1 Jiñ jaaduñ jich Xoiꞌkam bhaan, xib jañ baꞌ giop xi jam tɨꞌñchoixdhaꞌ na jax jum kaiꞌch gux bhaiꞌm kaiꞌchdham ñioꞌkiꞌñ guch Xoiꞌkam dhiꞌ na ñich jax chuꞌm tu jam aꞌgi, dhiꞌ na pim bhaan tɨ jɨɨꞌñdhat miꞌ puiꞌ jiim sia gu xib. 2 Dhiꞌ pɨx jix bhaiꞌm kaiꞌchdham ñioꞌkiꞌñ guch Xoiꞌkam cham mu jaꞌk jam bhɨichdhaꞌ na pim paiꞌ gammɨjɨ miꞌ pup jum tulhiiñdhaꞌ noꞌ pim gammɨjɨ miꞌ puiꞌ xi jiim na jɨꞌk jax jum kaiꞌch na pimɨt kai janoꞌ na ñich tu jam aꞌgi. Na guꞌ noꞌ pim cham miꞌ puiꞌ jiim, jir jaꞌp pɨx sia ku pim tɨi tɨ jɨɨgiꞌñ.

3 Janoꞌ na ñich jax kiaꞌpɨx bhammɨ tu jam aꞌgi aapiꞌm jiñ jaaduñ, dhiꞌ pɨx jañich jup jam aaꞌñ na ñich aañ jax chuꞌm jup tu maat. Jaꞌpniñ jam tɨtda nat guch Xoiꞌkam jich aꞌmkam muu kɨꞌn guch uaꞌtulhdharaꞌ. Baꞌ jaꞌpni tu uaꞌñix maaꞌn kap na mɨt paiꞌ tu uaꞌnak gu bɨjɨk dɨr kam 4 nat baik tanoolh miꞌ juruuñ na mɨt paiꞌ tɨɨ gu tukgaꞌn, miꞌ dhɨr baꞌ gio duaꞌñdhak jup buusaiꞌ gu Dios. Gio jaꞌp iam jaꞌpnip tu uaꞌñix 5 nat miꞌ dhɨr maaꞌn kap bam maax buiñor gu Peegro, mɨkkat bɨɨx ja bui bam maax gu noonbiꞌñ. 6 Jix ioꞌm mɨkkat ja bui bam maax jix chamaam sianto guiꞌ nam buiñor tɨ jɨɨgiꞌñ. Muiꞌ pui dudua am xib guiꞌ na mɨt maaxik tɨɨ, sia ku mɨt guꞌ jaiꞌ dhɨt ba koi. 7 Mɨkkat buiñor bam maax ɨp gu Santiago, mɨkkat gio bɨɨx ja bui bam maax ɨp gu noonbiꞌñ.

8 Mɨkkat dai aañ pɨx jiñ bui bam maax, cham tuꞌ jumai buiñor kam maax, jaꞌp ji buusan nañ bar jigɨɨx gaꞌn pɨx. 9 Puiꞌ kuñ baꞌ cham tuꞌ kaꞌm jiñ ɨlhiiꞌñ ja bui guiꞌ nam bɨɨpɨꞌ dɨr pu bar noonbiꞌñ guch Xoiꞌkam, ni ku iam xiñ ñamɨɨk nañ puiꞌñ chɨɨtɨꞌndaꞌ nañ puiꞌp jir nobiiꞌñ guch Xoiꞌkam, nañ guꞌx ja bhaamkidhat guiꞌ nam kaichgɨdaꞌ, jir jaꞌtkam tugiꞌñ kaꞌ guꞌ tɨi gu Dios. 10 Guꞌ ji nat guꞌ xiñ joiꞌmdak jiñ chɨɨgɨk dɨɨlh gu Dios pu chuꞌm kɨꞌn jiñ dhai nañ jir nobiiꞌñ kaꞌ guch Xoiꞌkam, puiꞌ nañ jax bar nobiiꞌñ baꞌ pui xib. Baꞌ cham tuꞌr tuꞌ kub buiñor gu Dios nat xiñ joiꞌmdak pu chuꞌm kɨꞌn jiñ dhai, na ñich guꞌ gɇꞌ bhaankam ba tu jua, cham tuꞌ puiꞌ na jax gu jaiꞌ nam jup jir noonbiꞌñ guch Xoiꞌkam. Sia ku guꞌ cham tuꞌ moo aañ dɨɨlh nax bhaaiꞌ nañ tu juan, guꞌ jaꞌpji gu Dios pɨx na xiñ joiꞌmdat jiñ palhbuiꞌñchuꞌ. 11 Ku guꞌ cham jax bua ji sia ku ñich aañ tu jam aꞌgi piam sia kum gu jaiꞌ noonbiꞌñ guch Xoiꞌkam tu jam aꞌgidhaꞌ gɨt, na guꞌ maaꞌn nam jax pɨx pu chuꞌm jup tu jam aꞌgidhaꞌ gɨt na pim jax chuꞌm bhaan tɨ jɨɨꞌñdhat miꞌ puiꞌ ba jiim xib.

