1 आं दाक्‍शोपुकी, गो नेल्‍लेमी परमप्रभु यावे आ गेशो लोव़ तुइश्‍शो बाक्‍नय। मोपतीके इं रां थुं नेल्‍ल मरिम्‍शो पतीक रे ङोन बाक्‍नय। मिनु इं परमप्रभु यावे कली ला मान पा हिंशा ठेयब सेल्‍नय।

2 इन थुं आंइ गे हिरदीन। मारदे हना गो सुइ इन कली मरिम्‍शो मपक। सुइ आन कली मरिम्‍शो मसेल्‍क। सुइ रे पा मारेइ यो मताक्‍क। २कोरिन्‍थी १२:१७; प्रेरित २०:३२ 3 मेको इन कली दोस गेचा कली मदेंक। मारदे हना ङोंइती देंशो आं लोव़ लेंशा देंनुङ, इन कली दाक्‍नीकी। बेक्‍चा माल्‍तय हना यो, काथा बेक्‍य। ब्रोंइचा ताइतय हना यो, काथा ब्रोंइय। २कोरिन्‍थी ६:११-१३; रोमी ६:८ 4 मिनु इन कली तशा, ग्‍येरसीशा, आं थुं बोरनुङ। आं थुं नाइक्‍सीशा बारना बारन लत। श्‍येत जाता हना यो, इन कली तशा गो ग्‍येरस ङा ग्‍येरस बाक्‍ती।

5 गो मासीडोनीया रागीम शेंना शेंन गाक्‍कानु, शुश श्‍येत जाइतक। मुरपुकीमी गडङ मडङ पा खेदा पा श्‍येत गेतीकी। मिनु शुश हिंचा माल्‍तक। प्रेरित २०:१-२; २कोरिन्‍थी ४:८ 6 तन्‍न परमप्रभु यावेमी आइक्‍च थुं पाइश्‍शो आन कली आन थुं बारपाइक्‍ब। मिनु तीतस जाक्‍शा आंइ थुं बारपाइक्‍तु। मिनु आंइ थुं बारत। २कोरिन्‍थी २:१३ 7 तीतस कली तशा ला ममाइ, तीतस आ लोव़ नेंशा, ठेयब थुं पाइश्‍शो दुम्‍तक। तीतसमी आंइ कली “कोरिन्‍थीपुकीमी थम रिम्‍शो पाइक्‍तीमी। आं कली शुश मान पशा कोंइताय्‍यीमी। आं थुं बारपाइक्‍तीमी” देंत। आ देंशो नेंशा गो थाम्‍पा ग्‍येरसाक्‍यी।

8 ङोंइती ङा चिठीमी इन थुं खाइक्‍पाइक्‍तन्‍नी, दे तुइक्‍ताक्‍ङ। मो हना यो मुल आं थुं मखाइक्‍ब। मारदे हना मेको इन थुं खाइश्‍शो शुश नाक्‍त मली, दे यो तुइक्‍ताक्‍ङ। २कोरिन्‍थी २:४ 9 इन थुं खाइश्‍शो तुइश्‍शा, गो मग्‍येरसीङ। आं ब्रेक्‍शो टिशा, इन थुं लेत्‍ताक्‍नी। गेपुकीम “परमप्रभु यावेमी इं कली लां कोंइचा नु रिम्‍शो सेल्‍चा कली थुं खाइक्‍पाइक्‍की बाक्‍त” दे रुप्‍तीनी। मोपतीके गो इन थुं लेश्‍शो तशा ग्‍येरसाक्‍यी। 10 परमप्रभु यावेमी थुं खाइक्‍पाइश्‍शो आन कली रिम्‍शो दुम्‍मल, दे मो पशो बाक्‍ब। रागी ङा थुं खाइक्‍पाइक्‍मुशोमी चहिं थुं साइक्‍ब। मत्ती २६:७५; लूका १५:१७-२४; मत्ती २७:३-५ 11 परमप्रभु यावेमी इन थुं खाइक्‍पाइश्‍शोमी मार दुम्‍मे, दे तुइक्‍तीने। गे रिम्‍शो दुम्‍चा कली शुश गेय पाइतीनी। गे सल्‍‍ला पा, जिशा, हिंशा, रिम्‍शो दुम्‍चा कली शुश बोल पा दोस मताइब दुम्‍चा कली गे मेको मुर कली सजाइ गेतीनी। मोपा गे दोस मताइब बाक्‍नीनी, दे कोंइताक्‍नी। 12 मुल देंचा लीशो लोव़ नेनीने, इन कली ङोंइती ब्रेक्‍शो चिठी मारदे ब्रेक्‍ताक्‍ङ देंशा हना, गेपुकी नु बाक्‍ब मरिम्‍शो पाइब नु मरिम्‍शो पचा पुंइसीब आस कली गारपाइक्‍चा लोव़ ला ममाइ। परमप्रभु यावेमी पावल कली अधिकार गेशो बाक्‍ब। मोपतीके आ देंशो टिचा माल्‍ब, दे रुप्‍शा, गेय कोंइदीने, दे ब्रेक्‍ताक्‍ङ। 13 मोपतीके गो इन कली आं देंशो टिशो तशा, ग्‍येरसाक्‍क। मिनु आंइ थुं नाइक्‍ताक्‍क। गेपुकीमी तीतस कली आ थुं नाइक्‍पाइक्‍तीनी। आ थुं नाइश्‍शो तशा शुश ग्‍येरसाक्‍क। 14 मोदेंशो पा तीतस कली यो “कोरिन्‍थीपुकीमी आं लोव़ टीनीमी, रिम्‍शो पाइनीम” दे थमा लोव़ पशो नङ। मुल तीतसमी इन कली आं लोव़ टिशो तशा, थमा बाक्‍माक्‍त, दे तुइक्‍ताक्‍व। मोपा आं कली मुने मतोक्‍नी। मोपतीके आं नें बोरपा बाक्‍ती। 15 तीतसमी इन टिशो तशा, ग्‍येरसाक्‍व। गे हिंशा, ख्रिंख्रि पा मेको कली ब्राइतीनी। मिनु इन कली शुश दाक्‍ताक्‍व। 16 गो इन रिम्‍शो पशो तशा ग्‍येरसाक्‍यी। मिनु इन कली थमा सुइक्‍ता।

<- २ कोरिन्‍थी 6२ कोरिन्‍थी 8 ->