‍तीक लने’ दे माइक्‍नुङमी” दे ब्रेक्‍ता बाक्‍त।

31 मिनु लडाइ पाइब आन ठेयब मुरुमी दोदेंशो देंमे, मोदेंशो पा कप्‍तान नु सिपाहीपुकीमी पावल कली लाइश्‍शा गाक्‍मा बाक्‍त। मिनु नाक्‍दो रे गाक्‍शा, एन्‍तीपात्रीसमी जाक्‍दीम्‍मा बाक्‍त। 32 मिनु आ दीसा खोइलीमी गाक्‍बपुकी यरूसलेम लेम्‍मा बाक्‍त। शारा ङोइक्‍बपुकीमी पावल कली सिजरिया चाक्‍दीत्‍मे बाक्‍त। 33 मिनु चाक्‍दीश्‍शा, पावल नु चिठी मेको हुकुम पाइब कली जिम्‍मा गेमे बाक्‍त। 34 मिनु मेकोमी चिठी पढेशा, पावल कली “इ खिं ते में? तेको रागी ङा नवे?” दे हिल्‍लो पवानु “सिलीसीया रागी ङा नङ, हजुर” देंमाक्‍त। प्रेरित २२:३ 35 मिनु हुकुम पाइबमी “लो मो हना इ कली दोस गेबपुकी जाक्‍मल। मिनु इ मुददा कोव़नुङ” देंशा हेरोद आ दरवारमी लाइश्‍शा, खाल पाइब आन दातेमी वोइक्‍पदा बाक्‍त।

<- प्रेरित 22प्रेरित 24 ->