1 عَلَتَلَ نَشَ يِ سِيٍ لُ كَنَان بْشِ مَ عَلَكٌ عٍ شَ عِسِرَيِلَكَيٍ مَتٌ، نَشٍيٍ مُ نُ نَ فٍرٍ سِنفٍيٍ كٌلٌن. 2 نَ رَبَشِ نّ عَلَكٌ عِسِرَيِلَ لَنقَنمَيٍ شَ نَ فٍرٍ شَ قٍ كٌلٌن، نَشٍيٍ مُ نُ عَ كٌلٌنشِ نُ. 3 سِ نَشٍيٍ لُ كَنَان بْشِ مَ، نٍيٍ نَن يِ كِ؛ قِلِسِتَكَيٍ شَ مَنفّ سُولِ، كَنَانكَيٍ بِرِن، سِدْنكَيٍ، نُن هِوِكَيٍ نَشٍيٍ نُ سَبَتِشِ لِبَن فٍيَيٍ قَرِ، كٍلِقٍ بَلِ شٍرِ مٌن فٍيَ مَ، عَ سَ دْشْ شَمَتَ سٌدٍ دّ رَ.

4 يِ سِيٍ لُ نّ نَا عَلَكٌ عَلَتَلَ شَ عِسِرَيِلَكَيٍ مَتٌ، عَ شَ عَ كٌلٌن شَ عٍ سَ بِرَ مَ عَ شَ سّرِيّ قْشْ رَ، عَ نَشَن سّبّ عٍ بَبَيٍ بّ عَننَبِ مُنسَ سَابُي رَ. 5 عِسِرَيِلَكَيٍ نَشَ سَبَتِ كَنَانكَيٍ، شِتِكَيٍ، عَمٌرِكَيٍ، ثٍرِ سِكَيٍ، هِوِكَيٍ، نُن يٍبُسُكَيٍ تَفِ. 6 عِسِرَيِلَكَيٍ نَشَ مّننِكَيٍ شَ دِ فِنّيٍ دْشْ، عٍ قَن نَشَ عٍ شَ دِ فِنّيٍ قِ مّننِكَيٍ شَ دِ شّمّيٍ مَ. عِسِرَيِلَكَيٍ مَن نَشَ عٍ شَ عَلَيٍ بَتُ.

7 عِسِرَيِلَكَيٍ نَشَ قٍ حَاشِ رَبَ نَشَن مُ رَقَن عَلَتَلَ مَ. عٍ نَشَ نّيمُ عَلَتَلَ مَ، عٍ مَرِفِ عَلَ، عٍ قَ بَلِ كُيٍيٍ نُن عَسٍرِ وُرِ مَسٌلِشِ بَتُ. 8 عَلَتَلَ نَشَ شْنْ عِسِرَيِلَ مَ، عَ قَ عٍ سَ كُسَن رِ سَتَيِمِ سَفٌ، مٍسٌثٌتَمِيَ مَنفّ، عِسِرَيِلَكَيٍ نُ نَ نَشَن شَ يَامَرِ بُن مَ حّ سٌلٌمَسَشَن. 9 عِسِرَيِلَكَيٍ تٌ عَلَتَلَ شِلِ عٍ شُي عِتٍشِ رَ، عَ نَشَ مَرَكِسِمَ رَ مِنِ عٍ بّ، كٍنَسِ شَ دِ عٌتِنِيٍلِ، كَلٍبِ شُنيَ. 10 عَلَتَلَ شَشِلِ نَشَ فٌرٌ عَ مَ. عَ نَشَ قِندِ عِسِرَيِلَ كِيتِسَ رَ. عَ تٌ سِفَ فٍرٍ سٌدٍ، عَلَتَلَ نَشَ مٍسٌثٌتَمِيَ مَنفّ، كُسَن رِ سَتَيِمِ، سَ عَ سَفٌ سّنبّ رَ. 11 بْشِ نَشَ لُ بْحّسَ كُي حّ تٌنفٌ نَانِ. نَ تّمُي كٍنَسِ شَ دِ عٌتِنِيٍلِ نَشَ قَشَ.

12 عِسِرَيِلَكَيٍ مَن نَشَ قٍ حَاشِ رَبَ نَشَن مُ رَقَن عَلَتَلَ مَ. نَ نَن عَ تٌشِ، عَلَتَلَ نَشَ سّنبّ سٌ مٌوَبَ مَنفّ عٍفِلٌن يِ رَ عِسِرَيِلَ شِلِ مَ، نَشَن نُ بَرَ قٍ حَاشِ رَبَ عَلَتَلَ يَ عِ. 13 عٍفِلٌن نَشَ عَمٌنِكَيٍ نُن عَمَلّكِكَيٍ شِلِ، عٍ بِرِن شَ عِسِرَيِلَ فٍرٍ. نَ كُي عٍ نَشَ تُفِ تَا مَسْتْ. 14 عِسِرَيِلَكَيٍ نَشَ لُ مٌوَبَ مَنفّ عٍفِلٌن شَ يَامَرِ بُن مَ حّ قُ نُن سٌلٌمَسَشَن.

15 عِسِرَيِلَكَيٍ تٌ عَلَتَلَ شِلِ عٍ شُي عِتٍشِ رَ، عَ نَشَ مَرَكِسِمَ رَ مِنِ عٍ بّ، فٍرَ بُنيَمِنكَ شَ دِ عٍشُدُ، نَشَن نُ وَلِمَ عَ كْولَ بّلّشّ رَ. عِسِرَيِلَكَيٍ نَشَ عَ شّي، عَ شَ دُوتِ شَنِن مٌوَبَ مَنفّ عٍفِلٌن شْن. 16 عٍشُدُ نَشَ سَنتِدّفّمَ دّ قِرِن يَءِلَن، نَشَن شَ كُيّ نْنفْن يَ كٍرٍن لِمَ، عَ قَ عَ نْشُن عَ شَ دٌنمَ بُن مَ عَ يِرٍقَنيِ تَبٍ قَرِ. 17 عَ نَشَ دُوتِ قِ مٌوَبَ مَنفّ عٍفِلٌن مَ، نَشَن قَتٍ شُنفبٌ عَ فبٍ رَ. 18 عَ تٌ فّ دُوتِ قِدٍ، عَ نَشَ شّمّيٍ رَفبِلٍن نَشٍيٍ نُ بَرَ نَ كٌتٍ شَنِن.