12 Baꞌ aach pu chuꞌm naiꞌ tu aꞌgim nat guch Xoiꞌkam duadɨk giop buus miꞌ dhɨr koiꞌñgaꞌn tɨr, guꞌ ji na guꞌ jaiꞌ dhɨt aapiꞌm sap puiꞌ kaiꞌch nam gu koiꞌñgaꞌn cham jɨꞌxdhaꞌ duduadɨi giop ka baapmigiaꞌ. ¿Jax japim baꞌ duukat puiꞌ kaiꞌch? 13 Noꞌr sɨlhkam kaꞌ gɨt nam gu koiꞌñgaꞌn cham jɨꞌxdhaꞌ duduadɨi giop ka baapmigiaꞌ, dho bak pui miꞌ paiꞌ kaat gu tukgaꞌn guch Xoiꞌkam na mɨt paiꞌ tɨɨ. 14 Gio noꞌr sɨlhkam kaꞌ gɨt nat guch Xoiꞌkam cham tuꞌ duadɨk giop buus miꞌ dhɨr koiꞌñgaꞌn tɨr, dho bak pur cham tuꞌ ɨp nach naiꞌ pu chuꞌm tu aꞌgim, ni ku pu cham tuꞌ bhaaiꞌ sia ku pim aapiꞌm puiꞌ jaꞌk tɨi ba tɨ jɨɨgiꞌñ. 15 Gio bhaankam iatdaꞌch pɨx gɨt gu Dios nach puiꞌ kaiꞌch nat guiꞌ duaꞌñdhak buusaiꞌ miꞌ dhɨr koiꞌñgaꞌn tɨr guch Xoiꞌkam sia kuch guꞌ tɨix maat na cham tuꞌr sɨlhkam, noꞌ guꞌ puiꞌ cham jɨꞌxdhaꞌ giop duduadɨi ka baapmigiaꞌ am gu koiꞌñgaꞌn. 16 Noꞌ pim aapiꞌm puiꞌ jaꞌk tɨ jɨɨgiꞌñ nam gu koiꞌñgaꞌn cham jɨꞌxdhaꞌ duduadɨi giop ka baapmigiaꞌ nañ jax ba kaiꞌch, dhiꞌ bhaan jix maatɨꞌ na pim sia puiꞌ jaꞌk tɨ jɨɨgiꞌñ nat guch Xoiꞌkam cham tuꞌ duadɨk giop bam. 17 Gio pu cham tuꞌ bhaaiꞌ sia ku pim aapiꞌm tɨi tɨ jɨɨgiꞌñ buiñor guch Xoiꞌkam noꞌt guꞌ puiꞌ cham duadɨk giop buus guch Xoiꞌkam mu dɨr koiꞌñgaꞌn tɨr, maaꞌn na jax jam aꞌm jup tuꞌiiꞌ baꞌ gu uaꞌtulhdharaꞌ. 18 Gio guiꞌ na mɨt ba koi tɨi xi chɨ jɨɨꞌñdhak buiñor guch Xoiꞌkam, pu maiꞌ ba suulh jamɨt ɨp bak. 19 Jaꞌp moox buam aach nach jɨꞌk tɨi ba tɨ jɨɨgiꞌñ buiñor guch Xoiꞌkam noꞌ guꞌ dai yaꞌch chutkuꞌ bhaan nach ka dudua nax bhaiꞌ tuch jimdaꞌ, miꞌ dhɨr nach paiꞌ koꞌyaꞌ, pu cham maat ich noꞌx bhaiꞌ tuch jimiaꞌ kaꞌ baꞌ cham.

