1 आहाब आ ७० जना तौ सामरीया सहरम बाक्शो बाक्मा बाक्त। मोपतीके येहूमी चिठी का ब्रेक्शा सामरीयाम, येज्रेल ङा हुकुम पाइब, खाल्पा नु आहाब आ तौ आन कली कोव़ब मुर आन कली सोइक्ता बाक्त।
2 मेको चिठीम “गे इन होव़प आ तौ मेकेर बाक्तीके, इन बग्गी, शारा, गारो हिरशो सहर नु यापुकी बाक्तीके,
3 गेपुकीमी इन होव़प आ तौ आन दातेमी नेल्ल क्येङा रिम्शो नु नेल्ल क्येङा निप्स पाइश्शो, का कली आ आफ आ पा ङा पिप सेलीन। मिनु मेको नोले इन होव़प आ खिं आ पर्बम लडाइ पने” दे ब्रेक्शा सोइक्तीमी बाक्त।
4 तन्न मेकोपुकी थाम्पा हिंशा सुर्ता पा “पिप निक्शी ला यो मेको आ ङोंइती राप्ने मचबेस हना, गो मार पने चाप्नया ङा?” देंमुमा बाक्त।
5 मोपतीके पिप आ खिं ङा खाल पाइबपुकी, सहर ङा हुकुम पाइबपुकी, खाल्पापुकी नु आहाब आ तौ आन कली कोव़ब नेल्ल गारशा येहू कली “गोपुकी इन गेय पाइब नकी। गे आंइ कली मार देंनीनी, गो मेको पाइनीकी। गो सुइ कली पिप मसेल्नीकी। गे मार पचा दाक्नीनी, मेको पने” दे लोव़ कुरब मुर सोइक्तमे बाक्त।
6 मिनु येहूमी मेको आन कली अर्को चिठी का ब्रेक्शा “गेपुकी आं गे बाक्तीनी हना नु आं अरेशो बित्नीनी हना, दीसा एं खोइ ना इन होव़प आ तौ आन पिया कुरशा येज्रेल सहरमी जाक्कीन” दे ब्रेक्शा सोइक्ता बाक्त। मेना मेको पिप आ ७० जना तौ चहिं आन कली कोव़ब मुर आन खिंमी बाक्शो बाक्मा बाक्त।
7 मिनु मेको चिठी मेक जाक्दीम्मेनु, मेकोपुकीम मेको ७० जना पिप आ तौ आन कली लाइश्शा सदमे बाक्त। मिनु मेकोपुकीम मेको आन ख्रोइश्शो पिया थुन्सेपुकीम कुर पा येज्रेल सहरम सोइक्तमे बाक्त।
8 मिनु लोव़ कुरब मुर जाक्शा, येहू कली “मेकोपुकीम पिप आ तौ आन पिया चाक्तेक्म” देंमाक्त। मिनु येहूमी मेको कली “मेको आन कली पुक्थ्री निक्शी पा पुक्शा, सहर ङा ठेयब लाप्चो आ ङोंइती दीसा सुनी सम्म वोतीन” देंमाक्त।
9 मिनु आ दीसा सुनी येहू लाङगा ग्रूमाक्त। मिनु मेकोम मेकेर राप्शा बाक्ब नेल्ल आन कली “गे दोस ताइब मननी। आंम होव़प कली मरिम्शो पा साइक्ब मुर दा गो नङ। तन्न एको नेल्ल आन कली चहिं सुम सदा?
