1 Par sǝ ɓǝ Pita kǝ Joon mo kàa nLu Naan ɗeɗes mbǝ ɗangnaan koo kun ɗe mǝ puus sǝ. 2 Yaksǝ mo kat mee gwar ɗe mo làa wur a kurumkut mpwoo lu nǝ, ɗe moo pet a Ɗeret. Koo puus ɗeɗangyii ɓǝ moo mang wur jì le mpwoo lu nǝ, mbǝkǝ nwur ɗang shool ɗi pǝ nen ɗe moo ɗel nɗǝǝn Lu Naan ɗeɗes nǝ. 3 Kaaɗe wur naa Pita kǝ Joon mo mbǝ ɗel nɗǝǝn Lu Naan nǝ, ɓǝ wur ɗang shool pǝ mo. 4 Pita kǝ Joon mo ban yit nkaa wur. Ɓǝ Pita sat ngwar nǝ nǝnee, <<A naa mun.>> 5 Yaksǝ wur lepyit nkaa mo, mbǝɗe wur pan nǝ, mon nshin mee mbii nɗin. 6 Pita sat ngwar nǝ nǝnee, <<Baa an kǝ mee shool azurfa, koo zinariya kas. Mbii ɗe an kǝ nǝ, ɓǝ an nshin ngha. Nɗǝǝn sǝm kǝ Jesu Kristi ngu Nazaret, a yool a mwaan.>> 7 Pita yaa sarse mǝ gwar nǝ, kǝn nwur wur ɗiyeep gwar nǝ ɗi. Yaksǝ abet-abet, ɓǝ kwakshii wur mo, kǝ ɓaas wur mo katɓal. 8 Ɓǝ gwar nǝ yool mǝreppee shi shii fin mo, ɗang wur ɗoom mwaan, dǝm ɗel nɗǝǝn Lu Naan ɗeɗes nǝ ashak kǝ mo zak. Wur nkaa mwaan, ɗang wur nkaa mǝreppee, kǝzak wur nkaa kwoop Naan. 9 Kaaɗe gurum mo naa wur nkaa mwaan, ɗang wur nkaa kwoop Naan, 10 ɓǝ mo man nǝ, a gwar ɗe di moo mang wur jì le mpwoo lu Naan ɗe moo pet a Ɗeret mbǝkǝ nwur ɗang shool ɗi pǝ gurum mo. Nǝ aapwoo ngurum nǝ mo zam, kǝzak nǝ lekǝǝrmuut mo mbǝ mbii ɗe mo cin ngwar nǝ.

11 Kaaɗe gwar nǝ wur ɗyiin nɗang Pita kǝ Joon, ɓǝ nǝ aapwoo ngurum nǝ mo zam, yaksǝ mo su dǝm pǝ mo ɗi nɗǝǝn kuut ɗe moo pet a mǝ Solomon. 12 Kaaɗe Pita naa a kǝsǝ, ɓǝ wur sat ngurum nǝ mo nǝnee, <<Wun nen Isreil mo! A mii le ɗang bar gwar ɗesǝ nǝ aapwoo nwun yii? A mii le ɗang wuu ban yit nkaa mun, koo a shi mee ɗeɗes fun, koo a shi mee ɗeret fun, ɗang mu le ngwar ɗesǝ mwaan yii? 13 A Naan mǝ Abraham kǝ mǝ Aizik kǝ mǝ Jekop, kǝ mǝ puun fun mo, a wur le nguɗak fin Jesu a ɗeɗes. Dǝ a wun wu seet Jesu, ɗang wu cii wur ntoom Pailet, kaaɗe Pailet sat nǝ, ɗyin mbǝ ɓwet Jesu. 14 Dǝ wu cii ngwe Ɗeɓang, ɗewur a ngwe ɗe ndǝre, mbǝkǝ nwun ɗang mmo ɓwet a ngutukáa ɗi nwun. 15 Wu tu ngwe ɗewur a tuus mǝ seen, ɗe a wur shin seen ngurum mo. Ɗangɓe Naan yool kǝ wur a peemúut, ɗang mun a langtǝng mǝnǝ. 16 A shi shinzeen nɗǝǝn sǝm kǝ Jesu, a nǝ le ɗang gwar ɗesǝ, kat bar. Gwar ɗe wu naa, kǝ ɗe wu man sǝ. A nɗǝǝn sǝm kǝ Jesu, kǝ shinzeen ɗe nǝ put pǝ wur ɗi, a nǝ le ngwar ɗesǝ wur ɗee a ngu nkoom kǝdǝng-dǝng, a yit fuu jir.

