1 Gammɨjɨp ja tɨꞌñchoxiꞌñkaꞌ guch Xoiꞌkam jɨɨgiꞌñdham nam tuꞌ kaꞌm ja nɨidhat gu gɇꞌgɇrkam jix kakaiꞌ ganaiꞌ bɨɨx aixim nam tuꞌ kɨꞌn tu daraa, xix ja kɇɇkɇt am jax ñam kaiꞌchdhaꞌ. Bɨɨpɨꞌm jup xim gaꞌngadaꞌ noꞌ moor jix kɨɨꞌp jum duukam gu tuꞌ nam ja chiandaꞌ gu gɇꞌgɇrkam. 2 Cham jir am nam buam ja aꞌgadaꞌ gu jaꞌtkam, ni kum cham bhaaꞌmnaꞌ kaꞌ, jix chu joiꞌgɨꞌndaꞌm pɨx. Puiꞌm jaꞌk tu jimdaꞌ nam jax jaꞌk jix maatɨt ja nɨiꞌñdhaꞌ gu jaꞌtkam nam soiꞌm ɨlhiiꞌñ ja jujur am bhaan.

3 Puiꞌ dhor tuꞌm kat ich ji bɨɨpɨꞌ dɨr nach chakui tɨ jɨɨꞌñdhat buiñor guch Xoiꞌkam, bɨɨx aixim tu buadaꞌ ich na tuꞌ cham jir kɨɨꞌ, nach guꞌ pu cham tuꞌ kaꞌm nɨiꞌñdhaꞌ gu Dios, jaꞌp ji buusandaꞌ pɨx nach jir tujuandam tugiꞌñ kaꞌ gux buam jum duukam. Maiꞌ suulhgix kat ich tuꞌ sɨlhkam kɨꞌn, dai nach xich jɨjɨɨgak kaꞌ tuꞌ na pɨx bhaan nach jax dhuix bhaak kaꞌ. 4 Baꞌ aach na chich jɨꞌk buiñor soiꞌch ɨlh, gu Dios xich joiꞌmdak jich chɨɨgɨk jich boosolh miꞌ dhɨr bhaan gu boi nach paiꞌ bhaan mu jaꞌk ka jiimɨt nach paiꞌ gammɨjɨ gɨt miꞌ pup jich chulhiiñdhaꞌ. 5 Baꞌ cham tuꞌ na chich moo tuꞌ gɇꞌkam kɨꞌn jix bhaiꞌ duiñ gu Dios kut baꞌ xich joiꞌmdak jich boosolh miꞌ dhɨr nach paiꞌ jaꞌk jich chulhiiñaꞌ gɨt, gu jaꞌpji dɨɨlh pɨx nat xich joiꞌgɨlh. Uana bɨɨx guch uaꞌtulhdharaꞌ, jaꞌp ji buus nat jich bopko suudaiꞌ kɨꞌn nach jix iꞌkoraꞌ kat, gio na chich panaas kiaꞌpɨx ba maaxir. Baꞌ gux Dhuuduꞌ kam jix Uañ Iiꞌmdaꞌ nat jich aꞌm jum tajaa, dhiꞌ puiꞌch jurtuꞌnkaꞌ nach jix mat kaꞌ na tuꞌr jix kɨɨꞌp jum duukam nach baꞌ miꞌ puiꞌ jiimdaꞌ. 6 Baꞌ dɨɨlh pɨx gu Dios jich palhbuiꞌñ bhaankam guch Xoiꞌkam nat baꞌx ioꞌm gɇꞌch aꞌm tajaa gux Dhuuduꞌ kam jix Uañ Iiꞌmdaꞌ. 7 Baꞌ miꞌ dhɨr dai nach ba jimiaꞌ nach gammɨjɨ buiñor bap tuiꞌkaꞌ nach jax baꞌ tuꞌm tɨi nɨɨra xib, nat guꞌ bach uañ guch uaꞌtulhdharaꞌ nat xich joiꞌmdak jich chɨɨ.