20 Guꞌ ji na guꞌ maaxik jir sɨlhkam nat guch Xoiꞌkam duduadɨk giop buus miꞌ dhɨr koiꞌñgaꞌn tɨr. Jaꞌp ji buus na jax gu bhaidhaꞌ na maaꞌn bɨɨpɨꞌ bhaayaꞌ na baꞌ gu jaiꞌp ba bhaayaꞌ, nach guꞌ aach miꞌ puiꞌp bhɨichuꞌ nat paiꞌ bhɨi guch Xoiꞌkam. 21 Puiꞌ nat jax chum duu bɨjɨk nat maaꞌn pɨx bhaan dɨr gu maaꞌnkam jaiꞌchdhɨr gu muukiꞌ, xib puꞌñi ɨp, maaꞌn pɨx jup jaiꞌchdhɨr gu maaꞌnkam nat puiꞌ jaꞌk jup tu duu nam duduadɨi baapmigiaꞌ gu koiꞌñgaꞌn. 22 Piam jaꞌpni ɨp, jax ña pim jaꞌk jix maatɨt kaayaꞌ: Gu Adaan puiꞌ jaꞌk jich boiꞌñxi nach jir tu koꞌdam kaꞌ, baꞌ guch Xoiꞌkam puiꞌ jaꞌk jup jich boiꞌñxi nach duduadɨi giop baapmigiaꞌ nach ka koꞌiix kaꞌ. 23 Guꞌ ji na guꞌ dhiꞌ aagix na paiꞌ dhuuk puiꞌ tum duñiaꞌ, puiꞌ na jax guch Xoiꞌkam nat bɨɨpɨꞌ duadɨk ba buus miꞌ dhɨr koiꞌñgaꞌn tɨr, aach baꞌ nach jɨꞌk tɨ jɨɨgiꞌñ buiñor gatuuk duduadɨip baapmigiaꞌ na paiꞌ dhuuk gio bhaiꞌp jimdaꞌ. 24 Janoꞌ baꞌ bam aayaꞌ nam tɨɨmoꞌ dhi oiꞌñgaꞌn, baꞌ guch Xoiꞌkam gampaiꞌ ja iabuꞌ guiꞌ nam kar gɇꞌgɇrkam kaꞌ yaꞌ dhi oiꞌñgaꞌn, gampaiꞌ pɨx ji biꞌyaꞌ am, sia guiꞌ na kax bhaaiꞌn kaꞌ nam bɨɨx aixim pu tu duñiaꞌ na jax chuꞌm cham jɨꞌxdhaꞌ jaroiꞌ jaꞌp pɨx pu tu duñiaꞌ. Baꞌ dai gu Dios, Gɨꞌkorgaꞌn guch Xoiꞌkam pɨx bax jaiꞌch kaꞌ nar gɇꞌkam kaꞌ, na guꞌ guch Xoiꞌkam pɨx puiꞌ ba tu duñiaꞌ. 25 Gɇꞌkam kɨꞌn ya aayaꞌ guꞌ guch Xoiꞌkam dhi oiꞌñgaꞌn bhaan, baꞌ bɨɨx puiꞌ ja duñiaꞌ nam cham tuꞌ kɨꞌn ji biꞌyaꞌ gu gɇꞌgɇrkam guiꞌ nam cham kɨɨgalhdhaꞌ. 26 Jix ioꞌm gatuuk am jup xi chɨbaañdhaꞌ gu muukiꞌ na yaꞌ kar gɇꞌkam kaꞌ dhi oiꞌñgaꞌn bhaan, pu cham tuꞌ kɨꞌn ji biꞌyaꞌ ɨp, pu cham baꞌ paiꞌ ka jaiꞌch kaꞌ gu muukiꞌ. 