1 मिनु सोलोमनम मेको पुंइने थुमा नोले सरीङ रे मी यिमाक्‍त। मिनु मेको मीम चोशा चढ़ेशो नु अरु चढ़ेशो नेल्‍ल नेक्‍गा बाक्‍त। मिनु परमप्रभु यावे आ छेङछेङम आ खिं कली ब्रीमाक्‍त। लेवी ९:२४; १राजा १८:३८; प्रस्‍थान ४०:३४ 2 मिनु परमप्रभु यावे आ खिं आ छेङछेङम ब्रीतीके, चढ़ेबपुकी परमप्रभु यावे आ खिं ओव़ने मचब्‍मे बाक्‍त। 3 इस्राएली नेल्‍लेमी मेको मी यिशा नु परमप्रभु यावे आ खिं आ तार छेङछेङ बाक्‍शो तामे बाक्‍त। मेकोपुकीमी खप सम्‍मन बाप्‍शा “परमप्रभु यावे, गे रिम्‍शो पाइब बाक्‍नीनी। इन दाक्‍तीके गेना हना यो लीब” देंशा, ठेयब सेल्‍मे बाक्‍त। २इतिहास ५:१३-१४; भजन संग्रह १०६:१

4 मिनु नोले पिप नु मुर नेल्‍लेमी परमप्रभु यावे आ ङोंइती चढ़ेमे बाक्‍त। 5 मिनु पिप सोलोमनम २२ हजार ब्‍यफ नु लाख का, २० हजार भेडा चढ़ेवा बाक्‍त। मोपा पिप नु मुर नेल्‍लेमी मेको खिं परमप्रभु कली जिम्‍मा गेमे बाक्‍त। 6 चढ़ेब आन पालो खोदेंशो पा बाक्‍मा बाक्‍त। लेवीपुकी परमप्रभु यावे कली ताप्‍तीक ताप्‍चा कली आन ताप्‍तीके शेशा बाक्‍मा बाक्‍त। पिप दाऊदम मेको ताप्‍तीकपुकी परमप्रभु यावे कली ठेयब सेल्‍चा कली “आ दाक्‍चा गेना हना यो लीब” दे कुम्‍सो पचा कली, परमप्रभु यावे कली ठेयब सेल्‍ची ना कली सेल्‍शो बाक्‍माक्‍त। मिनु लेवीपुकीमी कुम्‍सो पामे बाक्‍त। चढ़ेबपुकी कोव़मुशा तुराही ताप्मे बाक्‍त। मेना इस्राएली नेल्‍ल राप्‍शा बाक्‍मा बाक्‍त। २इतिहास ४:१

7 मिनु नोले सोलोमनम परमप्रभु यावे आ खिं आ ङोंइती ङा लाङगा परमप्रभु कली जिम्‍मा गेवा बाक्‍त। मिनु मेकेर चोशा चढ़ेतीक चढ़ेवा बाक्‍त। दुशा बाक्‍चा आ पर्बम चढ़ेशो आन बोंसो यो चढ़ेवा बाक्‍त। मारदे हना मेको आ सेल्‍शो कांसा के चढ़ेतीकेम चोशा चढ़ेशो, अन्‍न चढ़ेशो नु बोंसो चढ़ेचा कली मरिक्‍ता बाक्‍त। २इतिहास ४:१

8 मेना सोलोमनम ७ नाक्‍ती सम्‍म चाड सेला बाक्‍‍त। मिनु इस्राएली नेल्‍ले मेको नु बाक्‍मा बाक्‍त। लेबो-हमाथ रे इजीप्‍त ङा खोला सम्‍म शुश मुरुमी ७ नाक्‍त सम्‍म चाड मानेमे बाक्‍त। 9 मिनु मेकोपुकीमी ८ नाक्‍तीम परमप्रभु यावे कली ठेयब ग्रुम्‍तीक का सेल्‍मे बाक्‍त। मारदे हना मेकोपुकीम चढ़ेतीक ङा जिम्‍मा गेतीके ७ नाक्‍त सम्‍म मानेमे बाक्‍त। मिनु नोले ७ नाक्‍त ङा चाड यो मानेमे बाक्‍त। गन्‍ती ७:१० 10 मिनु ७ महिना ङा २३ नाक्‍तीम सोलोमनम मुर आन कली आन खिं खिं सोइक्‍तीमी बाक्‍त। मेकोपुकी थुं नाइश्‍शा, थम ग्‍येरसीशा लमा बाक्‍‍त। मारदे हना परमप्रभु यावेमी दाऊद, सोलोमन नु आ मुर आन कली थम रिम्‍शो पवा बाक्‍त। 11 मो पा सोलोमनम परमप्रभु यावे आ खिं नु आ दरवार सेल्‍ने थुमा बाक्‍त। मिनु परमप्रभु यावे आ खिं नु आ खिं सेल्‍चा थुं पा रिम्‍शो पा थुमा बाक्‍त।

