4
बेक्चा सम्म थमा सुइक्चा मप्रोंइचा
1 गो इ कली ख्रीस्त येसु नु परमप्रभु यावे आस ङोंइती मार देंनुङ देंशा हना, येसु ख्रीस्त आ राज्य जाची ना बेक्शो नु ब्रोंइशो मुर आन कली निसाफ पाइब बाक्ब। मेको आ जाक्चा नु राज्य पचा मिम्शा
१पत्रुस ४:५ 2 “परमप्रभु यावे आ लोव़ पावो। नेंचा दाक्ताक्म हना यो, मदाक्ताक्म हना यो, शेंदीमी। मरिम्शो पाइब आन कली लोव़ पावो। मुर आन कली ‘ठीक पचा’ दे शेंदो। आन थुं बारपतो। नेल्ल आन कली फाल्शा, रिम्शो शेंदो।
प्रेरित २०:२०,३१ 3 मारदे हना इच्का नोले थमा शेंतीक नेंचा काइ मदाक्नीम। आंम दला दाक्स पा अर्को लोव़ कली नोफा दाइश्शा, आंम कली शेंबपुकी तेल्नीम।
१तोमोथी ४:- 4 मेना थमा शेंतीक प्रोंइशा, मुर आन सेल्शो कथा नेंनीम।
१तिमोथी ४:७; २थिस्सलोनिकी २:११ 5 गे चहिं मार पाप्तीवी हना यो, मिम्ना मिम्न गेय पावो, श्येत फलो, ग्येरपाइक्ब लोव़ शेंदो। इ कली गेशो गेय नेल्ल पावो” दे माइक्नन।
२तिमोथी २:३6 मारदे हना गो चढ़ेशो खोदेंशो दुम्शा, आं लची ना जाक्त। फिलिप्पी २:१७ 7 गो थमा सुइश्शा ग्राती। दाम पशो खोदेंशो पा ग्राती। थमा सुइक्चा मप्रोंइथु बाक्ती। १कोरिन्थी ९:२५; १तिमोथी ६:१२; प्रेरित २०:२४; फिलिप्पी ३:१४ 8 मुल रे ठीक पतीके ङा सिरपेच गुप्चा दे आं कली वोइश्शो बाक्त। प्रभु ठीक निसाफ पाइब बाक्ब। मेकोमी आं कली आ नाक्तीम सिरपेच गेब। आं कली ला ममाइ, सु सुमी आ जाक्शो दाक्नीमी, मेको आन कली यो गेब। २तिमोथी २:५; १पत्रुस ५:४; याकूब १:१२; प्रकाश २:१०; मत्ती २५:२१
पावल नु आ नु गेय पाइबपुकी
9 आं कली रीब पा ग्रुम्थ जाक्को।
२तिमोथी १:४ 10 मारदे हना डेमासमी रागी ङा गेय दाक्शा, आं कली प्रोंइती। मिनु थिस्सलोनिकी सहर लत। क्रेसेन्स गलातीया नु तीतस डाल्मातीया रागी लाम्ताक्स।
कलस्सी ४:७,१०,१४ 11 लूका ला गो नु बाक्ब। मर्कूस कली गे पिश्शा पिवो। मारदे हना मेको आं कली वारच पाइब बाक्ब।
प्रेरित १५:३७; कलस्सी ४:१० 12 तिखीकस कली एफिसस सहरम सोइक्ताक्ङ।
एफिसी ६:२१ 13 त्रोआस सहरमी कारपस आ खिंमी फेक्तीक वा का प्रोंइता। मेको चाक्को। किताब नु कागजपुकी यो चाक्मी।
14 अलेक्जन्डर तांबा तुप्तीलमी शुश श्येत गेती। प्रभुमी मेको आ गेय तशा, सजाइ गेब। १तिमोथी १:२० 15 गे यो मेको नु होस पा बाक्को। इं शेंतीके आ पर्बम शुश जिचा पोक्तु।
16 ङोंइती ङा आं मुददाम सुइमी आं कली वारच मपाम। नेल्लेमी प्रोंइतीमी। परमप्रभु यावेमी मेको आन कली सजाइ मगेवल। २तिमोथी १:१५ 17 तन्न प्रभु गो नु बाक्शा, अर्को रागी ङा मुर आन कली परमप्रभु यावे आ लोव़ नेल्ल शेंचा सक्ति गेती। मोपा आं कली गुप्स रे प्रोंइती। प्रेरित २३:११; प्रेरित २७:२३ 18 प्रभुमी आं कली आ स्वर्ग ङा राज्य लचा, दे नेल्ल श्येत रे प्रोंइब। मेको कली गेना हना यो मान पय। आमेन।
नोले ङा लोव़
19 प्रिस्कीला, अक्वीला नु ओनेसीफरस आ खिं ङा मुर नेल्ल आन कली “रिम्शो बाक्कीन” देनो।
प्रेरित १८:२; २तिमोथी १:१६ 20 इरास्तस कोरिन्थ सहरम बाक्ब। त्रोफीमस रोइ पवानु, गो मिलेटस सहरमी लाइश्शा वोइक्ता।
प्रेरित १९:२२; प्रेरित २०:४ 21 हिउंद क्येङा ङोंइती आं कली ग्रुम्थ रीब पा जाक्को। युबुलसमी इ कली “रिम्शो बाक्को” देंशो बाक्ब। पुडेन्स, लिनस, क्लौदीया नु थमा सुइक्ब लोक्ब नेल्लेमी यो मो देंतेक्म।
22 प्रभु गे नु बाक्ल। आ शिशी गे नु लील।
<- २ तिमोथी 3
