1 इस्राएल आ तौ आन दाते ङा नेल्‍ल क्‍येङा ङोंइती थिशो रूबेन बाक्‍माक्‍त। नेल्‍ल क्‍येङा ङोंइती थिशो बाक्‍त हना यो, आ आफ आ मीश नु इप्‍तीके, आ ङोंइती थिशो तौ आ तचा ङा अधिकार इस्राएल आ तौ योसेफ आ तौ आस कली गेशो बाक्‍माक्‍त। मिनु रूबेन आ नें, ङोंइती ङा तौ आ नें ब्रेक्‍तीकेम मब्रेक्‍शो बाक्‍माक्‍त। उत्‍पत्ती ३५:२२; उत्‍पत्ती ४९:३-४ 2 मिनु यहूदा आ लोक्‍ब आन दातेमी नेल्‍ल क्‍येङा ठेयब दुम्‍त हना यो, मेको रे पा सासन पाइब का ग्रूत हना यो, ङोंइती थिशो तौ आ अधिकार योसेफ केन दुम्‍शो बाक्‍माक्‍त। उत्‍पत्ती ४९:८,१०; ब्‍यवस्‍था ३३:७; उत्‍पत्ती ४९:२२; ब्‍यवस्‍था ३३:१३-१७ 3 इस्राएल आ ङोंइती थिशो तौ रूबेन बाक्‍त। रूबेन आ तौ हनोक, पल्‍लु, हेस्रोन नु कारमी बाक्‍मा बाक्‍त। प्रस्‍थान ६:१४ 4 योएल आ तौ शेमायाह बाक्‍माक्‍त। शेमायाह आ तौ गोग बाक्‍माक्‍त। गोग आ तौ शिमेइ बाक्‍माक्‍त। 5 शिमेइ आ तौ मीकाह बाक्‍माक्‍त। मीकाह आ तौ रेआयाह बाक्‍माक्‍त। रेआयाह आ तौ बाल बाक्‍माक्‍त। 6 बाल आ तौ बेयराह बाक्‍माक्‍त। मिनु मेको अस्‍सुर ङा पिप ति‍ल्‍गथ-पिलेसेरमी ग्‍याइश्‍शा लाइक्‍चा पुंइसे बाक्‍त। मेको रूबेन आ मुर आन दाते ङा ठेयब मुर का बाक्‍माक्‍त। इतिहास ५:२६ 7 रूबेन आ थर ङा खिं खिं ङा मुर आन नें ब्रेक्‍तीकेमी ब्रेक्‍शो बाक्‍मा बाक्‍त। मेको आन ठेयब मुर यिएल, जकरिया नु 8 आजाज आ तौ बेला बाक्‍मा बाक्‍त। बेला आ तौ शेमा बाक्‍माक्‍त। मेको योएल आ खिं ङा मुर बाक्‍मा बाक्‍त। मेकोपुकी आरोएर सहरम बाक्‍शो बाक्‍मा बाक्‍त। आन रागी नेबो रे बाल-मेओन सम्‍म बाक्‍माक्‍त। 9 मेकोपुकीम पूर्ब गे गोरशो रागी आ ङोंइती युफ्रेटीस खोला आ ओंथ हांबु सम्‍म आन के सेल्‍शो बाक्‍मा बाक्‍त। मारदे हना गिलादम बाक्‍मानु, आन बस्‍तु भाव शुश दुम्‍शो बाक्‍मा बाक्‍त। 10 मेकोपुकी सावल आ पालाम हाग्री नु लडाइ पा ग्राशो बाक्‍मा बाक्‍त। मिनु मेकोपुकीम गिलाद आ पूर्ब नेल्‍लेमी आन ताम्‍बुमी बाक्‍शो बाक्‍मा बाक्‍त।

