1 Ɲaxankatɛ na Tirekae bɛ.

«Tarasisi kunkui kanyie, wo xa wo wa xui ite,

barima Tire bɔxi xun bara rakana.

Banxi mu luma naa sɔnɔn,

wafu birin bara kana.»

Sipirika ndee xa masenyi nan na ki.

2 Wo wo sabari, wo tan naxee sabatixi baa dɛ ra,

wo tan naxee findixi yulɛe ra Sidɔn taa kui,

wo tan naxee bara naafuli sɔtɔ yulɛya ra wafu dɛ saabui ra.

3 Baa bara a niya wo xa sansi xɔri sɔtɔ kelife Sixori.

Daxamui naxan mini Nili xure dɛ ra, na nan findixi bannaya ra wo bɛ.

Ɲamanɛe xa makiti xungbe raba nɛ wo xɔnyi.

4 Sidɔnkae, wo yaagi,

wo tan naxee xa nɔɛ nu na baa xun ma.

Xui nde minima kelife baa ma, a naxɛ,

«N luxi nɛ alɔ di baritare,

naxan mu di bari xɔnɛ kolon,

naxan mu di yo barima,

naxan mu di yo ramɔma, xɛmɛ xa na mu a ra ginɛ.»

5 Misirakae na na xibaaru mɛ Tire xa fe ra,

e fama nɛ gaaxude.

6 Wo xa siga Tarasisi.

Wo tan naxee na baa dɛ ra, wo xa wo wa xui ite.

7 Singe wo xa taa nu na ɲɛlɛxinyi nan kui,

kɔnɔ yakɔsi nde wo xa mixie xaninxi yire makuye?

8 Nde yi natɛ tongoxi Tire xili ma,

a tan naxan nu mangɛ tima,

a tan naxan xa yulɛe nu findixi kuntigie ra,

a tan naxan xa yulɛe nu binyaxi duniɲa birin ma?

9 Alatala Sɛnbɛma nan yi natɛ tongoxi,

alako yɛtɛ igboya xa kana,

xili xungbe kanyie xa magoro.

10 Tarasisikae, wo xa bɔxi rawali

alɔ a rabama Nili xure dɛ ra ki naxɛ,

barima Sidɔn nun Tire xa wafue mu na sɔnɔn.

11 Alatala bara a bɛlɛxɛ itala baa xun ma,

a bara mangɛyae rasɛrɛn.

A bara yaamari fi Fenisiya xa yire makantaxie xa kana.

12 A naxɛ, «I tan Sidɔn taa tofanyi,

i mu luma bere ra sɔnɔn,

e fama nɛ i xun nakanade feo.

Hali wo wo gi Sipiri suri ma,

wo mu bɔɲɛsa sɔtɔma.

13 Kalide bɔxi mato ba. E xun bara rakana.

Asiriyakae bara sa wulai subee sagoe.

E bara e xa yire makantaxie rabilin,

e fa e gere han sese mu luxi sɔnɔn.»

14 «Tarasisi kunkui kanyie, wo xa wo wa xui ite,

barima wo xa wafu makantaxi xun bara rakana.»

15 Tire luma nɛɛmui nan kui han ɲɛ tongo solofere, mangɛ keren xa bui xasabi. Ɲɛ tongo solofere raɲɔnyi, fe fama rabade Tire bɛ alɔ a falaxi sigi kui langoe ginɛ xa fe ra ki naxɛ,

16 «I tan langoe ginɛ, birin nɛɛmuxi naxan ma,

i xa kɔra bɔnbɔ a fanyi ra taa kui,

i xa sigi sa alako mixie xa ratu i xa fe ma.»

17 Ɲɛ tongo solofere raɲɔnyi, Marigi a ya rafindima nɛ Tire ma. A gbilenma nɛ a xa langoeɲa fori ma, a a yɛtɛ sa duniɲa mangɛyae birin sagoe kɔbiri xa fe ra. 18 Kɔnɔ a xa geeni fama rawalide Alatala xa fe nan kui. A mu nɔma na ragatade a yɛtɛ bɛ, a luma mixie nan bɛ naxee birama Alatala fɔxɔ ra, alako e xa donma fanyie nun baloe gbegbe sɔtɔ.

<- Annabi Esayi 22Annabi Esayi 24 ->