19 عٍشُدُ تٌ كُيٍيٍ لِ نَشٍيٍ نُ نَ فِلِفَلِ، عَ نَشَ فبِلٍن عٍفِلٌن يِرٍ، عَ قَ عَ قَلَ، «مَنفّ، ﭑ وَ مَ فُندٌ ندٍ قَلَقٍ عِ بّ.» مَنفّ نَشَ عَ قَلَ بٌورٍيٍ بّ، «وٌ وٌ مَفبِلٍن سِندٍن.» نَشٍيٍ بِرِن نُ نَ عَ سّيتِ مَ، عٍ نَشَ عٍ مَفبِلٍن. 20 عٍشُدُ نَشَ عَ مَسٌ عٍفِلٌن نَ، نَشَن نُ دْشْشِ عَ شَ كٌنكٌي عِتٍشِ شِنبٍلِشِ كُي، دّننَشّ نُ يَءِلَنشِ عَ كٍرٍن ثٍتِ بّ. عٍشُدُ نَشَ عَ قَلَ عَ بّ، «عَلَ بَرَ ﭑ شّي، ﭑ شَ يِ مَسٍنيِ قَلَ عِ بّ.» عٍفِلٌن نَشَ كٍلِ عَ شَ دْشْسٍ كُي. 21 نَ تّمُي عٍشُدُ نَشَ عَ شَ سَنتِدّفّمَ بَ عَ تّي عِ عَ كْولَ بّلّشّ رَ عَ يِرٍقَنيِ سّيتِ، عَ عٍفِلٌن قُرِ سْشْ عَ رَ. 22 عَ كٌلٍ نُن عَ قّ بِرِن نَشَ سٌ عَ قُرِ، عَ مِنِ عَ قَرِ. تُرٍ نَشَ رَشِ عَ شُن مَ، بَرِ مَ عَ بَرَ سَنتِدّفّمَ لُ نَا.

23 عٍشُدُ تٌ مِنِ كٌنكٌي كُي، عَ نَشَ نَادّ بَلَن عَ شُن مَ سَابِ رَ. 24 نَ دَنفِ شَنبِ، مَنفّ شَ كٌنيِيٍ نَشَ قَ. عٍ نَشَ عَ تٌ كٌنكٌي عِتٍشِ نَادّ بَلَنشِ. عٍ نُ قَ عَ قَلَ، «عَ نَ قٍ ندٍ نَن شُن مَ بَنشِ شِنبٍلِشِ كُي.» 25 عٍ نَشَ مَمّ تِ هَن، كْنْ مَنفّ تٌ مُ نُ كٌنكٌي عِتٍشِ نَادّ رَبِمَ، عٍ نَشَ سَابِ تٌنفٌ، عٍ نَ رَبِ. عٍ نَشَ عٍ شَ مَنفّ تٌ بْشِ مَ، عَ بَرَ قَشَ.

26 عٍ نُ مَمّ تِقٍ تّمُي نَشّ، عٍشُدُ نُ بَرَ عَ فِ. عَ نَشَ دَنفِ كُيٍيٍ يِرٍ رَ، عَ سَ عَ يّتّ رَتَنفَ سٍيِرَ بِرِ. 27 عَ قّقّ سٌ، عَ نَشَ قٍرِ قٍ. عِسِرَيِلَكَيٍ نَشٍيٍ نُ نَ عٍقِرَ مِ فٍيَيٍ قَرِ، عٍ نَشَ فٌرٌ، عٍ نَشَ تِ عَ شَنبِ رَ. 28 عَ نَشَ عَ قَلَ عٍ بّ، «وٌ بِرَ ﭑ قْشْ رَ، بَرِ مَ عَلَتَلَ بَرَ وٌ يَشُي مٌوَبَكَيٍ سَ وٌ سَفٌي.» عٍ نَشَ بِرَ عَ قْشْ رَ، عٍ سِفَ، عٍ سَ تِ يُرُدّن شُرٍ دّ مٌوَبَ بِرِ رَ. عٍ مُ تِن مِشِ فبّتّ شَ شُرٍ عِفِرِ مّننِ. 29 نَ وَشَتِ بُن مَ، عٍ نَشَ مٌوَبَكَ شّمّ فبَنفبَلَنيِ مِشِ وُلُ قُ قَشَ. مِشِ يٌ مُ نْ عَ فِدٍ عٍ يَ مَ. 30 نَ لْشْي عِسِرَيِلَكَيٍ نَشَ مٌوَبَكَيٍ رَيَافِ. بْشِ نَشَ لُ بْحّسَ كُي حّ تٌنفٌ سٌلٌمَسَشَن.

31 نَ تٌ دَنفِ، عَنَتِ شَ دِ سَمَفَرِ نَشَ قِندِ كِيتِسَ رَ. عَ نَشَ قِلِسِتَكَ شّمّ مِشِ كّمّ سٍننِ قَشَ نِنفٍ رَحّرّ وُرِ رَ. نَ كُي عَ قَن نَشَ عِسِرَيِلَ رَتَنفَ.

<- كِيتِسَيٍ 2كِيتِسَيٍ 4 ->