8 मिनु आं दाक्शो लोक्बपुकी, प्रभु कली नाक्त का हजार का बर्स खोदेंशो बाक्ब। मिनु हजार का बर्स नाक्त का खोदेंशो बाक्ब। भजन संग्रह ९०:४ 9 प्रभुम आ देंशो लोव़ ठीक पा पाइब। तन्न का निक्शी मुरपुकीमी “प्रभुम आ देंशो मपाइब। नोले ला जाक्ब” देंनीम। तन्न प्रभुमी “सुइ जाम्शा मलमल। आं गे लेम्मल” दे रिम्ब। हबकुक २:३; १तिमोथी २:४ 10 प्रभु जाक्मेनु, खुइ जाक्शो खोदेंशो पा जाक्ब। मेना सरीङ ठेयब रेयके पा जाम्ब। मारेइ मारेइ ग्रोइश्शा नुप्नीम। रागी नु रागीम बाक्शो मारेइ मारेइ मीम खतम दुम्नीम। १थिस्सलोनिकी ५:२-३; मत्ती २४:२९; प्रकाश २०:११; यसैया २४:१९
11 मोदेंशो दुम्मेनु, नेल्ल मीम ग्रोइश्शा, मारेइ मलीब। मोपतीके गेपुकी परमप्रभु यावे कली थमा सुइश्शा, आ देंशो लोव़ टिशा, पाप रे ङोन बाक्शा, परमप्रभु आ नेक्था बाक्चा माल्नीनी। 12 गेपुकी परमप्रभु यावे आ नाक्त जाक्ब, दे रिम्शा नु गेना दुम्बा, दे मिम्स ङा मिम्स बाक्चा माल्नीनी। मारदे हना मेना सरीङ नेल्ल मीम ग्रोइश्शा नुप्ब। मार मार बाक्मे, मेको नेल्ल मीम ग्रोइश्शा नुप्नीम। 13 तन्न आ ङोंइती देंशो “नक सरीङ नु नक रागी सेल्नुङ। मेकेर नेल्ल रिम्शो नु ठीक ला पाइनीम” देंशो लोव़ रिम्नय। यसैया ६५:१७; प्रकाश २१:१; प्रकाश २१:२७
14 आं दाक्शो लोक्बपुकी, मोदेंशो रिम्शा, गल्ती मपाइब नु दोस मताइब दुम्चा कली शुश गेय पने। परमप्रभु यावेमी इन कली मोदेंशो पशो नु थुं नाइश्शा बाक्शो ग्रुम्चा दाक्ब। १कोरिन्थी १:७-८ 15 प्रभु आ रिम्ना रिम्न बाक्तीके मुर आन कली पाप रे प्रोंइचा बाक्ब, दे मिम्तीन। इं दाक्शो लोक्ब पावलमी आं खोदेंशो पा, इन कली आ तशो तुइक्तीकेमी चिठी ब्रेक्ताक्व। रोमी २:४ 16 मेको आ पर्बम आ चिठी नेल्लेमी लोव़ पाइब। पावल आ ब्रेक्शो लोव़ का निक्शी रुप्चा कली श्येत बाक्ब। मजोक्ब नु थमा मसुइक्ब मुरपुकीमी मेको दूली शेंनीम। परमप्रभु यावे आ ब्रेक्पाइश्शो अरु लोव़ यो दूली शेंनीम। मोपा आंमा जाम्शा लाइब दुम्नीम।