1 पिप सोलोमनम फाराओ आ तमी ग्‍युंबे पा यो, मेकोमी शुश अर्को रागी ङा मीश मुर, मोआबी, अम्मोनी, एदोमी, सीदोनी नु हित्ती आन कली दाक्‍तीमी बाक्‍त। ब्‍यवस्‍था १७:१७ 2 परमप्रभु यावेमी इस्राएली आन कली मेको रागी ङा मुर आन पर्बम “गेपुकीम मेको आन कली ग्‍युंबे पचा मदुम्‍नीनी। मारदे हना मेकोपुकीम थमा पा इन थुं आन देवी देवता आन नोले खोइक्‍पाइक्‍नीम” देंशो बाक्‍माक्‍त। तन्‍न सोलोमनम मेको आन कली दाक्‍तीमी बाक्‍त। प्रस्‍थान ३४:१६ 3 मेको के ७ सहे ग्‍युंबे पशो मीश नु सहे सां अरु नोले चाक्‍शो मीश बाक्‍मा बाक्‍त। मिनु मेकोपुकीम आ थुं क्‍याल्‍पदमे बाक्‍त। 4 मिनु सोलोमन खूशो दुम्‍मेनु, मेको आ मीशपुकीम आ थुं अरु देवी देवता आन गे हिरपदमे बाक्‍त। मिनु मेको आ आफ दाऊद आ थुंम खोदेंशो पा आ थुं नेल्‍लेम परमप्रभु यावे, आ परमप्रभु आ नोले मखोदा बाक्‍त। 5 मोपा सोलोमन सीदोनी आन अश्‍‍तोरेथ देवी नु अम्‍मोनी आन ग्रांग्रा दिशो मूर्ति मोलोक आस नोले खोदा बाक्‍त। मोलोक नु मोलेक नें वोइश्‍शो देवता मिल्‍कोम यो बाक्‍त। 6 मोपा सोलोमनम परमप्रभु यावे आ ङोंइती मार मरिम्‍शो बाक्‍मे, मेको पवा बाक्‍त। मेको आ आफ दाऊद खोदेंशो पा आ थुं नेल्‍लेमी परमप्रभु यावे आ नोले मखोदा बाक्‍त। 7 मिनु सोलोमनम मोआब ङा ग्रांग्रा दिशो मूर्ति केमोश नु अम्‍मोनी आन ग्रांग्रा दिशो मूर्ति मोलेक आस कली यरूसलेम आ पूर्ब गे ङा डांडा काम पूजा पतीक थान सेला बाक्‍त। गन्‍ती २१:२९; २राजा २३:१३ 8 मेकोमी अर्को रागी ङा आ मीश नेल्‍ल आन कली मोदेंशो पवा बाक्‍त। मेकोपुकीमी आन देवी देवता आन कली धूप चोशा चढ़ेमे बाक्‍त।

9 मिनु परमप्रभु यावे सोलोमन क्‍येङा गाइक्‍ता बाक्‍त। मारदे हना परमप्रभुमी मेको नु खेयप निक्‍शी लोव़ पशो बाक्‍त हना यो, मेको परमप्रभु यावे, इस्राएली आन परमप्रभु रे ङोन लशो बाक्‍माक्‍त। १राजा ३:५; १राजा ९:२ 10 परमप्रभु यावेमी सोलोमन कली “अरु देवी देवता आन नोले मखोतो” देंशो बाक्‍माक्‍त। मो हना यो सोलोमनम परमप्रभु यावे आ शेंशो मपवा बाक्‍त। 11 मोपतीके परमप्रभु यावेम इस्राएली आन पिप सोलोमन कली “इ मो पशो, आं कबल प्रोंइशो नु इ कली पावो, दे आं फुल्‍लुम मुशा ब्रेक्‍शो लोव़ मटितीके गो थमा पा एको इ राज्‍य रोइश्‍शा इ गेय पाइब कली गेनुङ। १सामुएल १५:२८ 12 मो हना यो इ आफ दाऊद आ पर्बम इ पालामी मो मपाइनुङ। गो एको राज्‍य इ तौ आ पालाम रोइक्‍नुङ। १राजा १२:१९ 13 तन्‍न गो राज्‍य नेल्‍ल मरोइक्‍नुङ। आं गेय पाइब दाऊद नु आं योव़शो सहर यरूसलेम आस पर्बम इस्राएल ङा थर का इ तौ कली गेनुङ” देंमाक्‍त।