17 <<Yaksǝ ɗyemnaa mo, wen man nǝ, mbii ɗe dǝ wun kǝ nennan fuu mo, wu cìn nJesu, ɓǝ dǝ wu cìn a mbǝ ciin man. 18 Ɗangɓe Naan yit kǝ mo cìn mbii ɗesǝ mo jir, a mbǝkǝ mmo gampwoo ɗe gyet Naan kǝ ten sat mpwoo nensatpwoo fin mo nǝ, Kristi fin mbǝ shwaajeel. 19 Wu tuwap, mbǝkǝ nwun ciir pǝ Naan ɗi, mbǝkǝ nNaan fwoo shikbish fuu mo ɗi nwun. Katɗang wu tuwap azeen-zeen, ɓǝ Naan mbǝ naa ngam wun shi mbii ɗe mo a mǝ Riin fin, mbǝkǝ taji nǝ waam wun kas. 20 Kǝ wur mbǝ lep Jesu Kristi, ɗewur kǝ ten bǝlǝp wur mbǝ wun. 21 Wur mbǝ tong nɗǝǝn ɗengnaan, dǝm wul parɗe Naan ciir kǝ mbii mo ɗee a ɗepwoo jir akuɗang. Kaaɗe gyet Naan kǝ ten cweer mpwoo nensatpwoo fin ɗeɓang mo pǝgyet ɗi yam-yam sǝ. 22 Gyet Mosis sat nǝnee, <Daa Naan fuu mbǝ yool kǝ mee ngusatpwoo fin nwun, mɓut nnen fuu mo, kaa wen sǝ.> Nǝ a tǝng nwun lekom, kǝ nwun kǝlǝng mbii ɗewur mbǝ sat mo ɗi nwun jir. 23 Koo a ngwe ɗeɗangyii ɗe baa wur mbǝ lekom kǝ nwur kǝlǝng ngusatpwoo Naan mǝnǝ ɗi kas, ɓǝ mon nshang wur baa kǝ nǝ mɓut nen Naan mo. 24 Nensatpwoo mǝ Naan mo jir, yool mɓít Samuwel, kǝ nensatpwoo Naan ɗe mo jì mɓwoon wur zak, mo jir mo kǝ ten leshap nkaa teer ɗesǝ mo. 25 Pwoo ɗe gyet Naan wur cweer mpwoo nensatpwoo fin mo nǝ a mbǝ wun, kǝ nwun sekop mǝ mbii ɗe gyet Naan wur kǝ ten cweer mpuun fuu mo shi toom, kǝ ɗe gyet wur sat Abraham nǝnee, <A nɗǝǝn ɗang fwaa, ɓǝ gurum ɗe nɗǝǝn yil nǝ mo jir, mon nkat ɗeret.> 26 Kaaɗe Naan wur bǝlǝp nguɗak fin, ɓǝ Naan wur shee lep wur shin jì a pǝ wun ɗi, mbǝkǝ nwur le ɗeret ɗi nkaa wun, kǝ mbǝkǝ nǝ ciir ɗi kǝ koo a wii nɗǝǝn wun, kǝ nwur yit cìn mbii ɗebish mo ɗi.>>

<- Ɗak Jeplep 2Ɗak Jeplep 4 ->