E Nut Tovor Ngaur Mang E Pol Kam Tavger, En Kam Kol Ka Gu Kam Havae Mang Ka Mokpom To A Gunngar
1 Muta pat re te, ko gi kaittiek enang ti mnam kua hor ta ngang nguk kam gi mrua sir orom dok mruo kam rere orom dok mruo mang kuaro reha mruo he khover dok kam mur kaenserpagam dok mruo ko kim muk? O-o, nove! Ko her muk ruk arhe mut smia ring ge te, o hirtek kam sir orom ngaro mia mruo ko nglenar ngam kaittiegom o hor ngo mamten ngang nguk kam rere orom ngaro mia mruo ruk endruk mang ngaro reha kam havaeng nguk te, ngta tting orom ngarlenar ruk endruk ngaro reha, he nang mar kam kle kngae ka vle ngok kmuk. Va her muk ruk kat arhe mum kle ksir orom mularo mia mruo tok kat ko mum kaittiegom o hor ngo mamten ngang o hirtek ko mo rengmat oguo ogut kam rere orom mularo mia mruo mang ngaro reha tok kat kam kle khavaeng o hirtek ruk endruk te, muta tting orom mulenar mruo ngaro reha tok kat, he nang mar kam ngae ka vle ko kmar tok kat. Vanangko a hor ka mten to endo enang tok, nop ka ngaeha ngang, ngang dok e. 2 Muk ruk kom kaelongtok mang nguk, her muk mruo arhe muta vle ngang dok enang kua hor to kam sir orom dok mang kuaro reha mruo. Ko o mia tgus ngat kais kam vokom dok orom mularo keknen he ka mnor ge te, kuaro rhek ruk koma patter muk ormar, mar o ho mi kut minar hak. 3 Ii, mularo keknen ruk o mia ngma vokom mar ko mum kaeharom mar ma mmok, ngta khenam ma mmok te, muta vle enang kua hor to kam sir orom dok tok ko ngat kottek ekam her e Kristus mruo to arhe. Ii, ko E Nut to nam kaen a ktalhok to kam plong vle ko kim En ngnik ngnik ngang o mia tmeng E Nunu A Totur kmel rengmat kun mnam muk. He nam kaeha kun mnam mularo vurkul her vgum kuaro mur reha ruk ngang nguk arhe. He ekam tok, muk muta vle enang a hor ka mten to tok, nang mut lua vle enang a mi hor to a mhel tittiegom orom a ye to kmittiek orom e. Nove. Va mut lua vle kat enang alo pla ruk E Nut tittiegom karo pos kuo mang ngin kat e. Parem ko, mut kle va ka vle enang a pla to orom mularo vurkul ruk E Nunu A Totur nam kaeha kun mnam mar her vgum kua ngaeha to kam turang nguk orom kuaro rhek ruk kom her patter muk ormar mekam mekam tesgun he.
4 Klua kokkol hak kam rere ka tmor kim kua ngaeha lserppak hak ekam ko kuaro papat ngat ho mi kut serppak hak te, her Endo E Nut Thim Orom Ka Msasaen msim arhe, endo nam kaeha kun mnam muk vgum dok ko kom kaeha ngang nguk ma mmok ko pum E Nut kalo keik. 5 Ii, klo sia kokkol kam rere tok, vanangko dok ko ho lo mi kut kais hak kam vle enang akuruk mnam muk he mrua havae mang dok mruo te, dok ko dok to atgiang tuk ko ho mi ktuis kmeharom E Nut karo reha ngo mamten. Va dok kat ko ho lo mi ktuis kat kam mrua per orom dok mruo kmikkiem mar kam re te, dok ko dok to atgiang tuk ko kaeha dok tuk, yek a mhel karo keknen ngat hortgi, nove. Ko ho lo vu eveep kmis tok hak. Vanang her gi E Nut tuk to arhe to nam kovor ngaur mang dok kmeha vgum dok he kaeharom o reha ruk endruk tgus ngang o mia. 6 Mare, her E Nut arhe endo tovor ngaur mang dok ko ta tavger dok kam kol ka gu. He enang tok, ther mi kut eharom dok kam mi ktuis kam havaeng o mia mang ka mokpom to a gunngar, nang nong mang ka mokpom to tesgun e. Ko a mokpom to a gunngar to endo, E Nut ther el orom E Nunu A Totur. Vanang endo tesgun, E Nut tel orom karo pos. Ii, endruk ngta mokpom kar E Nut orom karo pos ruk tel ka mokpom to tesgun orom mar, o pos ruk endruk ngma monik kim a yor ngang ngar he ngar lo kais kam kol a ktalhok to kam plong vle ko kim En ngnik ngnik vgum mar tok e. Vanang endruk ngat kle kmokpom kar E Nut orom ka mokpom to a gunngar, endo E Nut tel orom E Nunu A Totur, her E Nunu A Totur to ner kle va kaen a ktalhok to kam plong vle ko kim E Nut ngnik ngnik ngang ngar arhe.
