1 Koornopeik ruk mut kor mnam muk mang e Yesus he kmokpom kar, kua havaeng nguk te, o mia ruk lgititge mnam muk nga mur el mar mruo kam kol a ngaeha to kam patter o mia, nang nong kavurgem mnam muk e. Ekam ko mor ruk ngoma patter o mia, muta mnor mang ngor he te, E Nut nera sovet hak kam momngan kar mor, vanang ner lo vua sovet kam momngan kar o vrong mia akuruk enang tok e.

2 Ii, ko mor tgus ngom kaeharom o kerkeknen ngo matneik ruk ngoma vuut vgum mar. Vanangko enangthe a mhel tang nap smia nho mang ka gu kam ngam o rhek he lo gi vrong rere kmeharom a kerkeknen orom karo rhek, va ta khenam te, a mhel to endo karo keknen tgus ngat ngae rkieng E Nut ktakor ko en te smia mnor kam nho mang ka vok tgus tok kat. Vanangko erieto mnam muk ta vle tok?

3 Ko kais kam keknen ngang nguk mang o bulmakau ko si mar a ngaemslang ka mten to ka vok kla laut, vanangko o mia ngma paam ngaro vorngap he ka kleng ke vu to ke sie pum kmit mar kam nho mang ngar tok, he nang o bulmakau kmikkiem a mhel ka svil enang tok. 4 Va ko kais kam keknen ngang nguk mang a langail to alautar tok kat, ko si alautar, he a ngausgi to a serpgar nma kol kam ngae, vanangko o mia ngama plangail mnam orom a parai to ke sie hak kam ngae mnam ani mhe to endo ta plangail orom ta svil kam ngae ko tok. 5 Va a mhel ka naprai tgia vle her gi enang tok kat arhe, ko en ke gi sie e, vanangko a mhel nam lo smia nho ekam, nang kaeharom o kerkeknen ruk kam ho mrua hover en mruo tgus orom.

Ii, va mut kais kam pat mang mularo luteik kat ko muma ngampaei pmar, ko si a paei ke vallang ke sie tok kat, vanangko tkais ge kam vurvur mnam a loot to endo kmem tgus hak. 6 Va a mhel ka naprai tgia vle her gi enang a paei ke vallang tok kat arhe, ekam ko a mhel nam lo smia nho ekam karo rhek, nang kle kaeharom o kerkeknen ngarlavurgem ngang klenar oromar. Ii, a mhel ka naprai ta vle te, ka vok ka mhe to ke vu sie mnam ka vok karo mhetor tgus, vanangko karo rhek ngat kais kmem o mia tgus ruk mo mmie. Va a mhel ka naprai ta vle kat enang a paei to nma vurvur mnam o hi he kaem mar tgus, ko tkais kam kering a mhel tgus enang tok. Mare, a mhel to nma vle tok, e Seten to nma vle ko mnam a mhe to orom a paei to a vleir, nma giem a paei mnam a mhel to endo, he nang en kam lo smia nho ekam karo rhek, nang kle kering en mruo tok kat.

7 Tennik kam ngae kais mang tete o mia ngam kaeharom o gi vrong kangsop, o iningol, o vrong ngaemslang ruk ngma ngongae ku mmie, va o singol ruk ku mou kat, mar kam meik, he nang o mia kam smia nho mang ngar he ka ktong ngar kmikkiem o mia ngaro svil mruo. 8 Pu tok, vanangko nong a mhel tang hak to tkais kam smia nho ekam karo rhek mruo he nang ka naprai kmikkiem ka mur svil mruo e. Nove, ko a mhel ka naprai ta vle enang a vim to nma vittie vgum a mhel he kre kmelat kam klang orom ka ye to a serpgar ko a mhel tkaegom kam kpom. Ii, a mhel ka naprai ta vle tok, ekam ko a mhel nam kmeharom o kerkeknen kmelat o mia orom karo rhek gi enang tok kat.

