1 وٌ مُ لَن وٌ شَ نِنفٍ شَ نَ مُ يّشّي بَ سّرّشّ رَ وٌ مَرِفِ عَلَتَلَ بّ، نَشَن كّحَ مُ قَن، شَ نَ مُ عَ رَ نَشَن مَبّنشِ، بَرِ مَ وٌ مَرِفِ عَلَتَلَ نَ قٍ مْولِ شْنشِ.

2 شَ وٌ مِشِ ندٍ تٌ وٌ شَ تَايٍ كُي، وٌ مَرِفِ عَلَتَلَ نَشٍيٍ قِشِ وٌ مَ، نَشَن عَلَ فبّتّ بَتُمَ، عَ بَرَ قٍ حَاشِ رَبَ نَشَن مُ رَقَن وٌ مَرِفِ عَلَتَلَ مَ. عَ بَرَ عَلَ شَ سَاتّ مَتَندِ 3 تُوبِ رَبِرَقٍ عَلَ فبّتّيٍ بّ، شَ نَ مُ سٌفٍ، كِكٍ، نُن تُنبُييٍ بّ. 4 وٌ نَ نَ قٍ مْولِ عِقَلّ مّ، وٌ شَ عَ شْن نَقٍن عَ قَنيِ رَ. وٌ نَ عَ كٌلٌن نَ قٍ شْنشِ بَرَ رَبَ عِسِرَيِلَ بْشِ مَ، 5 عَ نَ قِندِ شّمّ رَ، شَ نَ مُ فِنّ، وٌ عَ كَنيِ شَنِنمَ تَا سٌدٍ دّ نَن نَ، وٌ عَ مَفْنْ فّمّ رَ هَن عَ شَ قَشَ.

6 مِشِ نَشَن لَن عَ شَ قَشَ، عَ مُ قَشَمَ سِندٍن قٌ عَ تٌنفٌ سٍيدٍ قِرِن شُي مَ، شَ نَ مُ عَ رَ سَشَن. عَ مُ لَن عَ شَ قَشَ سٍيدٍ كٍرٍن فبَنسَن شُي مَ. 7 سٍيدٍيٍ نَن سِنفٍ فّمّ وٌلِمَ عَ مَ عَ قَشَقٍ رَ، حَمَ دْنشْي قَن قَ عَ مَفْنْ. وٌ قٍ حَاشِ حْنمَ وٌ تَفِ نَ كِ نّ.

8 شَ قَشَ كِيتِ بَرَ قَ، شَ نَ مُ عَ رَ فَلَنبُي، شَ نَ مُ مَشْنّ، نَشَن قِندِشِ كِيتِ شْرْشْي رَ وٌ بّ تَا كُي، وٌ شَ سِفَ يِرٍ وٌ مَرِفِ عَلَتَلَ دّننَشّ سُفَندِشِ. 9 وٌ سِفَمَ لٍوِكَ سّرّشّدُبّيٍ نَن شْن، عَ نُن كِيتِسَيٍ نَشٍيٍ نَ وٌ شُن مَ، وٌ عَ تَفِ رَبَ عٍ بّ. عٍ عَ قَلَمَ وٌ بّ نَ تّمُي عَ لَن كِيتِ شَ سَ كِ نَشّ. 10 عٍ نَشَن قَلَمَ وٌ بّ يِرٍ، وٌ مَرِفِ عَلَتَلَ دّننَشّ سُفَندِشِ، وٌ كِيتِ بٌلٌنمَ نَ كِ نّ. عٍ نَشَن قَلَمَ وٌ بّ، وٌ شَ نَ بِرِن نَبَ. 11 عٍ سّرِيّ نَشَن بِرِن قَلَمَ وٌ بّ، وٌ شَ نَ رَبَ. وٌ نَشَ بِنيَ يِرٍقَنيِ مَ، شَ نَ مُ كْولَ مَ. 12 شَ مِشِ ندٍ، عَ شَ يّتّ عِفبٌحَ كُي، مُ عَ تُلِ مَتِ كِيتِسَيٍ نُن سّرّشّدُبّيٍ رَ، وٌ مَرِفِ عَلَتَلَ نَشٍيٍ سُفَندِشِ عَ شَ وَلِ رَبَقٍ مَ، نَ كَنيِ لَنمَ نّ عَ شَ قَشَ. وٌ قٍ حَاشِ حْنمَ وٌ تَفِ نَ كِ نّ عِسِرَيِلَ. 13 حَمَ بِرِن قَمَ لُدٍ فَاشُي نَن كُي نَ تّمُي. عٍ نَ يِ قٍ مّ نَشَن نَبَشِ، مِشِ فبّتّ يٌ مُ سُو سَمَ نَ يّتّ عِفبٌحَ مْولِ رَبَدٍ قَ.