E Pol Ka Ngaeha Tkir Kim E Moses Ka Ngaeha
7 Ii, lmien, ko tennik e Moses nam kaeha ngang o mia orom E Nut karo pos ruk tmur tarkieng ngar kuon mang alo pla. Va o pos ruk endruk ngat monik kim a yor ngang o mia he ngam lua kol a ktalhok to kam plong vle ko kim En ngnik ngnik vgum mar e. Va E Nut ta khenam ka serppak vgum e Moses ko kalo keik ngint ngae gia mmok he, ko nam kaeha ngang o mia orom o pos ruk endruk. He ekam tok, lIsrael ngat lo is kam nho rkieng e Moses e. Pu lmien te, vur koknaik, a mmok to endo tmia loloong kngae kam ngae ho mia nop, vanangko o mia ngat vokom E Nut ka serppak tok ge. 8 E Moses ka ngaeha tpu vle tok orom ke serppak to tmia loloong tok, vanangko muta pat nngia mang E Nut ka ngaeha to a gunngar orom E Nunu A Totur? E Nut na lua khenam ka serppak vgum dok gi, kir kim e Moses ko nguak kaeha ngang o mia orom E Nunu A Totur? 9 Mare, E Nut nera khenam ka ngaeha to a gunngar to orom E Nunu A Totur ma mmok orom a serppak langto yok. Ko enangthe lmien te, e Moses ther eha tesgun orom o pos ruk endruk ko ngma monik kim a yor ngang o mia, nang E Nut ther kle ka khenam ka serppak ma mmok ge vgum e Moses orom a mmok to tok, va lmien kat te, E Nut ner kle ho mi ktua khenam ka serppak alaut hak ge vgum kua ngaeha to a gunngar, endo orom E Nunu A Totur kir kim ka serppak to ta khenam vgum e Moses ka ngaeha to tesgun. 10 Ii, E Nut ner kle ka khenam ka serppak langto yok ma mmok orom E Nunu A Totur vgum ka keknen to kmimim kim o rhek mang o mia ngaro kerkeknen kmeharom o mia kam vle la mmok ko pum kalo keik. He her gi enang tok, E Nut nera khenam ka serppak langto yok ma mmok kir kim endo tesgun, ekam ko ka mokpom to tesgun ka serppak to orom a mmok tmia loloong kngae kam ngae ho mia nop hak. Va tlo kta vle kat e. Ko tete E Nut ka mokpom to a gunngar ta pis orom ka serppak to tmi kut laut hak kir kim endo tesgun, ko nera plong vle ngnik ngnik. 11 Yu! He enangthe a mokpom to tesgun, ther pis orom a serppak to orom a mmok to endo, ko tmia loloong kngae kam ngae ho mia nop, va mu vokom na, a mokpom to a gunngar, endo nera plong vle ngnik ngnik ta khenam ma mmok te, tmi kut laut hak kir kim endo tesgun her gi ekam ko nma plong vle ngnik ngnik he lua loloong kam nop hak tok arhe.
12 Mare, he ekam ko koma nho mkor E Nut kmimim kim o rhek mang nguaro kerkeknen kmeharom mor kam vle la mmok ko pum kalo keik, va kom lua kokkol hak kam rere lserppak ma mmok mang E Nut ka mokpom to a gunngar to endo e. 13 Ii, ko dok klo kaenang e Moses ko E Nut ka mmok te vrua loloong kngae kam ngae kre kam nop to ta kle ka ppung mang kalo keik orom a yet, nang lIsrael kam lo kael ngaro kerok mang hak. Nove, dok kom lo kaursie vgum o mia tok e. 14 Vanangko endruk ngma ngan E Nut karo pos vgum e Moses mnam a venloot to endo, ngaro vurkul ngam lua khi vgum mar ko e Seten nma ngam slommok kim mar. Kua mien, ko tennik kam ngae kais mang tete vop, lIsrael ngam sia him e Moses karo pos ruk mang E Nut ka mokpom to tesgun, vanangko ngma vle enangthe ngma ppung mang ngaro kerok orom a yet to a slommok vop he lua vokom kam mnor mang Endo E Nut Thim Orom Ka Msasaen. Ngma vle ma slommok enang tok vop, ko ngat lo pet a yet to endo vop, ekam ko a gi mhel ko en atgiang tuk, tlo kais kam pet a yet to e. Vanang enangthe ngap gi kor mnam mar mang Endo E Nut Thim Orom Ka Msasaen he mokpom kar, to endo yek, E Nunu A Totur na kais kam pepet o it petgim ngaro kerok. 15 He si tete vop ngma him e Moses karo pos, vanang o Yuda kavurgem ngma vle enangthe ngta ppung mang ngaro kerok orom a yet to a slommok ge, he lua vokom ka mnor mang Endo E Nut Thim Orom Ka Msasaen. 16-17 Vanangko ngoma mon E Nunu A Totur te, Ngoldaip to en kat. He nang si mriem mriem ko E Nunu A Totur nma vle, va nam mrua pet a yet to a slommok mkor a mhel petgim kalo keik. Ko enangthe o mia ngapa hortgem ngaro papat kmeknik ngang Ngoldaip, va E Nunu A Totur nera hong ngar pum o pos ngaro serppak ruk ngma monik kim a yor ngang ngar. 18 He mor tgus ruk E Nunu A Totur tpepet o it ruk o slomkor petgim nguaro kerok ko ngot kor mnam mor mang e Yesus he mokpom kar, her mor ri arhe ngota vokom ka mnor mang e Yesus te, her en arhe Endo E Nut Thim Orom Ka Msasaen. Va E Nut nam kaeha kun mnam mor mekam mekam kam hortgem nguaro keknen mor kam kolkol ekam karo mur keknen mruo, mor kmiser En tok. Va nam kaeha kun mnam mor he ka khenam ka mur serppak mruo tok ma kolkha langto langto kngae ko nma hortgem mor mekam mekam orom E Nunu A Totur, endo ngoma mon kat te, Ngoldaip to en.