10 आहाब आ खिं ङा मुर आन कली परमप्रभु यावेम देंशो लोव़ का यो मोशा मदुम्ब। परमप्रभु यावेम आ गेय पाइब एलीया रे पा देंशो लोव़ नेल्ल गाप्त” देंमाक्त।
१राजा २१:२१ 11 मोपा येहूमी येज्रेलम लीशो आहाब आ खिं ङा मुर नेल्ल, मेको आ ठेयब गेय पाइब मुरपुकी, मेको आ वारच नु मेको आ चढ़ेब, नेल्ल आन कली का यो मप्रोंइथु साइक्मी बाक्त।
होसे १:४12 मेको नोले येहू सामरीया गे लमाक्त। मिनु गोठला आन बाक्तीक बेथ-एकेद सहरम जाक्दीम्माक्त। 13 मिनु मेकेर येहूम यहूदा ङा पिप अहाज्याह आ मुर आन कली ग्रुमा बाक्त। मिनु येहूमी मेको आन कली “गे सु ननी?” दे हिल्लो पामी बाक्त। मिनु मेकोपुकीम “गो पिप अहाज्याह आ मुर नकी। मिनु गो पिप तौ आन कली नु ठेयब पिपीमी आ तौ आन कली ग्रुम्थ लाइतक” देंमा बाक्त। २इतिहास २२:८ 14 मिनु येहूम “एको आन कली सेसीन ग्याइक्तीन” देंमाक्त। मिनु मेकोपुकीम मेको आन कली सेसीन ग्याइश्शा बेथ-एकेद सहरम सदमे बाक्त। मेकोपुकीम मेकेर ४२ जना वोंइश मुर आन कली का यो सेस मप्रोन्मे बाक्त।
15 मिनु मेकोम मेकेर रेकाब आ तौ येहो-नादाब आ कली ग्रुम्थ पिशो तवा बाक्त। मिनु येहूम मेको कली रिम्शो पा “मार गो आं थुं इ गे बाक्शो खोदेंशो पा, गे यो इ थुं नेल्लेम आं गे बाक्नेवे?” दे मदा बाक्त। मिनु येहो-नादाबम “बाक्नुङ” देंमाक्त। मिनु येहूमी “मो हना इ गुइ आं कली गेयी” दे मदा बाक्त। मिनु मेकोम आ गुइ गेवा बाक्त। मिनु येहूम मेको कली लाइश्शा आ बग्गीम निप्पदा बाक्त। येरमीया ३५:६ 16 मिनु येहूम मेको कली “गे गो नु पिने। मिनु परमप्रभु यावे कली आं जोंब बोक्शा गेय पशो कोव़ङीन” दे मदा बाक्त। मिनु मेकोम मेको कली आ बग्गीम लदा बाक्त। 17 मिनु येहू सामरीयाम जाक्दीश्शा, परमप्रभु यावेमी एलीया कली देंशो खोदेंशो पा, आहाब आ खिं ङा लीशो मुर नेल्ल आन कली का यो मप्रोंइथु, साइक्मी बाक्त। १राजा २१:२१
18 मिनु येहूमी मुर नेल्ल आन कली ब्रेश्शा, मेको आन कली “आहाबम दा इच्का ला बाल आ पूजा पाप्तु। तन्न येहूमी मेको क्येङा यो थम ठेयब पा पूजा पाइब।
१राजा १६:३१-३३ 19 मुल बाल आ लोव़ पाइब नेल्ले, मेको आ नोले खोइक्ब नेल्ल नु मेको कली चढ़ेब नेल्ल आन कली ब्रेत्तीन। मेकोपुकी का यो मग्राइक्मल। मारदे हना गो बाल कली ठेयब पूजा का पाइनुङ। मेको पूजाम मजाक्ब सुइ ब्रोंइचा मताइनीम” देंमाक्त। तन्न येहूम बाल आ नोले खोइक्ब नेल्ल आन कली साइक्चा कली मोपा जोल पशो बाक्माक्त।
20 मिनु येहूम “बाल आ पर्बम चाड का मानेचा माल्ब” देंमाक्त। मोपतीके मेकोपुकीम मेको लोव़ नेल्ल आन कली नेंपदमे बाक्त।
21 मिनु येहूम मेको लोव़ इस्राएल नेल्लेम नेंपाइक्चा कली लोव़ कुरब मुर सोइक्तीमी बाक्त। मिनु बाल आ नोले खोइक्ब नेल्ल जाक्मा बाक्त। का यो मलीमा बाक्त। मेकोपुकी बाल आ खिंम जाक्शा क्राक्थ्री चोक्थ्री दुम्शा एर ङा गारो रे ओंथ ङा गारो सम्म दुम्मा बाक्त।