14 وٌ نَ سٌ بْشِ مَ تّمُي نَشّ، وٌ مَرِفِ عَلَتَلَ دّننَشّ قِمَ وٌ مَ، وٌ نَ سَبَتِ نَا، تّمُندٍ وٌ قَمَ نّ عَ مَحْشُندٍ وٌ قَن شَ وٌ فبٍ مَنفّ سْتْ عَلْ بٌورٍ سِ نَشٍيٍ وٌ رَبِلِنشِ. 15 وٌ مَرِفِ عَلَتَلَ نَ مِشِ نَشَن سُفَندِ، نَ نَن قَمَ قِندِدٍ وٌ شَ مَنفّ رَ. وٌ نَشَ تِن شْحّ شَ قِندِ وٌ شَ مَنفّ رَ، وٌ نفَشَكٍرٍنيِ مُ نَشَن نَ. 16 عَ مُ لَن سٌي فبٍفبٍ شَ لُ وٌ شَ مَنفّ يِ رَ. عَ مُ لَن عَ شَ مِشِيٍ رَ سَنبَ مِسِرَ عٍ سَرَدٍ، بَرِ مَ عَلَتَلَ عَ قَلَشِ نّ وٌ بّ، عَ وٌ نَشَ سِفَ نَ بْشِ مَ سْنْن. 17 عَ مُ لَن عَ شَ فِنّ فبٍفبٍ دْشْ. نَ قٍيٍ نَن قَمَ عَ رَفبِلٍندٍ عَلَتَلَ قْشْ رَ. عَ مُ لَن عَ شَ فبٍتِ فبٍفبٍ نُن شّيمَ فبٍفبٍ مَلَن.

18 مَنفّ نَ دْشْ عَ شَ مَنفّ كِبَنيِ تّمُي نَشّ، سّرِيّ كِتَابُي نَشَن نَفَتَشِ لٍوِكَ سّرّشّدُبّيٍ يِ رَ، عَ شَ نَ مِسَالِ يَءِلَن عَ يّتّ بّ. 19 عَ شَ نَ كِتَابُي رَفَتَ عَ قّ مَ، عَ شَ عَ شَرَن لْشْي بِرِن عَ شَ سِمَيَ كُي، عَلَكٌ عَ شَ فَاشُ عَ مَرِفِ عَلَتَلَ يَ رَ، عَ مَن شَ نْ عَ شَ سّرِيّ نُن عَ شَ يَامَرِ رَبَتُدٍ نَشَن سّبّشِ عَ كُي. 20 نَ قٍ نَن قَمَ عَ نِيَدٍ، عَ مُ عَ يّتّ رَقِسَ عَ نفَشَكٍرٍنيِيٍ بّ، عَ مَن مُ تَنتَن سّرِيّ مَ، عَ مُ بِنيَ يِرٍقَنيِ مَ نُن كْولَ مَ. نَ تّمُي عَ مَنفّيَ شْنكُيٍ سْتْمَ نّ، عَ تَن نُن عَ شَ دِيٍ عِسِرَيِلَ حَمَ تَفِ.

<- مَسٍنيِ دْنشْي 16مَسٍنيِ دْنشْي 18 ->