27 Gu Dios pɨx dɨɨlh puiꞌ jaꞌk tɨi na bɨɨx bɨtaaꞌn bap tu tuiꞌkaꞌ guch Xoiꞌkam na jɨꞌk tuꞌx chu jaiꞌch. Baꞌ na puiꞌ kaiꞌch gu Dios na bɨɨx bɨtaaꞌn bap tu tuiꞌkaꞌ guch Xoiꞌkam na jɨꞌk tuꞌx chu jaiꞌch, cham tuꞌ na bɨɨx jum aagɨt jup kaiꞌch gu Dios na bɨtaaꞌn bap tuiꞌkaꞌ guch Xoiꞌkam. Jax dhui na guꞌ guiꞌ pɨx baꞌ puiꞌ tu duiñchuꞌ na bɨtaaꞌn bap tu tuiꞌkaꞌ guch Xoiꞌkam bɨɨx na jɨꞌk tuꞌx chu jaiꞌch. 28 Baꞌ na paiꞌ dhuuk bɨɨx bɨtaaꞌn bap tu tuiꞌkaꞌ guch Xoiꞌkam, guch Xoiꞌkam dɨɨlh puiꞌp jum duñiaꞌ na bɨtaaꞌn jup tuiꞌkaꞌ gu Dios, na guꞌr Gɨꞌkorgaꞌn. Na guꞌ gu Gɨꞌkorgaꞌn puiꞌ ba tu duñiaꞌ na bɨɨx bɨtaaꞌn bap tu tuiꞌkaꞌ na jɨꞌk tuꞌx chu jaiꞌch, bɨɨx baꞌ bhaan jup tu tuiꞌkaꞌ gu Dios na jɨꞌk tuꞌx chu jaiꞌch.

29 Jaiꞌ dhɨt sap ja aꞌmkam jup jum bopkon japim guiꞌ na mɨt ba koi cham jim bopkonak suudaiꞌ kɨꞌn sia ku mɨt tɨi ba tɨ jɨɨꞌñdhak buiñor guch Xoiꞌkam, na pim sap jaꞌp jim aagɨt nam puꞌñi dhui jimiaꞌ buiñor guch Xoiꞌkam. Guꞌ ji noꞌm guꞌ puiꞌ cham jɨꞌxkat duduadɨi giop baapmigiaꞌ gu koiꞌñgaꞌn, ¿jax ku pim baꞌ ja aꞌmkam jup jum bopkon? 30 Gio aach nach tu aꞌga gux bhaiꞌm kaiꞌchdham ñioꞌkiꞌñ guch Xoiꞌkam, ¿jax kuch baꞌp jich dhɨkooꞌñdhatuꞌ nach naiꞌ tu aꞌgim sia puiꞌch chulhiiñat gammɨjɨ? 31 Jix maat japim dhoñ jaaduñ nam gammɨjɨ pɨx xiñ muꞌaak kaꞌ gu jaꞌtkam nabap tanoolh, ku guꞌ aañ jix bhaiꞌñ chaat ji na pim aapiꞌm ba tɨ jɨɨgiꞌñ buiñor guch Xoiꞌkam. 32 Gio bhammɨ dɨr Eepeso ñich jup tu daa ja bui gu jaꞌtkam jix bhaaꞌmnagɨm nam jaꞌp tu jim na gu gampɨx kam nam jix chu bhaaꞌmnaꞌ. Pur jaꞌp pɨx bak baꞌ sia kuñ jax jiñ bua, nam guꞌ puiꞌ cham jɨꞌxdhaꞌ giop duduadɨi baapmigiaꞌ gu koiꞌñgaꞌn, dai baꞌ puiꞌ pɨx bax bhaaiꞌ nam jax kaiꞌchdhaꞌ gu jaꞌtkam nach puiꞌ xi chu buimɨi nach jax ɨlhiiꞌñ na kapbhaiꞌ kam kɨɨꞌ dhi aꞌoo. Na guꞌ noꞌt bam kajaa, cham tuꞌ ka bhaaiꞌn kaꞌ gu tuꞌ nach jax dhuñiaꞌ.

