1 पिप आसाम सासन पशो ३६ बर्सम इस्राएल ङा पिप बाशामी यहूदा कली लडाइ तोवा बाक्त। मिनु पिप बाशामी यहूदा ङा पिप आसा आ रागी ओव़तीक नु ग्रूतीक लां नेल्ल तेक्चा कली रामाह सहर कली बोल्यो सेला बाक्त। 2 मिनु आसामी परमप्रभु यावे आ खिं नु पिप आ दरवार ङा शोंप वोइक्तीक रे सुन नु चांदी ग्रुंइशा, दमस्कस सहरम बाक्शो अराम ङा पिप बेन-हादाद कली सोइश्शा, मेको कली 3 “इन आफ नु आं आफ आस दातेम गारशो खोदेंशो पा, गे नु गो यो गारस। मुल गो इन कली सुन नु चांदी सोइक्ताक्ङ। मोपतीके इस्राएल ङा पिप बाशा नु गारशो लोव़ प्रोनीन। मिनु मेकोमी आं कली पचशो लडाइ मपवल” दे लोव़ सोइक्ता बाक्त। 4 मिनु बेन-हादादम पिप आसा आ लोव़ बिस्से बाक्त। मिनु मेकोमी आ लडाइ पाइब आन कप्तान आन कली “इस्राएल ङा सहर आन कली लडाइ तोन” दे हुकुम पवा बाक्त। मिनु मेकोपुकीम इयोन सहर, दान सहर, आबेल-मैम सहर नु नाप्ताली आन मार मार वोइक्तीक सहर आन के सेल्मे बाक्त। 5 मिनु बाशामी मेको लोव़ नेंशा, रामाह कली बोल्यो सेल्चा प्रोंइशा, आ गेय नेल्ल तेक्गा बाक्त। 6 मिनु नोले पिप आसामी यहूदा ङा मुर नेल्ल आन कली खुप्शा, रामाह लाइश्शा, रामाह सहर ङा सेल्तीक फुल्लु नु शी नेल्ल कुरपाइश्शा लदा बाक्त। बाशाम मेको फुल्लु नु शी रामाह सहर बोल्यो सेल्चा कली मेकेर वोइश्शो बाक्माक्त। मिनु पिप आसाम मेको चाक्शो फुल्लु नु शीम गेबा नु मिस्पा सहर आस कली बोल्यो सेला बाक्त।
11 पिप आसा आ पशो, ङोंइती नु नोले ङा नेल्ल, मेको यहूदा नु इस्राएल ङा पिप आन इतिहास ङा किताबम ब्रेक्शो बाक्नीम। 12 आसाम सासन पशो ३९ बर्स दुम्मेनु, आ खोइली राक्तीक रोइ पवा बाक्त। मिनु मेको रोइ शुश ठेयब दुम्माक्त। शुश रोइ पवा बाक्त हना यो परमप्रभु यावे आ वारच पशो कली ममाल्थु, ओख्ती ख्रेक्ब आन कली मला बाक्त। 13 मिनु आसा आ सासन पशो ४१ बर्स दुम्मेनु मेको बेक्माक्त। 14 मिनु मुरपुकीमी दाऊद आ सहरम आसामी सेल्पांइसीशो बेक्शो मुर कली वोइक्तीक कोठामी वोदमे बाक्त। मेकेर जोक्ब मुरुमी थम ब्रोव़शो मार मार ब्वाइश्शा ब्रोव़शो रिना पाइब घांस सेल्शा, मेको आ तारी वोदमे बाक्त। मिनु मुरपुकीम मेको पिप कली मान पचा, दे थम ठेयब मी मुइक्तमे बाक्त। २इतिहास २१:१९; येरमीया ३४:५
<- २ इतिहास 15२ इतिहास 17 ->