36
यहूदा ङा पिप येहो-अहाज
२राजा २३:३०-२४:१७
1 मिनु मेको रागी ङा मुरपुकीम योसीयाह आ तौ येहो-अहाज कली चाक्शा, यरूसलेमम मेको आ आफ आ पा ङा पिप सेल्मे बाक्त। 2 येहो-अहाज पिप दुम्मेनु २३ बर्स दुम्शो बाक्माक्त। मेकोमी यरूसलेमम महिना सां सासन पवा बाक्त। 3 मिनु इजीप्त ङा पिपम मेको कली पिप रे ग्रुंइदा बाक्त। मिनु यरूसलेम कली सहे का टलेन्ट चांदी नु टलेन्ट का सुन तिरो थाप्पदा बाक्त। टलेन्ट का ३४ किलो बाक्ब। 4 मिनु इजीप्त ङा पिपम येहो-अहाज आ लोक्ब एल्याकीम कली यहूदा नु यरूसलेम ङा पिप सेला बाक्त। मिनु मेकोमी मेको आ नें फाइश्शा येहो-याकीम वोदा बाक्त। मिनु नेकोम आ लोक्ब येहो-अहाज कली इजीप्त रागी लदा बाक्त। येरमीया २२:४-१२
यहूदा ङा पिप येहो-याकीम
5 मिनु येहो-याकीम पिप दुम्मेनु, २५ बर्स दुम्शो बाक्माक्त। मेकोमी यरूसलेमम ११ बर्स सासन पवा बाक्त। 6 मेकोमी आ परमप्रभु यावे आ ङोंइती मार मरिम्शो बाक्मे, मेको पवा बाक्त। मिनु बेबीलोन ङा पिप नेबुकदनेसरम मेको आ रागी कली लडाइ तोशा, मेको कली कांसा के साङलोम फ्रेंशा बेबीलोन लदा बाक्त। येरमीया २२:१८ 7 नेबुकदनेसरम परमप्रभु यावे आ खिं ङा ग्योंबपुकी का निक्शी लाइश्शा, बेबीलोनम आ दरवारम वोदा बाक्त। एज्रा १:७ 8 मिनु येहो-याकीम आ पशो, आ पशो ग्रांग्रा दिशो नु आ दोस तशो गेय नेल्ल इस्राएल नु यहूदा ङा पिप आन इतिहासम ब्रेक्शो बाक्ब। मिनु मेको आ नोले मेको आ तौ येहो-याकीन पिप दुम्माक्त।
यहूदा ङा पिप येहो-याकीन
9 येहो-याकीन पिप दुम्मेनु, ८ बर्स दुम्शो बाक्माक्त। मिनु मेकोमी यरूसलेमम महिना सां नु १० नाक्ती सासन पवा बाक्त। मिनु मेकोमी परमप्रभु यावे आ ङोंइती मार मरिम्शो बाक्मे, मेको पवा बाक्त। येहो-याकीन पिप दुम्मेनु, २राजामी १८ बर्स देंब। २राजा २४:८ 10 मिनु बर्खा जाक्चावानु, पिप नेबुकदनेसरम मुर सोइश्शा परमप्रभु यावे आ खिं ङा रिम्शो रिम्शो ग्योंबपुकी नु मेको पिप कली बेबीलोनम चाक्पदा बाक्त। मिनु मेकोमी मेको पिप आ खिं ङा मुर का सिदकीयाह कली यहूदा नु यरूसलेम ङा पिप सेला बाक्त। येरमीया २२:२४-३०
यहूदा ङा पिप सिदकीयाह
२राजा १४:१८-२५; येरमीया ५२:१-३०
11 सिदकीयाह पिप दुम्मेनु २१ बर्स दुम्शो बाक्माक्त। मेकोमी यरूसलेमम ११ बर्स सासन पवा बाक्त। 12 मेकोमी आ परमप्रभु यावे आ ङोंइती मार मरिम्शो बाक्मे, मेको पवा बाक्त। परमप्रभु यावे आ लोव़ पाइब येरमीयाम मेको कली परमप्रभु यावे आ लोव़ पशो बाक्माक्त। तन्न पिपमी मेको आ ङोंइती आ थुं कली ब्रेम्शो मसेला बाक्त। येरमीया ३७:-; ३८:- 13 मिनु पिप नेबुकदनेसरमी मेको कली परमप्रभु आ नेंम कसम जपदा बाक्त। तन्न मेको पिप कली यो मरिम्शो पवा बाक्त। मेको मरिम्शो पाइब नु काइ मटीब दुम्शा, परमप्रभु यावे, इस्राएली आन परमप्रभु गे लेन्ने मबिस्से बाक्त। 14 मेको प्रोंइशा, चढ़ेब नु मुरपुकीम थाम्पा मरिम्शो पा, रागी रागी ङा मुर आन ग्रांग्रा दिशो गेयपुकी नेल्ल पामे बाक्त। मोपा यरूसलेम ङा परमप्रभु यावे आ खिं ग्रांग्रा दिशो सेल्मे बाक्त। ब्यवस्था १८:९
