14 एलीशा रोइ पवा बाक्त। मिनु नोले मेको रोइ रे बेक्माक्त। मिनु इस्राएल ङा पिप योआश मेको कली कोव़थ लमाक्त। मिनु मेको आ ङोंइती ङाक्शा “ए, आं आफ! ए, आं आफ! इस्राएल ङा बग्गी नु शारा ङोइक्बपुकी” देंमाक्त।
२राजा २:१२ 15 मिनु एलीशामी मेको कली “लिब्रा का नु ब्रा गुपो” देंमाक्त। मिनु मेकोम लिब्रा नु ब्रा गुबा बाक्त।
16 मिनु मेकोमी इस्राएल ङा पिप कली “लिब्रा खुक्को” देंमाक्त। मिनु मेकोम खुक्गा बाक्त। मिनु एलीशामी आ गुइ पिप आ गुइ तार वोदा बाक्त।
17 मिनु एलीशामी “पूर्ब गे ङा झेल रोक्को” दे मदा बाक्त। मिनु रोक्गा बाक्त। मिनु एलीशाम मेको कली “ब्रा आपो” दे मदा बाक्त। मिनु मेकोमी आबा बाक्त। मिनु एलीशाम “परमप्रभु यावे आ अराम रागी कली ग्रातीक ब्रा बाक्त। गे अफेक सहरमी अरामी आन कली लडाइ पा ग्रानीनी” दे मदा बाक्त।
18 मिनु लेंशा मेकोम “ब्रापुकी गुपो” देंमाक्त। मिनु मेकोमी गुबा बाक्त। मिनु मेकोमी इस्राएल ङा पिप कली “खप तुपो” देंमाक्त। मिनु पिपम खेयप सां तुप्शा नांइसे बाक्त।
19 मिनु परमप्रभु आ मुरुमी गाइश्शा मेको कली “गे खपीम ५, ६ खेयप तुप्चा माल्शो नवे। मिनु गे अराम कली गेना हना यो कली ग्राङे वा। तन्न मुल गे अराम कली खेयप सां ला ग्रानेवे” दे मदा बाक्त।
20 मेको नोले एलीशा बेक्माक्त। मुरपुकीम मेको कली थिम्मे बाक्त। मोआब ङा रोइक्बपुकी बर्स बर्समी मेको रागी ओव़बाक्मा बाक्त। 21 काले इस्राएलीपुकीम बेक्शो मुर का थिम्मेनु मोदेंशो रोइक्ब मोआबी आन कली तामे बाक्त। मोपतीके मेकोपुकीम मेको बेक्शो मुर एलीशा वोइक्तीकेमी ताइश्शा, प्रोक्मा बाक्त। मिनु मेको बेक्शो मुरुम एलीशा आ रुश थिवा चोटी सेस दुम्शा बोक्माक्त।
22 मिनु अराम ङा पिप हजाएलमी इस्राएल कली श्येत गेस ङा गेस बाक्माक्त। मेना येहो-अहाजम इस्राएलम सासन पशो बाक्माक्त। 23 तन्न परमप्रभु यावेमी अब्राहाम, इसहाक नु याकूब नु पशो कबलम पतीके, मेको आन कली शिशी पाइक्मी बाक्त। मेकोम मेको आन कली मिम्तीमी बाक्त। मिनु परमप्रभु यावेमी मेको आन कली साइक्चा नु आ ङोंइती रे तिल्चा थुं मपवा बाक्त। लेवी २६:४२
24 मिनु अराम ङा पिप हजाएल बेक्माक्त। मिनु मेको आ पा ङा आ तौ बेन-हादाद पिप दुम्माक्त। 25 मिनु येहो-अहाज आ तौ योआशमी आ आफ रे हजाएल आ तौ बेन-हादादम लडाइ पा ग्राशो सहरपुकी लेंशा ताक्गा बाक्त। योआशमी खेयप सां मेको कली ग्रामाक्त। मिनु मोपा मेकोमी इस्राएल ङा सहरपुकी लेंशा आं के सेला बाक्त। २राजा १३:१९
<- २ राजा 12२ राजा 14 ->
