1 नोले ङा नाक्‍त हिंचा ङा श्‍येत दुम्‍ब। गे मेको तुइक्‍चा माल्‍नेवे। १तिमोथी ४:१ 2 मारदे हना मुरपुकीमी आंम कली ला दाक्‍नीम। क्‍येट कली शुश दाक्‍नीम। ठेयब लेश्‍शा, अरु नेल्‍ल आन कली दिप्‍नीम। मरिम्‍शो लोव़ पाइनीम। आम आफ कली मटिथु “गे रिम्‍शो पाइतीनी” गेनायो मदेंथु, पापम ग्रुम्‍शा बाक्‍नीम। 3 आंम खिं ङा मुर आन कली मदाक्‍नीम। ईख कुरनीम, मरिम्‍शो लोव़ पाइ‍नीम। आंम रां नु शोव़ चलेस मजोक्‍नीम। जिचा पोक्‍‍नीम। रिम्‍शो मारेइ मदाक्‍नीम। 4 मुर आन कली श्‍येतम ख्रुम्‍नीम। चुइश्‍शा गेय पाइनीम। “गो जोक्‍नुङ” दे बोरशा, मुर आन लोव़ मनेंनीम। आंम दला दाक्‍स ला पाइनीम। परमप्रभु यावे कली मदाक्‍नीम। 5 मोदेंशो मुरुमी परमप्रभु यावे कली मिम्‍शा दाक्‍चा देंखु पाइनीम। तन्‍न आन आगामी सक्ति मबाक्‍तीके कोंइनीम। मेकोपुकी नु ङोन बाक्‍को। मत्ती ७:१५-२१; तीतस १:१६ 6 मेको आन दातेमी का निक्‍शीमी आन दला दाक्‍स पा पापम ग्रुम्‍शो नु आंम कली चलेस मजोक्‍ब मीश मुर आन खिं ओव़शा, लोव़ नेंपाइक्‍नीम। 7 मेको मीश मुरपुकीमी सु आन लोव़ नेंतेक्‍म हना यो, थमा शेंतीक गेनायो रुम्‍ने मचाप्‍नीम। 8 दोपा यन्‍नस नु याम्‍ब्रेस माइश्‍शो मुर निक्‍शीमी मोसा कली “इ गेय ठीक मबाक्‍ब” देंसा, मोपा मेको मुरपुकीमी यो थमा शेंतीके कली “ठीक मबाक्‍ब” देंनीम। आन थुं मूर्ख गेयम ब्रीशो दुम्‍शा, थमा सुइक्‍तीके प्रोंइशो बाक्‍नीम। प्रस्‍थान ७:११,२२ 9 तन्‍न मोदेंशो दूली शेंबपुकीमी शुश गेय पचा मताइनीम। मारदे हना यन्‍नस नु यम्‍ब्रस आस कली खोदेंशो पा, मुरपुकीमी “गशो बाक्‍नीम” दे तुइक्‍नीम।

10 मिनु गे आं शेंतीके, आं गेय पतीके “मार पाइनुङ” दे आं मिम्‍तीके, आं थमा सुइक्‍तीके, आं फाल्‍तीके, आं दाक्‍तीके नु थमा सुइक्‍तीके मप्रोंइशो ताप्‍तीवी। 11 आं कली खेदा पशो, आं श्‍येत जशो यो ताप्‍तीवी। एन्‍टीओक, आइकोनीयम नु लिस्‍त्रा सहरमी गो दोदेंशो श्‍येत जङा, दोपा खेदा पशो नेल्‍ल फलु, मेको नेल्‍ल ताप्‍तीवी। तन्‍न प्रभुमी मेको नेल्‍ल रे प्रोंइती। प्रेरित १३:१३-१४:२२; भजन संग्रह ३४:२०

12 सु सु ख्रीस्‍त येसुमी परमप्रभु यावे कली मिम्‍शा, दाक्‍शा ब्रोंइनीमी, मेकोपुकी खेदा पचा पुंइसीनीम। मत्ती १६:२४; प्रेरित १४:२२; १थिस्‍सलोनिकी ३:३ 13 मरिम्‍शो नु ग्रांग्रा दिचा ङा मुरपुकीमी “मुर आन मिक्‍च सिल्‍नीक” दे मिम्‍तमेनु, ङोंइती ङा क्‍येङा मरिम्‍शो दुम्‍शा, आंमान आन मिक्‍च सिल्‍चा पुंइसीनीम। १तिमोथी ४:१

14 मिनु गे मार शेंसे, मेको “ठीक बाक्‍ब” दे थमा सुइश्‍शा, पना पन बाक्‍को। मारदे हना गे सु नु शेंसे मेको तुइक्‍नेवे। 15 गे आल रे ना परमप्रभु यावे आ लोव़ तुइश्‍शो बाक्‍नेवे। मेको लोव़मी ख्रीस्‍त येसु कली थमा सुइश्‍शा “दोपा पाप रे प्रोंइचा” दे इ कली शेंने चाप्‍ब। यूहन्‍ना ५:३९ 16 परमप्रभु यावेमी मेको लोव़ नेल्‍ल गेशो बाक्‍त। मेको शेंचा कली, हुइक्‍चा कली, रिम्‍शो सेल्‍चा कली नु थमा सुइक्‍तीक ठीक सेल्‍चा कली बाक्‍ब। २पत्रुस १:१९-२१ 17 परमप्रभु यावेमी आ मुरपुकीमी नेल्‍ल गेय रिम्‍शो पामेक्‍ल दे एको लोव़ तुइक्‍पाइश्‍शो बाक्‍त। १तिमोथी ६:११

<- २ तिमोथी 2२ तिमोथी 4 ->