यरूसलेम खतम दुम्शो
15 मिनु परमप्रभु यावे, आन किकी पिपी आन परमप्रभुमी आ लोव़ पाइबपुकी मेको आन दातेम सोइक्ना सोइक्न बाक्शो बाक्माक्त। मारदे हना आ मुर नु आ बाक्तीक कली शिशी पाइक्बाक्माक्त। 16 तन्न परमप्रभु आ लोव़ पाइब आन कली शुक्शी पामे बाक्त। आ लोव़ मटिथु, आ लोव़ पाइब आन कली तोक्शा लोव़ पामे बाक्त। मोपतीके परमप्रभु यावे आ गाइश्शो मबेक्माक्त। लूका २०:१०-१२; प्रेरित ७:५२
यहूदा ग्याइक्चा पुंइसीशो
17 मिनु परमप्रभुम मेको आन कली लडाइ तोपाइक्चा कली कल्दी आन पिप कली चाक्गा बाक्त। मिनु मेकोपुकीमी मेको आन आल आन कली परमप्रभु यावे आ बाक्तीक खिंम तरवारम क्योरशा सदमे बाक्त। मेकोपुकीमी वोंइश आल नु मीश आल आन कली, खाल्पा नु खूशो आन कली काइ शिशी मपामे बाक्त। परमप्रभुम मेको नेल्ल आन कली पिप नेबुकदनेसर आ गुइमी गेमी बाक्त। 18 मिनु मेकोमी परमप्रभु आ खिं ङा आइक्च ठेयब ग्योंब नेल्ल, मेकेर ङा शोंप नु दरवार नु सरकार ङा गेय पाइब आन खिं ङा शोंप नेल्ल बेबीलोन लदमे बाक्त। 19 मेकोपुकीम परमप्रभु आ खिंम मी सुइक्तमे बाक्त। यरूसलेम सहर ङा गारो प्रेत्मे बाक्त। मिनु मेकोपुकीम सहर ङा दरवार नेल्लेम मी सुइश्शा, आगा बाक्शो शोंप खतम सेल्मे बाक्त। येरमीया २६:६ 20 मिनु मेकोमी तरवार रे ब्रोंइशो नेल्ल आन कली फ्रेंशा बेबीलोन लदमे बाक्त। मिनु पारसी आ राज्य मजाक्म सम्म मेकोपुकीम, मेको ग्याइक्चा पुंइसीब आन तमी तौ आन कली वाइलीम वाइल सेल्मे बाक्त। 21 मिनु परमप्रभु यावे आ लोव़ पाइब येरमीया रे पा देंशो परमप्रभु यावे आ लोव़ गाप्चा कली ७० बर्स मगाम सम्म इस्राएल रागीम आ नाइक्तीक नाक्ती मानेवा बाक्त। मेको रागीम ७० बर्स सम्म श्येत्थ दुम्मेनु, आ नाइक्तीक नाक्ती मानेवा बाक्त। येरमीया २५:११; लेवी २६:३४; बिलाप २:६
कोरेस आ देंशो लोव़
एज्रा १:१-३
22 मिनु पारसी ङा पिप कोरेसमी पिप पवा आ ङोंइती ङा बर्सम येरमीया आ देंशो परमप्रभु यावे आ लोव़ गाप्चा कली परमप्रभु यावेम पारसी ङा पिप आ थुंमी लोव़ पवा बाक्त। मिनु मेकोमी आ ठेयब राज्य नेल्लेम लोव़ पा ब्रेक्शा, उरदी पपदा बाक्त। येरमीया २९:१०; यसैया ४४:२८ 23 फारसी ङा पिप कोरेसम मार उरदी पपदा बाक्त। देंशा हना “परमप्रभु यावे, स्वर्ग ङा परमप्रभुम रागी ङा राज्य नेल्ल आं कली गेशो बाक्ब। मिनु मेकोमी आं कली यहूदा ङा यरूसलेमम आ कली खिं का सेल्चा कली अरेशो बाक्ब। इन दातेम बाक्शो मेको आ मुर बाक्तेक्म हना ‘परमप्रभु यावे, आ परमप्रभु मेको नु बाक्ल। मिनु मेको यरूसलेम लमल’ देंनुङ” देंमाक्त।
<- २ इतिहास 35
