1 نَ تّمُي عَلَتَلَ نَشَ عَ مَسٍن مُنسَ بّ، «عَ قَلَ هَرُنَ بّ، عَ شَ عَ شَ يِسُشُوُرِ عِتَلَ بَايٍ، شُرٍيٍ، نُن دَبٌنيِ بِرِن شُن مَ عَلَكٌ لَنشَنسَرِ مَيٍ شَ تٍ نِلِ شُرٍ مَ، عٍ سٌ مِسِرَ بْشِ مَ.» 2 هَرُنَ تٌ عَ شَ يِسُشُوُرِ عِتَلَ مِسِرَ يٍيٍ شُن مَ، لَنشَنسَرِ مَيٍ نَشَ تٍ مِسِرَ بْشِ بِرِن مَ. 3 مَندُرُلَيٍ قَن نَشَ نَ كَابَنَكٌ مْولِ رَبَ، عٍ قَن نَشَ لَنشَنسَرِ مَيٍ رَ سٌ مِسِرَ بْشِ مَ.

4 نَ دَنفِ شَنبِ قِرَوُنَ نَشَ مُنسَ نُن هَرُنَ شِلِ، عَ عَ قَلَ عٍ بّ، «وٌ سَ عَلَتَلَ مَشَندِ، عَلَكٌ لَنشَنسَرِ مَيٍ شَ كٍلِ ﭑ تَن نُن ﭑ مَ حَمَ شُن مَ. ﭑ قَمَ عِ شَ حَمَ رَبّحِندٍ، عٍ شَ سِفَ سّرّشّيٍ بَدٍ عَلَتَلَ بّ.» 5 مُنسَ نَشَ عَ قَلَ قِرَوُنَ بّ، «مَنفّ، عِ فبٍ بِنيّ. عِ شَ نَتّ تٌنفٌ لْشْي سَقٍ رَ لَنشَنسَرِ مَيٍ شَ كٍلِ عِ تَن، عِ شَ كُنتِفِيٍ، نُن عِ شَ حَمَ شُن مَ، عٍ شَ لُ نِلِ شُرٍ فبَنسَن مَ.» 6 عَ نَشَ عَ يَابِ، «تِنَ.» مُنسَ نَشَ عَ قَلَ، «عَ قَمَ رَبَدٍ نَ كِ نّ، عَلَكٌ عِ شَ عَ كٌلٌن، مُشُ مَرِفِ عَلَتَلَ مَنِيّ مُ نَ. 7 لَنشَنسَرِ مَيٍ قَمَ كٍلِدٍ عِ تَن، عِ شَ كُنتِفِيٍ، نُن عِ شَ حَمَ شُن مَ، عٍ قَ لُ نِلِ شُرٍ مَ.»

8 مُنسَ نُن هَرُنَ تٌ مِنِ قِرَوُنَ شْنيِ، مُنسَ نَشَ عَلَتَلَ مَشَندِ لَنشَنسَرِ مَيٍ شَ قٍ رَ نَشٍيٍ نُ قِرَوُنَ تْورْ مَ. 9 عَلَتَلَ نَشَ مُنسَ شَ مَشَندِ سُشُ. لَنشَنسَرِ مَيٍ نَشَ قَشَ بَنشِيٍ، شَندّيٍ، نُن دَاشَيٍ كُي. 10 مِشِيٍ نَشَ عٍ كٌتٌ، عٍ شِرِ حَاشِ قَ دِن بْشِ بِرِن نَ. 11 كْنْ قِرَوُنَ تٌ عَ تٌ نَ قٍ نُ بَرَ دَنفِ، عَ مَن نَشَ عَ شَشِلِ رَشْرْشْ، عَ مُ تِن مُنسَ نُن هَرُنَ شُي رَ، عَلْ عَلَتَلَ عَ مَسٍن كِ نَشّ.