33 Chaam tuꞌ ji nar puiꞌñ jaaduñ, chaꞌpim naiꞌ pɨx ja jɨɨgiꞌñdhaꞌ gu jaiꞌ jax nam kaiꞌchdhaꞌ. Na guꞌ maaxik jir puiꞌ na saak jax kaiꞌch maaꞌnnim gu jaroiꞌ, na cham jir kɨɨꞌ noꞌch ja bɨɨm jiim guiꞌ nam maakam ɨlhiiꞌñdhaꞌ gu tuꞌ, noꞌñ guꞌ aañ tɨi puiꞌ jaꞌk ɨlhiiꞌñ na jax jir miꞌ puiꞌ, cham tuꞌ baꞌ puiꞌ ji chu buusniaꞌ nañ jax tɨi ɨlhiiꞌñdhaꞌ. 34 Chaꞌpim kam uaꞌtulhiꞌñdhaꞌñ jaaduñ. Jix bhaiꞌ pim xim gaꞌngidhat miꞌ puiꞌ xi jiimdaꞌ na jax jir am, puiꞌ pim jaꞌk miꞌ puiꞌ xi jiimdaꞌ na jax jaꞌk bhaan jix maatɨꞌ kaꞌ na pim jix bhaiꞌ jam jur biaꞌ. Jaꞌp tu jim japim guꞌ jaiꞌ dhɨt na pim panaas pu cham maat gu Dios, puiꞌ kuñ baꞌ puiꞌ jam tɨtda na pim baꞌ iam jix xiꞌɨrai miꞌ puiꞌ ba jimiaꞌ.

35 Noꞌ maadɨt jaroiꞌ tɨ tɨkka nam jax baꞌ jaꞌk ba jim duñiaꞌ gu koiꞌñgaꞌn nam paiꞌ dhuuk duduadɨi ba ji baapmigiaꞌ, noꞌ guꞌ jax kaiꞌch na jax baꞌr tuꞌm kaꞌ, noꞌ maaxik gio tuukuꞌ bɨnkam jup bamgiaꞌ kaꞌ baꞌ cham, 36 jix ñaanbim kaiꞌchdhaꞌ gu jaroiꞌ noꞌ puiꞌ kaiꞌch, maaxik jix maatɨꞌ guꞌ sia tuꞌ na pɨx. Puiꞌ na jax gu jaroiꞌ noꞌt ba ɨi gu jax chuꞌm kaichuk, bɨɨpɨꞌ dɨbaaꞌ gu kaichuk na baꞌ miꞌ dhɨr takchai bhaiꞌ ba buusniaꞌ. 37 Gio bar jaagam kaꞌ na bhaiꞌ ba buusniaꞌ, cham tuꞌ kar kaichuk kaꞌ. Na guꞌ gu kaichuk nax jaiꞌch, jaiꞌr kaꞌkbulhik, jaiꞌr gai chɇꞌtɇb jaꞌp na jax gu tiriik. 38 Na guꞌ gu Dios pɨx pu chuꞌm jup duñiaꞌ jax ña tuꞌm jix aaꞌndaꞌ na buusniaꞌ, sia moo nar jax chuꞌm kaichuk kaꞌ gɨt, dai na pu chuꞌm tu jaaꞌnkaꞌ na jax chuꞌm aagix na baꞌ bhaan jix maatɨꞌ kaꞌ na dhiꞌr diꞌ gu jax chuꞌm na mim ɨxiaꞌ. 39 Gio puiꞌ na jax gu tuꞌ nam jix chu jaiꞌch yaꞌ dhi oiꞌñgaꞌn, na guꞌ cham tuꞌ maaꞌn nam jax chuꞌm bɨɨx. Aach nach jir jaꞌtkam, cham tuꞌ pu chuꞌm ich nam jax chuꞌm gu sasoiꞌ gio gu gampɨx kam nam jix chu jaiꞌch. Sia gu boptop jir maakam tuꞌm am gio gu uꞌjiꞌ. 40 Baꞌx dhaam jaꞌk pu chuꞌm jup jix chu jaiꞌch am nam jax chuꞌm jix chu jaiꞌch yaꞌ dhi oiꞌñgaꞌn, dai nam pu chuꞌm kɨꞌn aꞌbhartudhix na jax chuꞌm jix aaꞌ gu Dios nam jix jaiꞌch kaꞌ gux dhaam kam, jaꞌp nam jax chuꞌm kɨꞌn jup aꞌbhartudhix guiꞌ nam yaꞌ dhi oiꞌñgaꞌn jix chu jaiꞌch. 