11 गाद आ मुरपुकी रूबेन आ मुर आन नेक्‍था बाशान रागीम साल्‍का सम्‍म बाक्‍शो बाक्‍मा बाक्‍त। 12 मेको आन ठेयब मुर योएल बाक्‍माक्‍त। मेको आ नोले ङा शाफाम बाक्‍माक्‍त। मेको आस नोले बाशान रागीम यानाइ नु शाफात बाक्‍सा बाक्‍त। 13 मिनु आन मुर, आन खिं खिं ङा मुर सु सु बाक्‍मा बाक्‍त देंशा हना, मिकाएल, मेशुल्‍लाम, शेबा, योराइ, याकान, जिआ नु एबेर नेल्‍ल पा ७ जना बाक्‍मा बाक्‍त। 14 मेकोपुकी अबीहेल आ तौ हुरी, हुरी आ तौ यारोआह, यारोआह आ तौ गिलाद, गिलाद आ तौ मिकाएल, मिकाएल आ तौ येशीशाइ, येशीशाइ आ तौ याहदो, याहदो आ तौ बूज, 15 अब्‍दीएल आ तौ आही, आही आ तौ गुनी मेको आ खिं खिं ङा आन ठेयब मुर बाक्‍मा बाक्‍त। 16 गाद आ मुरपुकी गिलाद, बाशान नु मेको आ नेक्‍था ङा सहर नेल्‍लेमी नु शारोन ङा बस्‍तु भाव योव़तीके सम्‍म बाक्‍मा बाक्‍त। 17 यहूदा ङा पिप योथाम नु इस्राएल ङा पिप येरोबामम सासन पाम्‍से ना मेको आन नें नेल्‍ल नें ब्रेक्‍तीकेम ब्रेक्‍शो बाक्‍मा बाक्‍त। २राजा १५:३२; २राजा १४:२३

18 रूबेन, गाद नु मनस्‍से आ उइक्‍थ थर ङा मुर बोल्‍यो लडाइ पाइब बाक्‍मा बाक्‍त। मेको तेक्‍तीक नु या कुरमे बाक्‍त। मेको लिब्रा आप्‍ब नु लडाइ पाइब जोक्‍ब बाक्‍मा बाक्‍त। मेको ४४ हजार ७ सहे ६० जना बाक्‍मा बाक्‍त। लडाइ पचा कली ठीक दुम्‍शो बाक्‍मा बाक्‍त। 19 मिनु हाग्री, येतुरी, नाफीशी नु नोदाब आ मुर नु लडाइ पामे बाक्‍त। 20 मेकोपुकीमी लडाइम परमप्रभु कली “वारच पाइक्‍की” दे पुंइतीके, मेको आन जोरी सत्रु हाग्री नु अरु सु बाक्‍तेक्‍म हना यो, आन गुइमी गेवा बाक्‍त। मारदे हना मेकोपुकीमी थमा सुदमे बाक्‍त। 21 मेकोपुकीमी बस्‍तु भाव गिश लदमे बाक्‍त देंशा हना, ५० हजार दलओंठ, लाख निक्‍शी ५० हजार भेडा, हजार निक्‍शी गधा नु लाख का मुर आन कली ग्‍याइश्‍शा लदमे बाक्‍त। 22 मेको लडाइम शुश मुर बेक्‍मा बाक्‍त। मारदे हना मेको लडाइ परमप्रभु रे पा दुम्‍शो बाक्‍माक्‍त। मिनु मेकोपुकी ग्‍याइश्‍शा लाइक्‍चा मपुंइसामा सम्‍म मेको आन बाक्‍तीकेम बाक्‍मा बाक्‍त।

23 मनस्‍से आ उइक्‍थ थर ङा मुर शुश दुम्‍शो बाक्‍मा बाक्‍त। मेको बाशान रागी रे बाल-हेरमोन, सेनीर हेरमोन डांडा सम्‍म बाक्‍शो बाक्‍मा बाक्‍त। ब्‍यवस्‍था ३:८-९ 24 मेको आन खिं खिं ङा मुर आन ठेयब मुर सु सु बाक्‍मा बाक्‍त देंशा हना, एफेर, इशी, एलीएल, अज्रीएल, येरमीया, होदावीयाह नु याहदीएल बाक्‍मा बाक्‍त। मेको नेल्‍ल बोल्‍यो लडाइ पाइब मुर बाक्‍मा बाक्‍त। मेको आन खिं ङा ठेयब मुर बाक्‍मा बाक्‍त। 25 तन्‍न मेकोपुकीम आन किकी पिपी आन परमप्रभु आ पर्बम मरिम्‍शो पामे बाक्‍त। मिनु परमप्रभुम मेको आन ङोंइती खतम पोक्‍शो जात ङा मुर आन देवता आन कली पूजा पा आन नोले खोदमे बाक्‍त। 26 मोपतीके इस्राएली आन परमप्रभुमी अस्‍सुर ङा पिप पुल, ति‍ल्‍गथ-पिलेसेरमी कली क्‍युक्‍गा बाक्‍त। मिनु मेकोपुकीम रूवेन, गाद नु मनस्‍से आ उइक्‍थ थर ङा मुर आन कली ग्‍याइश्‍शा लदमे बाक्‍त। मेको आन कली हालाह, हाबोर, हारा नु गोजान खोला सम्‍म लदमे बाक्‍त। मेको मुल सम्‍म मेकेर बाक्‍शो बाक्‍नीम। २राजा १५:१९; २राजा १५:२९

<- १ इतिहास 4१ इतिहास 6 ->