9 Mu vokom na, o mia akuruk ngam mrua khenam mar mruo ma mmok te, ngaro naprai alomin. Ko langto langto mnam mar nma kanprim Ngoldaip to Ngor Teit orom ka naprai, nang kle ka kpiem E Nut kat orom ka naprai to kat ge ko ngma re orom her o mia ruk ngoma vokom mar orom E Nut kalo keik kat arhe. 10 Ii, o rhek ruk kam kanprim E Nut va o rhek ruk kam re orom o mia ngam kaum kottek mnam a mhel ka gu to atgiang. Va koornopeik ruk mut kor mnam muk mang e Yesus he kmokpom kar, kua havaeng nguk te, mut lo kais kam vle tok e. 11 Mu havaeng dok na te, a mou kar a ye ngint kais kam kaum kottek mnam a vugye to atgiang? 12 Va koornopeik ruk mut kor mnam muk mang e Yesus he kmokpom kar, muta pat nngia? A ho to a pik tkut kais kmehi orom karo miel ruk o olip? I, o a ngausie to a grep tkut kais kmehi orom karo miel ruk o pik kat? Nove, va a mhel tlo is kminiram a ye oguon mou kat e.

13 Muk ruk mum gi mrua havae mang nguk mruo te, mularo papat laol ko mum smia ngangam kim muk mang o tgoluk, kua svil kam havarng nguk te, mguak kle ka khenam mularo papat ruk endruk ma mmok orom mularo ngorsang ruk lyar. Ii, mgua mrua krus orom muk mruo, kmikkiem mularo papat ruk laol tok, he kaeharom o keknen ruk lyar ngang o mia. 14 Ii, mum gi mrua havae mang nguk tok, vanangko enangthe a keknen to kam vu kaesik pum mulenar ngaro reha va endo kam ring mnam muk mruo mang mularo munik kam laut nginp kael rengmat kun mnam muk, va mguak or kam kanprim muk mruo pum alo kerkeknen ruk ennginduk tok e. Va mguak or kam ppiak kat kam klai mang alo kerkeknen ruk ennginduk kat te, nginm lo mia vle kun mnam muk tok e. 15 Alo kerkeknen ruk ennginduk muk mruo mum mrua havae mang ngin te, min alo keknen ruk ngint ottek ekam mularo papat ruk laol. Vanang nove, ko alo kerkeknen ruk ennginduk nginm lo ottek ekam E Nut kuon ma volkha e. Parem ko, alo kerkeknen ruk ennginduk nginm kottek ekam o mia ruk mo mmie, nang nong ekam E Nunu A Totur e. Nove, ngam kle mia kottek ekam her e Seten arhe. 16 Ko, ani mhel to nma vle orom ka kerkeknen to kam vu kaesik pum klenar ngaro reha va endo kam ring mnam en mang ka munik kam laut tok, va mguera vokom o kerkeknen ngo matneik tgus kun mnam tok kat, ko a mhel to endo karo papat ngat gia motavruru.

17 Ii, o papat ngo matneik ruk endruk ngam kottek ekam o mia ruk mo mmie, vanang o papat akuruk yok, endruk ngat kottek ekam E Nut kuon ma volkha ngama kaoppom o mia kmeharom o keknen ruk ngata mmok. Va ngma kaoppom o mia kam svil kmen a vrek longeik ngang o mia kat. Va ngma kaoppom o mia kam smia papat mang o mia, va kam krus orom mar mruo, va kam ho vua mrung o mia hak, va kmorim a kerkeknen to kam khen o mia akuruk kam smia tar mar, nang kle ka mnang akuruk, va kam mien kat. Ii, o papat ruk endruk ngam kael ngaro miel ruk lyar tok arhe. 18 He enang tok, endruk ngma vle orom a ngorsang to kmisis he kaoppom o mia kam vle tok kat, her mar ruk arhe ngata vle enang o mia ruk ngma kap o ol kun mnam E Nut ka loot to orom o mia, to le ka lluol mnam orom o mia ruk E Nut ta mon mar la mmok ko kim kalo keik.

<- E Yems 2E Yems 4 ->