1 مُنسَ تٌ نُ بَرَ كُسِ فِنّ دْشْ، مَرِيَمَ نُن هَرُنَ نَشَ مُنسَ مَقَلَ، 2 عَ قَلَقٍ رَ، «عَلَتَلَ وْيّنمَ مُنسَ نَن فبَنسَن سَابُي رَ؟ عَ مُ وْيّنمَ مُشُ قَن سَابُي رَ؟» عَلَتَلَ نَشَ نَ مَسٍنيِ مّ. 3 مُنسَ نُ قِندِشِ يّتّ مَفٌرٌي نَن نَ دَنفِقٍ مِشِ بِرِن نَ.

4 عَلَتَلَ نَشَ مُنسَ، هَرُنَ، نُن مَرِيَمَ شِلِ كٍرٍن نَ، عَ عٍ بِرِن شَ سِفَ هْرْ مْلِنفِرَ. عٍ تٌ سِفَ نَا، 5 عَلَتَلَ نَشَ فٌرٌ نُشُي كُي هْرْ مْلِنفِرَ دّ رَ. عَ نَشَ هَرُنَ نُن مَرِيَمَ شِلِ. عٍ قِرِن نَشَ عٍ مَسٌ عَ رَ. 6 عَلَتَلَ نَشَ عَ مَسٍن عٍ بّ، «وٌ تُلِ مَتِ ﭑ مَ مَسٍنيِ رَ. ﭑ نَمِحْنمّ شّيمَ وٌ يَ مَ تّمُي نَشّ، ﭑ نَن ﭑ يّتّ مَسٍنمَ نَ كَنيِ بّ لَامَتُنيِ نَن كُي. ﭑ وْيّن عَ رَ شِيٍ رَ. 7 كْنْ ﭑ مَ كٌنيِ مُنسَ تَن فبٍ مُ نَ نَ كِ شّ. عَ تَن قِندِشِ ﭑ دُفُتّفّ نَن نَ ﭑ مَ وَلِ بِرِن كُي. 8 ﭑ نَ ﭑ مَ مَسٍنيِ مَكّنّنمَ عَ بّ، ﭑ مُ تَالِ وْيّنيِ رَوَلِمَ مُشُ تَفِ. ﭑ نَن ﭑ يّتّ مَسٍنمَ عَ بّ، عَ قَ ﭑ نِينِ عِفبّقٍ. مُنقٍ رَ وٌ مُ فَاشُ ﭑ مَ كٌنيِ مُنسَ مَقَلَقٍ رَ؟»

9 عَلَتَلَ نَشَ شْنْ عٍ مَ، عَ قَ كٍلِ عٍ شُن مَ. 10 نُشُي تٌ كٍلِ هْرْ مْلِنفِرَ شُن مَ، مَرِيَمَ قَتٍ نَشَ رَقِيشّ كُنّ رَ كٍرٍن نَ. هَرُنَ تٌ عَ تٌ، كُنّ نَ مَرِيَمَ قَتٍ بِرِن مَ، 11 عَ نَشَ مُنسَ مَيَندِ، «يَندِ، ﭑ مَرِفِ، عِ نَشَ مُشُ رَتْن مُشُ شَ يُنُبِ شَ قٍ رَ، مُشُ نَشَن نَبَشِ مُشُ شَ شَشِلِتَرٍحَ كُي. 12 مَرِيَمَ نَشَ لُ عَلْ دِ نَشَن قَشَشِ عَ نفَ قُرِ، نَشَن قَتٍ سّيتِ بْرْشِ بٍينُ عَ بَرِ تّمُي.» 13 مُنسَ نَشَ عَ شُي رَتٍ عَلَتَلَ مَ، «ﭑ مَرِفِ، ﭑ بَرَ عِ مَشَندِ، عَ رَيَلَن!» 14 عَلَتَلَ نَشَ عَ يَابِ، «شَ عَ بَبَ دّيٍ بْشُن عَ يَتَفِ، عَ مُ يَافِمَ شّ هَن لْشُن كٍرٍن؟ عِ شَ عَ رَ مِنِ حَمَ يَ مَ. عَ نَ فٍ لْشُن كٍرٍن نَبَدٍ حَمَ يٌنكِندٍ قَرِ مَ، وٌ نْمَ عَ رَ سٌدٍ وٌ يَ مَ.» 15 نَ كُي، عٍ نَشَ عَ رَ مِنِ حَمَ يَ مَ، عَ شِ سٌلٌقٍرٍ رَبَ يٌنكِندٍ قَرِ مَ. حَمَ مُ كٍلِ عٍ يٌنكِندٍ هَن مَرِيَمَ نَشَ رَفبِلٍن عٍ يَ مَ. 16 نَ تٌ بَ عَ رَ، حَمَ نَشَ كٍلِ شَسٍرٌتِ، عٍ نَشَ سَ يٌنكِن ثَرَن فبٍنفبٍرٍنيِ مَ.

<- كْنتِ تِقٍ 11كْنتِ تِقٍ 13 ->