1 سْورِ مَنفّ نٍبُسَرَدَن تٌ عَننَبِ يٍرٍ مِ رَ مِنِ رَ مَ، عَلَتَلَ نَشَ مَسٍنيِ تِ عَ بّ. عَ عَ تٌنفٌ رَ مَ تّمُي نَشّ، يٍرٍ مِ نُ شِرِشِ يْلْنشْنيِ رَ دَرِ سَلَمُكَيٍ نُن يُدَيَكَيٍ تَفِ نَشٍيٍ نُ نَ شَنِنقٍ بَبِلْن بْشِ مَ. 2 سْورِ شُنيِ نَشَ عَننَبِ يٍرٍ مِ شِلِ، عَ عَ قَلَ عَ بّ، «عِ مَرِفِ عَلَتَلَ نُ بَرَ يِ حَشَنكَتّ شَ قٍ قَلَ يِ تَا شِلِ مَ. 3 عَلَتَلَ بَرَ عَ شَ مَسٍنيِ رَكَمَلِ بَرِ مَ وٌ بَرَ يُنُبِ رَبَ عَ رَ. وٌ يِ بِرِن سْتْشِ نّ بَرِ مَ وٌ بَرَ تٌندِ عَ شُي سُشُدٍ. 4 ﭑ بَرَ عِ شْرّيَ يِ يْلْنشْنيِ مَ نَشٍيٍ نَ عِ بّلّشّ مَ. شَ عِ وَ مَ قَقٍ بَبِلْن، ﭑ مّينِمَ عِ مَ. شَ عِ مُ وَ مَ نَ شْن، عِ شَ لُ بٍ، عِ شَ سِفَ عِ وَ مَ دّننَشّ شْن.» 5 عَ تٌ بُ عَ يَابِدٍ، سْورِ شُنيِ نَشَ عَ قَلَ عَ بّ، «فبِلٍن عَشِكَمَ شَ دِ فّدَلَيَ شْن، سَقَن شَ مَمَدِ، بَبِلْن مَنفّ نَشَن تِشِ مَنفّ رَ يُدَيَ تَايٍ شُن. عِ نْمَ لُدٍ حَمَ يَ مَ، شَ نَ مُ عَ رَ عِ نْمَ سِفَدٍ عِ وَ مَ دّننَشّ شْن.» سْورِ شُنيِ نَشَ بَلٌي نُن بُنسٍ قِ عَ مَ، عَ نَشَ عَ لُ عَ شَ سِفَ. 6 عَننَبِ يٍرٍ مِ نَشَ سِفَ عَشِكَمَ شَ دِ فّدَلَيَ شْن مِسِثَ، عَ نَشَ لُ حَمَ يَ مَ نَشَن نُ بَرَ لُ بْشِ مَ.

7 سْورِ مَنفّيٍ نُن سْورِ نَشٍيٍ نُ نَ بْشِ مَ، عٍ نَشَ عَ كٌلٌن بَبِلْن مَنفّ نُ بَرَ عَشِكَمَ شَ دِ فّدَلَيَ تِ مَنفّ رَ بْشِ قَرِ، عَ مَن بَرَ تِن سٍتَرٍ ندٍيٍ، شّمّيٍ، فِنّيٍ، نُن دِيٍ، عٍ شَ لُ بْشِ مَ. 8 نٍتَنِيَ شَ دِ سُمَيِلَ، كَرٍيَ شَ دِيٍ يٌشَنَن نُن يٌنَتَن، تَنشُمّتِ شَ دِ سٍرَيَ، عٍقَيِ نٍتٌقَكَ، نُن مَكَتِكَ شَ دِ يَاسَنِيَ، عَ نُن عٍ شَ مِشِيٍ، عٍ بِرِن نَشَ سِفَ فّدَلَيَ شْن مِسِثَ. 9 عَشِكَمَ شَ دِ فّدَلَيَ، سَقَن شَ مَمَدِ، نَشَ عَ كَلِ عٍ تَن نُن عٍ شَ مِشِيٍ بّ، «وٌ نَشَ سِيكّ كَلِدِكَيٍ رَبَتُقٍ رَ. وٌ شَ لُ بٍ، وٌ شَ بَبِلْن مَنفّ رَبَتُ عَلَكٌ قٍ بِرِن شَ سْونّيَ وٌ بّ. 10 ﭑ تَن شَ لُ بٍ مِسِثَ، ﭑ شَ كَلِدِكَيٍ رَبَتُ نَشٍيٍ ﭑ لِمَ بٍ. وٌ تَن شَ نُ وّنِ بٌفِيٍ بَ، سٌفٌقُرٍ بٌفِ سٍيٍ، نُن تُرٍ. وٌ شَ سَبَتِ وٌ شَ تَايٍ كُي.»

11 يُوِقِ نَشٍيٍ نُ نَ مٌوَبَ، عَمٌنِ، عٍدٌن، نُن يِرٍ فبّتّ، عٍ نَشَ عَ كٌلٌن عَ بَبِلْن مَنفّ نُ بَرَ حَمَ دْنشْي لُ يُدَيَ عَشِكَمَ شَ دِ فّدَلَيَ، سَقَن شَ مَمَدِ شَ يَامَرِ بُن مَ. 12 عٍ نَشَ فبِلٍن يُدَيَ فّدَلَيَ شْنيِ مِسِثَ، كٍلِقٍ بْشِيٍ مَ عٍ نُ بَرَ يٍنسٍن يّ دّننَشّ. عٍ نَشَ وّنِ بٌفِ فبٍفبٍ بَ، عَ نُن سٌفٌقُرٍ بٌفِ سٍ وُيَشِيٍ.

13 كَرٍيَ شَ دِيٍ يٌشَنَن نُن سْورِ يَرٍرَتِيٍ نَشٍيٍ نُ نْشُنشِ وُلَ عِ، عٍ نَشَ سِفَ فّدَلَيَ شْن مِسِثَ، 14 عٍ قَ عَ قَلَ عَ بّ، «عِ بَرَ عَ كٌلٌن عَ عَمٌنِ مَنفّ بَالِ بَرَ نٍتَنِيَ شَ دِ سُمَيِلَ شّي عِ يِرٍ عَلَكٌ عَ شَ عِ قَشَ؟» عَشِكَمَ شَ دِ فّدَلَيَ مُ لَ عٍ رَ. 15 كَرٍيَ شَ دِيٍ يٌشَنَن نَشَ عَ قَلَ فّدَلَيَ بّ فُندٌ رَ مِسِثَ، «عِ شَ تِن ﭑ شَ نٍتَنِيَ شَ دِ سُمَيِلَ قَشَ. مِشِ يٌ مُ عَ كٌلٌنمَ. مُنقٍ رَ عِ عَ لُمَ عَ شَ عِ قَشَ؟ مُنقٍ رَ عَ عَ لُشِ يُدَيَكَيٍ نَشٍيٍ نَ عِ سّيتِ مَ عٍ شَ يٍنسٍن يّ؟» 16 عَشِكَمَ شَ دِ فّدَلَيَ نَشَ كَرٍيَ شَ دِ يٌشَنَن يَابِ، «عِ نَشَ نَ رَبَ. عِ نَشَن قَلَقٍ سُمَيِلَ شُن مَ نَ كِ، وُلٍ نَ عَ رَ.»

<- عَننَبِ يٍرٍ مِ 39عَننَبِ يٍرٍ مِ 41 ->