22 मिनु मेकोमी वा वोइक्ब आन कली “बाल आ नोले खोइक्ब नेल्ल आन कली वा ग्रुंइदीन” दे माइक्मी बाक्त। मिनु मेकोम मेको आन कली वा ग्रुंइदमे बाक्त।
23 मिनु येहू, रेकाब आ तौ येहो-नादाब नु बाल आ खिं ओव़माक्त। मिनु येहूम बाल आ नोले खोइक्ब आन कली “होस पा एर ओंथ नेल्ल कोव़ङीन। मिनु थमा पा एकेर गे इन दातेम परमप्रभु यावे आ गेय पाइब सुइ मबाक्मल। बाल आ नोले खोइक्ब ला बाक्मल” देंमाक्त।
24 मिनु मेको क्योरशा चढ़ेचा नु चोशा चढ़ेचा कली आगा ओव़सा बाक्त। येहूमी लाङगाम ८० जना मुर आन कली योव़शा, मेको आन कली “गो एको मुर आन कली इन जिम्मा गेशो बाक्नुङ। सुइम का कली यो प्रोक्चा गेप्तु हना, मेको आ पा ङा मेको प्रोक्पाइक्ब मुर साइक्चा पुंइसीब” देंशो बाक्माक्त।
25 मिनु येहूम मार मार चढ़ेने थुमा चोटी खाल पाइब नु आ दी ङा योव़शो मुर आन ठेयब मुर आन कली “ओव़शा, मेको नेल्ल आन कली का यो मप्रोंइथु, क्योरशा सतीन” दे हुकुम गेमी बाक्त। मोपतीके मेको खाल पाइबपुकी नु योव़शो आन ठेयब मुरपुकीम सुइ आन कली प्रोक्चा मगेथु तरवारम क्योरशा सदमे बाक्त। मिनु मेको आन बेक्शो रां लाङगा ग्रुंइशा बाल आ खिं आ लाङगाम ताइक्तमे बाक्त।
१राजा १८:४० 26 मिनु मेकोपुकीम बाल आ खिं ङा थाम लाङगा ग्रुंइशा चोव़मे बाक्त।
27 मिनु नोले मेकोपुकीम बाल आ थाम प्रेत्मे बाक्त। मिनु आ खिं यो प्रेत्मे बाक्त। मिनु मेको ङाइक्तीक खिं सेल्मे बाक्त। मेको मुल सम्म बाक्ब।
28 मोपा येहूमी इस्राएलमी बाल आ नोले खोइक्ब नेल्ल आन कली क्याम्दा बाक्त। १राजा १२:२६-३३ 29 मो हना यो येहूम इस्राएली आन कली पाप पपाइक्ब नेबात आ तौ येरोबाम आ पतीक मप्रोना बाक्त। बेथेल नु दान ङा सुन के बाछा आस कली पूजा पतीक गेय में ङा में वोदा बाक्त। 30 मिनु परमप्रभु यावेम येहू कली “गे आं ङोंइती मार रिम्शो बाक्मे, मेको पाप्तीवी। मिनु आं मिम्शो लोव़ आहाब आ खिं ङा मुर नेल्ल आन कली पाप्तीवी। मोपतीके इ तौ चच ४ पाला सम्म इस्राएल ङा पिप दुम्नीम” देंमाक्त। 31 मो हना यो येहूम आ थुं नेल्लेम होस पा परमप्रभु यावे, इस्राएली आन परमप्रभु आ अरेशो मटिवा बाक्त। मेकोमी इस्राएली आन कली पाप पपाइक्ब येरोबाम आ पाप पतीक मप्रोना बाक्त।
32 मेना परमप्रभु यावेमी इस्राएल कली आइक्च सेल्चा गोवा बाक्त। मिनु हजाएलमी इस्राएल कली लडाइ पा ग्रामाक्त। २राजा ८१२ 33 मिनु यर्दन खोला आ पूर्ब गे गिलाद ङा रागी नेल्ल, गाद, रूबेन नु मनस्से आन रागी, अरनोन खोला आ नेक्था आरोएर, गिलाद ङा लां रे पा बाशान सम्म इस्राएली आन कली फ्रूमी बाक्त। 34 येहू आ पशो अरु गेय, मेको आ पशो नेल्ल नु आ सक्ति मार, मेको इस्राएल ङा पिप आन इतिहासम ब्रेक्शो मबाक्बा ङा? 35 मिनु येहू बेक्माक्त। मिनु मेको सामरीयाम थिम्चा पुंइसे बाक्त। मिनु मेको आ पा ङा आ तौ येहो-अहाज पिप दुम्माक्त। २राजा १३:१ 36 येहू सामरीया सहरम बाक्शा २८ बर्स इस्राएल कली सासन पवा बाक्त।
<- २ राजा 9२ राजा 11 ->