8 Baꞌ aañ jix aaꞌ nap gammɨjɨ dai dhiꞌ bhaan tu aꞌgadaꞌ ja bui guch Xoiꞌkam jɨɨgiꞌñdham nam baꞌx kɨɨꞌp jum duukam bhaan jum tukgidhidhaꞌ nam jup tu duñiidhaꞌ. Na guꞌ dhiꞌr jix kɨɨꞌp jum duukam, jaroiꞌ na pɨx palhbuiꞌñchuꞌndaꞌ na jax jaꞌk miꞌ puiꞌ jimdaꞌ. 9 Chaꞌp tuꞌp jum buixiꞌñdhaꞌ noꞌm jaiꞌ dhɨt bhaan ñiokbo gu tuꞌ na pu cham tuꞌ mim nɨnɨiꞌñ, puiꞌ na jax noꞌm bhaan tu aꞌga gu bɨjɨk dɨr kam sapookiꞌñ nam jax tu jimdat guch bopxi kat, na guꞌ dhiꞌ bhaan pɨx jix bhaak kaꞌ am bhaan ji chu aꞌgat na jax tu aagix nat tu uaꞌnak gu Moisees. Guꞌ dhiꞌ cham tuꞌ kam aaꞌ xib, pu cham jañ maat nam jax kaiꞌñkam puiꞌ jaꞌk tu daaꞌñchuꞌ.

10 Noꞌ jaroiꞌ maadɨt miꞌ paiꞌ maakam ja aagiꞌñ guch Xoiꞌkam jɨɨgiꞌñdham, dɨlhkob jap xi baidhai xi chu aꞌgidhaꞌ na cham jir am na jax jaꞌk tu jim. Baꞌ noꞌ cham jum jɨɨgiꞌñ, jaꞌp jap tɨɨdaꞌ na buusniaꞌ miꞌ dhɨr ja bui guch Xoiꞌkam jɨɨgiꞌñdham, cham tuꞌ na miꞌ oirɨt maakam ja aagiꞌñdhaꞌ. 11 Na guꞌ noꞌ cham jɨꞌx jum kɇkɇɇ nap jax tɨi tɨtdadaꞌ, dhiꞌ bhaan jix mat kaꞌ ap na cham jɨꞌxkat miꞌ puiꞌ ka jimiaꞌ na jax jir sɨlhkam, dɨɨlh baꞌ gu uaꞌtulhdhargaꞌn tulhiiñchudaꞌ.

12 Aañ mum joochxidhaꞌ gu Arteemas piam gu Tiikiko nam aꞌmkam miꞌ ka oirɨdaꞌ nap aap yammɨ ka jimiaꞌ Nikoopolis nap bhañ chɨɨꞌmɨraꞌ. Xim gaagaꞌ ap nap jax dhui miꞌp tuiꞌkaꞌ, nañ guꞌ aañ miꞌx buusaidham gux jɨɨp na ba miamlhim. 13 Aap baꞌ xi palhbuidhaꞌ gu abogaaꞌn Seenas gu tuꞌ na aꞌmiram jum aaꞌndaꞌ, gio gu Apoolos. Sia tuꞌ nap bhaan puiꞌ pup jum duukaꞌp kɨꞌn xi ja palhbuidhaꞌ, na guꞌx ioꞌm jum aaꞌ na jaroiꞌ ja palhbuidhaꞌ na baꞌ cham tuꞌ ja aꞌm jum aaꞌndaꞌ nam naiꞌ ja palhbuidhim guch Xoiꞌkam jɨɨgiꞌñdham. 14 Xi ja aagiꞌñdhaꞌ ap guch Xoiꞌkam jɨɨgiꞌñdham na puiꞌp jum aaꞌ nam ja palhbuidhaꞌ tuꞌ na pɨx kɨꞌn nam baꞌ puiꞌ maachidhaꞌ. Na guꞌ puꞌñi jaroiꞌ na pɨx bam aaꞌndaꞌ nam palhbuidhaꞌ guch Xoiꞌkam jɨɨgiꞌñdham.

15 Bɨɨx yaꞌ dɨr mu tum guguuxiꞌñ am guch Xoiꞌkam jɨɨgiꞌñdham nam jɨꞌk yaꞌñ bɨɨm jup tuꞌiiꞌ. Aap baꞌ miꞌ dhɨr gammɨjɨ jaꞌk puiꞌp xi ja tɨɨdaꞌ guiꞌ nach maap jix biiñak guch Xoiꞌkam nach aach yaꞌ dɨr mu tu ja guguuxiꞌñ. Jaꞌpni ku baꞌ gu Dios jich Gɨꞌkoraꞌ pɨx gɨt jam aꞌm tɨ nɨidhidhaꞌ gammɨjɨ bɨɨx jɨꞌmaꞌn aapiꞌm.

<- TIITO 2