1 आं लोक्‍बपुकी, इन कली परमप्रभु यावे आ सोक्‍तीम पपाइश्‍शो गेय मजोक्‍थु बाक्‍शो तशा, आं थुं मनुङ। मोपतीके एको गेय आ पर्बम शेंनन्‍नी। 2 ख्रीस्‍त कली थमा सुइक्‍चा क्‍येङा ङोंइती गे मूर्ति पूजा पाइब बाक्‍तीनी। मिनु मेको मारेइ पने मचाप्‍ब मूर्ति गे इन थुं हिरशो बाक्‍तीनी। अय्‍युब २:१८-१९ 3 मिनु परमप्रभु यावे आ सोक्‍तीम पपाइश्‍शो लोव़ पा “येसु सराप रल” देंने मचाम्‍सीब। परमप्रभु यावे आ सोक्‍तीम पतीके ला “येसु इं प्रभु बाक्‍ब” देंने चाम्‍सीब, दे रुप्‍पाइक्‍नन्‍नी।‍ मर्कूस ९:३९; १यूहन्‍ना ४:२-३

4 परमप्रभु यावे आ सोक्‍त का बाक्‍ब। आ पपाइश्‍शो गेय चहिं शुश बाक्‍नीम। एफिसी ४:४-६,११; रोमी १२:६ 5 आ पपाइश्‍शो गेय शुश बाक्‍शा यो, प्रभु चहिं का बाक्‍ब। १कोरिन्‍थी १२:२८ 6 मेकेर शुश गेयपुकी बाक्‍नीमी। मिनु परमप्रभु यावेमी मुर नेल्‍ल आन कली का का पा मेको गेय पतीके थुं गेब। 7 परमप्रभु यावे आ सोक्‍तीमी पपाइश्‍शो गेय नेल्‍ल आन कली रिम्‍शो दुम्‍ल, दे पपाइश्‍शो बाक्‍ब। १कोरिन्‍थी १४:२६ 8 परमप्रभु यावे आ सोक्‍तीमी का कली जोक्‍तीक तुइक्‍तीक लोव़ पपाइक्‍ब। अर्को कली मेकोन सोक्‍तीमी शेंतीक सक्ति गेब। 9 का कली आ सोक्‍तीम पतीके थमा सुइक्‍तीक सक्ति गेब। अर्को कली सापाइक्‍तीक सक्ति गेब। 10 का कली छक लाक्‍चा ङा गेय पतीक सक्ति गेब। का कली परमप्रभु यावे आ लोव़ पतीक सक्ति गेब। का कली परमप्रभु यावे आ सोक्‍त देय वोल आन सोक्‍त बाक्‍बा, दे तुइक्‍तीक सक्ति गेब। का कली परमप्रभु यावे आ सोक्‍त आ लोव़ पतीक सक्ति गेब। का कली मेको लोव़ आ अर्थ शेंतीक सक्ति गेब। १कोरिन्‍थी १४:-; प्रेरित २:४ 11 मोदेंशो सक्ति पाइश्‍शो गेय नेल्‍ले परमप्रभु यावे आ सोक्‍तीमी पपाइश्‍शो बाक्‍ब। मिनु परमप्रभु यावे आ सोक्‍तीमी आ दाक्‍स पा सु सु आन कली गेचा दाक्‍बा, मेको आन कली गेब। रोमी १२:३; एफिसी ४:७

12 दोपा मुर आ रांम गुइ, खोइली, नोफा, मिक्‍च नु अरु मार बाक्‍तेक्‍म हना यो, रां का दुम्‍ब, मोपान ख्रीस्‍त आ मुर शुश बाक्‍तेक्‍म हना यो, रां का खोदेंशो बाक्‍नीम, दे मिम्‍सीब। 13 परमप्रभु यावे आ सोक्‍तीम पतीके यहूदी, ग्रीक, वाइलीम वाइल, होव़प नु गो नेल्‍ल परमप्रभु यावे आ सोक्‍त ङा दुम्‍तय। गलाती ३:२८