14 मिनु परमप्रभु यावेमी इस्राएली आन मुर एदोम ङा पिप आ खिं ङा मुर हादाद कली सोलोमन आ जोरी सत्रु सेल्‍शा पोक्‍गा बाक्‍त। 15 ङोंइती दाऊदम एदोमी नु लडाइ पवानु, मेको आ लडाइ पाइब आन ठेयब मुर योआबमी मेकेर बेक्‍शो मुर आन कली थिम्‍थ लमेनु, मेको रागी ङा वोंइश मुर नेल्‍ल आन कली साइश्‍शो बाक्‍माक्‍त। २सामुएल ८:१४ 16 मेना योआब नु इस्राएली नेल्‍लेम एदोम ङा वोंइश मुर नेल्‍ल आन कली साइक्‍ने मथुम्‍मे सम्‍म मेकेर ६ महिना बाक्‍मा बाक्‍त। 17 मेना हादाद आलन बाक्‍माक्‍त। मिनु आ आफ आ गेय पाइब का निक्‍शी एदोमी नु प्रोक्‍शा इजीप्‍त लशो बाक्‍माक्‍त। 18 मिनु मेकोपुकी मिदयान रे पारानम जाक्‍मा बाक्‍त। मिनु पारान रे सुइ मुर आन कली लाइश्‍शा इजीप्‍त ङा पिप फाराओ आ बाक्‍तीके लशो बाक्‍मा बाक्‍त। मिनु फाराओमी हादाद कली आ रागीम खिं का रू नु जचा तूचा थोव़क गार पा गेशा वोइश्‍शो बाक्‍माक्‍त। 19 फाराओमी हादाद कली शुश दाक्‍ता बाक्‍त। मिनु मेकोम आ मीश पिपीम तहपेनेस आ लोक्‍ब का गेशा ग्‍युंबे पदा बाक्‍त। 20 मिनु तहपेनेस आ लोक्‍बमी हादाद रे गेनुबाथ नें पाइश्‍शो तौ का थिवा बाक्‍त। मिनु तहपनेसमी मेको आल कली दूध प्रोंइपाइश्‍शा फाराओ आ खिंम थुला बाक्‍त। मिनु गेनुबाथ फाराओ आ आलपुकी नुन कोल्‍माक्‍त। 21 मिनु हादाद इजीप्‍तम बाक्‍मेनु, मेकोम दाऊद बेक्‍शो नु मेको आ लडाइ पाइब आन ठेयब मुर योआब यो बेक्‍ने थुम्‍शो लोव़ नेना बाक्‍त। मिनु हादादम फाराओ कली “आं कली आं रागी लेत्‍चा गेयीनी” देंमाक्‍त। 22 तन्‍न फाराओम मेको कली “आं रागीम इन कली मार मजाक्‍दीम्‍मे? मिनु ‘आं रागी लेश्‍शा लाइनुङ’ देंनी” दे हिल्‍लो पवा बाक्‍त। मिनु मेकोमी “मारेइ माल्‍शो मबाक्‍ब। तन्‍न आं कली लचा गेयीनी” देंमाक्‍त।

23 मिनु परमप्रभुम सोलोमन आ पर्बम अर्को जोरी सत्रु का यो पोक्‍गा बाक्‍त। मेको एल-आदा आ तौ रेसोन बाक्‍माक्‍त। मेको आ होव़प सोबाह ङा पिप हादादेजेर रे प्रोक्‍शा लशो बाक्‍माक्‍त। २सामुएल ८:३ 24 मिनु दाऊदम सोबाह ङा लडाइ पाइब आन कली सदानु, मेको रेसोनमी आ मुर आन कली खुप्‍ता बाक्‍त। मिनु मेको मरिम्‍शो पाइब आन हुल ङा ठेयब मुर दुम्‍माक्‍त। मिनु मेको मरिम्‍शो पाइब आन हुल दमस्‍कस लमा बाक्‍त। मिनु मेकोपुकीम मेकेर ग्राशा दमस्‍कस आन के सेल्‍मे बाक्‍त। मिनु मेको मेकेर ङा पिप दुम्‍माक्‍त। २सामुएल १०:१८ 25 रेसोन सोलोमन बाक्‍म सम्‍मन इस्राएल आ जोरी सत्रु दुम्‍माक्‍त। मिनु हादाद आ मरिम्‍शो पशोम, मेकोम मरिम्‍शो तेम्‍दा बाक्‍त। मिनु अरामम हुकुम पवा बाक्‍त। मिनु मेको इस्राएल आ जोरी सत्रु दुम्‍‍माक्‍त।

