4
عِسِرَيِلَ شَ تِنشِنتَرٍيَ
1 عِسِرَيِلَكَيٍ، وٌ عَلَتَلَ شَ وْيّنيِ رَ مّ،
بَرِ مَ كِيتِ نَ وٌ نُن عَلَتَلَ تَفِ.
«نْندِ نُن هِننّ بَرَ حْن وٌ يَ مَ.
وٌ مُ ﭑ كٌلٌنشِ عَلَ رَ وٌ شْنيِ سْنْن.
2 دَنكّ مَتِقٍ، وُلٍ، قَشّ تِ، مُحّ، لَنفٌيحَ
نَن فبَنسَن فبٌشِ وٌ يِ رَ.
قَشّ تِمَ تّمُي بِرِن.
3 وٌ شَ بْشِ قَمَ لُدٍ سُننُنيِ كُي نَ نَن مَ.
نَشٍيٍ بِرِن سَبَتِشِ عَ مَ،
عٍ قَشَمَ نّ عٍ نُن سُبٍيٍ، شْنِيٍ، نُن يّشّيٍ رَ.
عٍ بِرِن قَشَمَ نّ.»
4 «كْنْ مِشِ يٌ نَشَ كَلَمُي تِ،
مِشِ يٌ نَشَ حَمَ رَكِيتِ.
وٌ شَ حَمَ نَن وٌ تَن سّرّشّدُبّيٍ كَلَمُمَ.
5 وٌ بِرَ مَ نّ يَنيِ رَ، وٌ بِرَ كْي رَ.
هَلِ نَمِحْنمّيٍ، عٍ تَنتَنمَ.
ﭑ قَمَ وٌ نفَ عِسِرَيِلَ قَشَدٍ نَ نَن مَ.
6 ﭑ مَ حَمَ نَ قَشَقٍ، عَ كٌلٌنتَرٍيَ مَ.
وٌ تٌ بَرَ وٌ مَكُيَ ﭑ كٌلٌنقٍ رَ،
ﭑ قَن بَرَ وٌ مَكُيَ ﭑ مَ سّرّشّدُبّحَ رَ.
وٌ تٌ بَرَ وٌ مَرِفِ عَلَ شَ سّرِيّ رَبّحِن،
ﭑ قَن بَرَ وٌ شَ دِيٍ رَبّحِن.
7 سّرّشّدُبّيٍ وُيَشِ كِ نَشّ،
عٍ شَ يُنُبِيٍ قَن وُيَشِ نَ كِ نّ.
ﭑ عٍ شَ بِنيّ مَسَرَ مَ يَافِ رَ نَ نَن مَ.
8 عٍ بَلٌمَ ﭑ مَ حَمَ شَ سّرّشّيٍ رَ.
نَ كُي، عٍ مَن نٍيٍ رَدِن يّ يُنُبِ رَبَقٍ مَ
عٍ تَن يّتّ نَشَن نَبَمَ،
عَلَكٌ عٍ مَن شَ سّرّشّ فبّتّيٍ سْتْ.
9 حَمَ يٌ، سّرّشّدُبّيٍ يٌ،
ﭑ عٍ بِرِن حَشَنكَتَمَ نّ عٍ شَ يُنُبِيٍ شَ قٍ رَ،
ﭑ عٍ سَرٍ رَفبِلٍنمَ نّ عٍ مَ.»
10 «عٍ عٍ دّفٍمَ نّ، كْنْ عٍ مُ قَمَ لُفَدٍ.
عٍ كُيٍيٍ بَتُمَ نّ، كْنْ نٍيٍ مُ عٍ رَفٍينِمَ،
بَرِ مَ عٍ بَرَ عَلَتَلَ رَبّحِن.
11 عٍ لَنفٌيحَ رَبَمَ،
عٍ بٍيرٍ مْولِ بِرِن مِنمَ.
نَ نَن عٍ شَشِلِ كَنَشِ.
12 ﭑ مَ حَمَ مَشْرِنيِ تِمَ كُيٍ مَ.
عٍ يَابِ ندٍ سْتْمَ نَ وُرِ شُنتُنيِ رَ.
لَنفٌيحَ رَبَقٍ بَرَ لُ عٍ بْحّ كُي.
نَ بَرَ عٍ رَلْي،
نَ بَرَ عٍ مَكُيَ عَلَ رَ.
13 عٍ سّرّشّ بَمَ فٍيَيٍ قَرِ،
مّننِ عٍ سُرَيِ قَن فَنمَ سّرّشّ رَ.
عٍ نَ رَبَمَ وُرِ شُنفبٍيٍ بُن مَ، نِينِ فبٌ دّننَشّ.
نَ كُي وٌ شَ دِ فِنّيٍ لَنفٌيحَ رَبَمَ،
وٌ شَ مَمَدِيٍ قَن بَرَ قِندِ يّنّ رَبَيٍ رَ.»
14 «ﭑ مُ قَمَ وٌ شَ دِ فِنّيٍ نُن وٌ شَ مَمَدِيٍ حَشَنكَتَدٍ عٍ شَ لَنفٌيحَ شَ قٍ رَ،
بَرِ مَ وٌ تَن قَن حّنفّيٍ سُشُمَ.
وٌ بِرِن سّرّشّ بَمَ كُيٍيٍ بّ.
حَمَ شَشِلِتَرٍ لُمَ نَ فَنتَنيِ كُي.
15 شَ عِسِرَيِلَ بَرَ بِرَ لَنفٌيحَ قْشْ رَ،
وٌ تَن يُدَيَكَيٍ، وٌ نَشَ نَ مْولِ رَبَ.
وٌ نَشَ سِفَ فِلِفَلِ، وٌ نَشَ تٍ بٍتِ عَوٍنِ.
وٌ نَشَ وٌ كَلِ عَلَتَلَ شِلِ رَ مّننِ.
16 شَ عِسِرَيِلَ لُمَ عَلْ نِنفٍ كَلَبَنتٍ،
عَلَتَلَ مُ نْمَ عٍ رَبَلٌدٍ عَلْ يّشّي قَنيِيٍ،
عٍ نَشٍيٍ دّ مَدٌنمَ قِيلِ شُنفبٍيٍ مَ.
17 عٍقِرَ مِكَيٍ بَرَ كَنكَن كُيٍ مَ.
وٌ شَ عٍ لُ نَ.
18 عٍ شَ بٍيرٍ نَ حْن، عٍ شَ لَنفٌيحَ قَن تٌنفٌ.
عٍ شَ مَنفّيٍ وَشِ يَافِ نَن تُن شْن مَ.
19 قٌيٍ قَمَ عٍ رَ قَنَقَنَندٍ نَ نَن مَ.