12 मिनु नोले परमप्रभु यावे नाक्‍दो सोलोमन आ ङोंइती तपांइसीशा, मेको कली “गो इ पुंइशो लोव़ नेंता। मिनु गो मेको खिं मुरपुकीमी आं कली मेकेर चढ़ेचा कली योव़ता। ब्‍यवस्‍था १२:५-६; यसैया ५६:७; मर्कूस ११:१७; यूहन्‍ना २:१६ 13 गो सरीङ कली चोक्‍शो खोदेंशो पा रेउ मयिपाइक्‍ता हना, गो रागी कली खतम पोक्‍चा कली सल्‍हा सोइक्‍ताक्‍ङ हना, आं मुर आन दातेम बेक्‍तीक रोइ पपाइक्‍ता हना, 14 मिनु आं मुरपुकी ब्रेम्‍शो दुम्‍शा, आं कली पुंइशा, आं कली माल्‍तेक्‍म हना, आन मरिम्‍शो लां रे लेत्‍‍तेक्‍म हना, गो स्‍वर्ग रे मेको आन पुंइशो नेंनुङ। मिनु मेको आन पाप क्‍याम्‍नुङ। मिनु गो मेको आन रागी कली ङोंइती ङा खोदेंशो पा रिम्‍शो सेल्‍नुङ। 15 मिनु मेको बाक्‍तीकेमी मुरपुकीम आं कली पुंइशो लोव़ गो कोव़शा नोफा दाइक्‍नुङ। २इतिहास ६:४० 16 मारदे हना गो आं नें गेना हना यो बाक्‍चा कली एको खिं कली योव़ता। एको आं के ला बाक्‍ब। गो मेको कली कोव़नुङ। आं थुं गेना हना यो मेकेर बाक्‍ब। 17 मिनु गे चहिं इ आफ दाऊद आं ङोंइती गाक्‍शो खोदेंशो पा गाक्‍तेवे नु आं इन कली शेंशो फुल्‍लुम मुशा ब्रेक्‍‍शो लोव़ नु आ निसाफ पतीक लोव़ नेल्‍ल पाप्‍तीवी हना, 18 गो इ राज्‍य बोल्‍यो नु ठेयब सेल्‍नुङ। गो इ आफ दाऊद कली कबल पशो खोदेंशो पा इ कली यो ‘गेना हना यो इस्राएली आन कली सासन पचा कली इ खिं ङा मुर का बाक्‍ब’ दे कबल पाइनुङ। २इतिहास ६:१६

19 तन्‍न गे नोले शोंइसीशा, गो इ ङोंइती वोइश्‍शो आं फुल्‍लुम मुशा ब्रेक्‍शो लोव़ नु आं शेंतीके मटिप्‍तीवी हना, नु लशा अर्को देवी देवता आन कली सेउ पा पूजा पाप्‍तीवी हना, 20 गो इन कली गेशो रागी रे ग्रुंइनुङ। मिनु गो आं नें बाक्‍शो खिं प्रोंइनुङ, काइ मकोव़नुङ। मिनु गो एको कली जात जात ङा मुर आन दातेमी खि‍सी नु शुक्‍शी पाइक्‍तीक सेल्‍नुङ। ब्‍यवस्‍था २८:६३; १राजा १४:१५ 21 मिनु एको खिं आ पर्बम मार देंनीमी? मुल ठेयब दारशो बाक्‍ब। तन्‍न नोले एको लां रे गाक्‍ब मुर नेल्‍ल छक लाक्‍शा ‘मारदे परमप्रभु यावेम एको रागी नु एको खिं ओदेंशो सेला?’ दे हिल्‍लो पाइनीम। ब्‍यवस्‍था २९:२३-२८; येरमीया २२:८-९ 22 मिनु लेंशा मुरपुकीम ‘मारदे हना मेकोपुकीमी परमप्रभु यावे, आन किकी पिपी आन परमप्रभुमी मेको आन कली इजीप्‍त रे ग्रुंइशा चाक्‍ब परमप्रभु यावे कली प्रोंइतेक्‍म। मिनु अर्को देवी देवता आंम के सेल्‍शा, पूजा पा गेय पाम्‍तेक्‍म। मोपतीके परमप्रभु यावेमी मेको आन कली मोदेंशो श्‍येत गेप्‍तु’ दे लोव़ लेत्‍नीम” देंमा बाक्‍त।