14 मारदे हना रां कांइचीक बाक्‍त हना यो, मेकेर शुश अरु मार मार बाक्‍नीम। 15 खोइलीमी “गो गुइ मनङ। मोपतीके गो रां ङा मनङ” देंत हना, मार, मेको रां ङा मदुम्‍बा ङा? 16 नोफामी “गो मिक्‍ची मनङ। मोपतीके गो रां ङा मनङ” देंत हना, मार मेको रां ङा मदुम्‍बा ङा? 17 मिनु रांमी मिक्‍च ला बाक्‍त हना, दोपा नेंचा ङा? रांमी नोफा ला बाक्‍त हना, दोपा नाम्‍चा ङा? 18 तन्‍न परमप्रभु यावेमी आ दाक्‍स पा नेंतीके, नाम्‍तीके, ततीके नु मारेइ मारेइ पतीके गारपाइश्‍शा वोइक्‍तु। 19 मिक्‍च ला बाक्‍त हना, दोपा रां दुम्‍बा ङा? 20 मेको मारेइ मारेइ शुश बाक्‍तेक्‍म हना यो, रां चहिं कांइचीक बाक्‍ब। 21 मिक्‍चीमी गुइ कली “इ कली ममाल्‍नुङ” देंने मचाप्‍ब। पियामी खोइली कली “इ कली ममाल्‍नुङ” देंने मचाप्‍ब। 22 रां ङा आइक्‍च मिम्‍सीशोपुकी मबाक्‍थु मदुम्‍शो बाक्‍नीम। मेको रां कली शुश माल्‍शो बाक्‍नीम। 23 रां ङा महिक्‍सीशो आन कली गो मान पाइक्‍नय, मदारशो मिम्‍सीशो आन कली दारपाइक्‍नय। 24 रां दारशो आन कली दारपाइक्‍चा ममाल्‍नय। आइक्‍च मिम्‍शो आन कली चहिं परमप्रभु यावेमी नेल्‍ल क्‍येङा मान पपाइश्‍शो बाक्‍ब। 25 मोपा रां का दुम्‍शोपुकी मब्रामल, कांइचीक दुम्‍शा बाक्‍मल नु काम अर्को कली कोव़मुमल। 26 मोदेंशो पा कांइचीक दुम्‍शोपुकी, काम श्‍येत जाप्‍तु हना, नेल्‍ल श्‍येत जाइनीम। काम मान ताप्‍तु हना, नेल्‍ल गारशा ग्‍येरसीनीम।

27 गे ख्रीस्‍त आ रां बाक्‍नीनी। मिनु का का पा मिक्‍ची, नोफा, शोव़, गुइ, खोइली नु मार मार बाक्‍नीनी। रोमी १२:५ 28 परमप्रभु यावेमी थमा सुइक्‍ब आन ग्रुम्‍तीकेमी ङोंइती ख्रीस्‍त आ सोइश्‍शोपुकी, मेको आन नोले आ लोव़ पाइबपुकी, मेको आन नोले शेंबपुकी, मेको आन नोले छक लाक्‍चा ङा गेय पाइबपुकी, मेको आन नोले सापाइक्‍बपुकी, मेको आन नोले वारच पाइबपुकी, मेको आन नोले कोव़बपुकी नु मेको आन नोले सोक्‍त आ लोव़ पाइबपुकी वोइक्‍तीमी। एफिसी ४:११-१२ 29 मार, मेको नेल्‍ल ख्रीस्‍त आ सोइश्‍शोपुकी नमी? मार, मेको नेल्‍ल परमप्रभु यावे आन लोव़ पाइब बाक्‍नीमी? मार, मेको नेल्‍ल शेंब बाक्‍नीमी? मार, मेको नेल्‍ल छक लाक्‍चा ङा गेय पाइब बाक्‍नीमी? 30 मार, मेको नेल्‍ल सापाइक्‍ब बाक्‍नीमी? मार मेको नेल्‍लेम परमप्रभु यावे आ सोक्‍त आ लोव़ पाइनीमी? मार, मेको नेल्‍लेम लोव़ आ अर्थ शेंनीमी? 31 गो मार देंनुङ देंशा हना, परमप्रभु यावे आ सोक्‍तीमी पपाइश्‍शो गेय पनीनु, नेल्‍ल क्‍येङा ठेयब गेय पने। मिनु गो इन कली नेल्‍ल क्‍येङा रिम्‍शो लां कोंइनन्‍नी। १कोरिन्‍थी १४:१,१२

<- १ कोरिन्‍थी 11१ कोरिन्‍थी 13 ->