26 एफ्राइम आ थर, सेरेदाह सहर ङा नेबात आ तौ येरोबाम सोलोमन आ गेय पाइब बाक्‍माक्‍त। मेको आ ममा आ नें सेरूआह बाक्‍माक्‍त। मेको आ वोंइश बेक्‍शो मीश मुर बाक्‍माक्‍त। मेको येरोबाममी यो सोलोमन कली श्‍येत गेचा गोवा बाक्‍त। 27 मेकोमी पिप कली मार पवा बाक्‍त देंशा हना, सोलोमनम मेको कली मिल्‍लो बोल्‍यो दरवार सेल्‍पाइश्‍शो नु आ आफ दाऊद आ सहर ङा ब्रेश्‍शो गारो सुपाइश्शो बाक्‍माक्‍त। १राजा ९:१५,२४ 28 येरोबाम थाम्‍पा गेय पाइब मुर का बाक्‍माक्‍त। मेको ठिटा मुर आ गेय पशो तशा, सोलोमनमी मेको कली योसेफ आ खिं ङा गेय पाइब आन कली कोव़ब मुर सेला बाक्‍त। 29 मिनु येरोबाम यरूसलेम रे अर्को रागी लना लन बाक्‍माक्‍त। मेना परमप्रभु यावे आ लोव़ पाइब शिलो सहर ङा अहीयाहमी मेको कली लांम ग्रुमा बाक्‍त। अहीयाहम नक वा फेक्‍शो बाक्‍माक्‍त। लांम ग्रुम्‍सानु मेको निक्‍शी ला बाक्‍सा बाक्‍त। 30 मिनु अहीयाहमी मेको आ फेक्‍शो नक वा खाक्‍शा १२ टुक्रा सेला बाक्‍त। 31 मिनु मेकोमी येरोबाम कली “१० टुक्रा गुम्‍सो। मारदे हना परमप्रभु यावे, इस्राएली आन परमप्रभुमी ‘गो एको राज्‍य सोलोमन आ गुइ रे रोइक्‍नुङ। मिनु इ कली १० थर गेनन। १राजा १२:१५; १राजा १४:२ 32 थर का मेको केन लीब। आं गेय पाइब दाऊद नु यरूसलेम आ पर्बम मोदेंशो दुम्‍ब। मारदे हना गो यरूसलेम सहर इस्राएली आन थर नेल्‍ल आन दाते रे आं के दुम्‍पाइश्‍शा योव़ता। भजन संग्रह १३२:१३ 33 मेकोमी आं कली प्रोंइतीके, गो मो पाइनुङ। मेकोमी सीदोनी आन देवी अश्‍‍तोरेथ, मोआब ङा देवता केमोश नु अम्‍मोनी आन देवता मोलेक कली पूजा पाप्‍तु। मेको आं लांम मगा। मेकोमी आं ङोंइती मार ठीक बाक्‍मे, मेको मपावो। मेकोम आ आफ दाऊदम पशो खोदेंशो पा, आं फुल्‍लुम मुशा ब्रेक्‍शो लोव़ नु आं निसाफ पतीक लोव़ मपावो। मोलेक देवता कली मिल्‍कोम यो देंशो बाक्‍त। 34 मो हना यो गो मेको आ राज्‍य नेल्‍ल मरोइक्‍नुङ। गो मेको कली मबेक्‍म सम्‍म सासन पाइब सेल्‍नुङ। मेको आं योव़शो गेय पाइब नु आं शेंशो नु आं फुल्‍लुम मुशा ब्रेक्‍शो लोव़ टीब दाऊद आ पर्बम मोदेंशो पाइनुङ। २सामुएल ७:१२ 35 तन्‍न गो मेको आ राज्‍य आ तौ रे १० थर रोइश्‍शा इ कली गेनन। 36 थर का चहिं गो मेको आ तौ कली गेनुङ। मोपा आं योव़शा बाक्‍शो सहर यरूसलेमम आं गेय पाइब दाऊद आ मुर का लीमल। १राजा १५:४; २राजा ८:१९ 37 गो इ कली सासन पपाइक्‍नुङ। गे इ दाक्‍शो नेल्‍ल आन कली सासन पाइनेवे। गे इस्राएल ङा पिप दुम्‍नेवे। 38 मिनु गे आं गेय पाइब दाऊद खोदेंशो पा आं शेंशो नेल्‍ल पाप्‍तीवी नु आं लांम गाक्‍ते हना, आं ङोंइती मार ठीक बाक्‍मे, मेको नेल्‍ल पाप्‍‍तीवी हना, आं फुल्‍लुम मुशा ब्रेक्‍शो लोव़ नु आं शेंशो नेल्‍ल आं गेय पाइब दाऊदम खोदेंशो पा टिप्‍‍तीवी हना, गो गे नु बाक्‍नुङ। गो इ खिं कली गेना हना यो लीपाइक्‍नुङ। मिनु इस्राएल इ कली गेनन। १राजा ९:४ 39 मिनु गो दाऊद आ चच युइ आन कली सजाइ गे‍नुङमी। तन्‍न गेना हना यो कली ममाइ’ दे परमप्रभुम देंशो बाक्‍ब” देंमाक्‍त। 40 मोपतीके सोलोमनमी येरोबाम कली साइक्‍चा मला बाक्‍त। तन्‍न येरोबाम इजीप्‍त ङा पिप शीशक आ बाक्‍तीक प्रोक्‍शा लमाक्‍त। मिनु सोलोमन मबेक्‍म सम्‍म मेकेर बाक्‍माक्‍त। १राजा १४:२५

41 मिनु सोलोमनम पशो अरु गेय, आ जोक्‍तीक तुइक्‍तीक, मार, मेको सोलोमन आ इतिहासम ब्रेक्‍शो मबाक्‍बा ङा? २इतिहास ९:२९-३१ 42 सोलोमनमी यरूसलेमम बाक्‍शा, इस्राएली नेल्‍ल आन कली ४० बर्स सम्‍म सासन पवा बाक्‍त। 43 मिनु नोले मेको बेक्‍माक्‍त। मिनु आ आफ दाऊद आ सहरमी थिम्‍चा पुंइसे बाक्‍त। मिनु मेको आ पा ङा आ तौ रेहोबाम पिप दुम्‍माक्‍त।

<- १ राजा 10१ राजा 12 ->