1 نُنُ شَ دِ يٌسُوٍ، سّرّشّدُبّ عٍلٍيَسَرِ، نُن شَبِلّ كُنتِفِيٍ كَنَان بْشِ عِتَشُن عِسِرَيِلَكَيٍ مَ كّ رَ يِ كِ نّ. 2 بْشِ نَشَ عِتَشُن عِسِرَيِلَ بْنسْي سٌلٌمَنَانِ نُن عَ تَفِ مَ عَلَ شَ مَلِ سَابُي رَ، عَلْ عَلَتَلَ عَ مَسٍن عَننَبِ مُنسَ بّ كِ نَشّ. 3 بْشِ نَشَن نَ يُرُدّن شُرٍ كِرِ مَ سٌفٍتٍدٍ بِرِ، عَننَبِ مُنسَ نَشَ نَ قِ بْنسْي قِرِن نُن عَ تَفِ مَ، كْنْ عَ مُ بْشِ يٌ قِ لٍوِ بْنسْي تَن مَ. 4 عَننَبِ يُسُقُ بْنسْي نُ بَرَ عِتَشُن قِرِن نَ، مَنَسِ نُن عٍقِرَ مِ. عَننَبِ مُنسَ مُ بْشِ يٌ قِ لٍوِ بْنسْي مَ نَشَن قِندِشِ عٍ فبٍ يَتِ رَ، قٌ تَايٍ، عٍ سَبَتِمَ دّننَشّ نُن قِيلِيٍ عٍ شُرُ سٍيٍ دّ مَدٌنمَ دّننَشّ. 5 عِسِرَيِلَكَيٍ نَشَ نَ بْشِ عِتَشُن عٍ بٌورٍ تَفِ عَلْ عَلَتَلَ عَ مَسٍنشِ كِ نَشّ عَننَبِ مُنسَ بّ.

6 يُدَ بْنسْي ندٍيٍ نُن كٍنِسِ شَ دِ كَلٍبِ نَشَ سِفَ يٌسُوٍ شْن. كَلٍبِ نَشَ عَ قَلَ عَ بّ، «عِ عَ كٌلٌن عَلَتَلَ نَشَن قَلَ عَننَبِ مُنسَ بّ وٌن قِرِن شَ قٍ رَ كَدٍ سِ بَرِنٍيَ. 7 ﭑ حّ تٌنفٌ نَانِ نَن نُ عَ رَ، عَلَتَلَ شَ كٌنيِ عَننَبِ مُنسَ ﭑ شّيشِ تّمُي نَشّ كٍلِقٍ كَدٍ سِ بَرِنٍيَ سِفَقٍ رَ كَنَان بْشِ مَ مّننِ رَبّندٍ. ﭑ تٌ فّ نَ رَ، ﭑ نَشَ دّنتّفّ قَنيِ سَ عَ بّ. 8 ﭑ نَن نفَشَكٍرٍنيِ نَشٍيٍ ﭑ مَتِ نَا، نٍيٍ نَشَ لِمَنِيَ بَ حَمَ يِ رَ، كْنْ ﭑ تَن بِرَ ﭑ مَرِفِ عَلَتَلَ نَن تُن قْشْ رَ. 9 نَ كُي عَننَبِ مُنسَ نَشَ لَايِدِ تٌنفٌ ﭑ بّ يِ كِ، ‹عِ عِ حّرّشِ بْشِ نَشَن مَ، نَ قِندِ مَ نّ عِ تَن نُن عِ شَ دِيٍ كّ رَ تّمُي بِرِن، بَرِ مَ عِ بَرَ بِرَ ﭑ مَرِفِ عَلَتَلَ شُي قْشْ رَ عَ كِ مَ.›»

10 «حّ تٌنفٌ نَانِ نُن سُولِ بَرَ دَنفِ كَبِ عَلَتَلَ نَشَ نَ مَسٍن عَننَبِ مُنسَ بّ، وٌن نُ نَ فبٍنفبٍرٍنيِ مَ تّمُي نَشّ. عَلَتَلَ بَرَ ﭑ مَ سِمَيَ رَ سِفَ هَن حّ تٌنفٌ سٌلٌمَسَشَن عَ نُن سُولِ. 11 تٌ، ﭑ سّنبّ مَن لُشِ عَلْ عَننَبِ مُنسَ ﭑ شّيشِ تّمُي نَشّ. ﭑ نْمَ فٍرٍ سٌدٍ يِ وَشَتِ عَلْ ﭑ نَ رَبَ كِ نَشّ عَ سِنفٍ رَ. 12 عَوَ، عِ شَ يِ فٍيَ بْشِ قِ ﭑ مَ عَلْ عَلَتَلَ لَايِدِ تٌنفٌ ﭑ بّ كِ نَشّ نَ لْشْي. نَ لْشْي عِ نُ عَ كٌلٌن عَنَكِ بْنسْي نَ مّننِ، عٍ شَ تَا شُنفبٍ مَكَنتَشِ عَ قَنيِ رَ. عَلَتَلَ فبَنسَن شَ لُ ﭑ سّيتِ مَ. نَ كُي ﭑ نْمَ عٍ كٍرِدٍ عَلْ عَلَتَلَ عَ مَسٍن كِ نَشّ.»

13 يٌسُوٍ نَشَ دُبَ يٍقُنٍ شَ دِ كَلٍبِ بّ، عَ شٍبِرٌن شَ قِ عَ مَ كّ رَ. 14 نَ تَا نَ عَ شَ دِيٍ بّلّشّ هَن تٌ، بَرِ مَ يٍقُنٍ كٍنِسِكَ شَ دِ كَلٍبِ بِرَ عِسِرَيِلَ مَرِفِ عَلَتَلَ نَن قْشْ رَ. 15 كَبِ نَ تّمُي بْحّسَ نَشَ لُ نَ بْشِ مَ، فٍرٍ يٌ مُ نُ نَ سْنْن. سِنفٍ شٍبِرٌن شِلِ نُ قَلَمَ نّ كِرِيَتِ عَرَبَ، بَرِ مَ عَرَبَ نَن نُ قِندِشِ عَنَكِ مِشِيٍ شَ كُنتِفِ رَ.

<- يٌسُوٍ 13يٌسُوٍ 15 ->