41 Gio bɨɨx jɨꞌmaꞌn jir maakam tuꞌm am, puiꞌ na jax gu tanoolh na guꞌ cham tuꞌ pu chuꞌm jup tu tonniꞌñ na jax chuꞌm tu tonniꞌñ gu masaaꞌn, gio gu chiichiaꞌ maakam tuꞌm jup mɨmɨimdaꞌ am, sia ji guꞌ dɨɨlh dai chiichiaꞌ bɨɨx aixim tuꞌm xi mɨmɨimdaꞌ am jaiꞌ. 42 Puꞌñi baꞌm duñiaꞌ am gu koiꞌñgaꞌn janoꞌ na paiꞌ dhuuk jum aayaꞌ nam gio duduadɨip baapmigiaꞌ. Dɨbaaꞌ dho dhich chutkuꞌ nam paiꞌ dhuuk jich yaaspaꞌ. Guꞌ ji na guꞌ nach paiꞌ dhuuk duduadɨi giop baapmigiaꞌ, cham tuꞌ ka tɨ dɨꞌnbardaꞌ ich, nach guꞌ cham tuꞌ kar tu koꞌdam kaꞌ. 43 Gio guꞌ na paiꞌ dhuuk dɨbaaꞌ guch chutkuꞌ, jix buam tuꞌm jup jum duñiaꞌ, guꞌ ji nam guꞌx aꞌbhar jup jim dui ba bubuakiaꞌ janoꞌ na paiꞌ dhuuk jum aayaꞌ nam giop duduadhiaꞌ, baꞌ cham jɨꞌxkat ka koꞌyaꞌ am. 44 Jir bakaax kaꞌ dhich chutkuꞌ nam paiꞌ dhuuk jich yaaspaꞌ, guꞌ ji nach guꞌ dai iiꞌmdaꞌ pɨx ba bubuakiaꞌ janoꞌ na paiꞌ dhuuk jum aayaꞌ nach gio duduadɨip baapmigiaꞌ. Jix jaiꞌch am guꞌ gu tutkuꞌ iiꞌmdaꞌ bhaan, jaꞌp na jax yaꞌ bakaax bhaan nam jix jaiꞌch.

45 Jup jum kaiꞌch gu ñioꞌkiꞌñ gu Dios maaꞌn kap na mɨt paiꞌ tu uaꞌnak gu bɨjɨk dɨr kam nat sap bhaiꞌ ji dhua gu bɨɨpɨꞌ kam maaꞌnkam nat ba jaiꞌchdhɨr na baꞌ miꞌ dhɨr yaꞌ bar kiokam kaꞌ dhi oiꞌñgaꞌn bhaan, baꞌ dhiꞌ gu janoꞌ kam Adaan na aagɨt jup kaiꞌch. Baꞌ gu jumai Adaan nat xib yaꞌp ai, nar dhiꞌ pɨx guch Xoiꞌkam, iiꞌmdaꞌp jum duu nach baꞌ aach pu chuꞌm jup jich dhuñiaꞌ ɨp. 46 Baꞌ dhiꞌ jaꞌpnir jum duukam: Bɨɨpɨꞌch yaꞌ xi oipimɨi bakaax bhaan nach baꞌ gatuuk iiꞌmdaꞌ bap jich dhuñiaꞌ. 47 Na guꞌ gu bɨɨpɨꞌ kam maaꞌnkam dɨbɨɨr pɨx jup duñiix, guꞌ gu jumai nat yaꞌp ai gatuuk, jir jix dhaam kam. 48 Gio bɨɨx na jɨꞌk tuꞌx chu jaiꞌch dhi oiꞌñgaꞌn bhaan jir tu pu chuꞌm na jax chuꞌm gu maaꞌnkam guiꞌ nat bɨɨpɨꞌ jaiꞌchdhɨr yaꞌ dhi oiꞌñgaꞌn. Gio guiꞌ na jɨꞌk tuꞌp jix chu jaiꞌch jix dhaam jaꞌk, jir tu pu chuꞌm ɨp na jax chuꞌm guiꞌ nax dhaam dɨr jim. 49 Baꞌ puiꞌ nach jax jir tuꞌm xib na jax gu maaꞌnkam guiꞌ nat bɨɨpɨꞌ jaiꞌchdhɨr, gatuuk jach pu chuꞌm jup jich dhuñiaꞌ ɨp na jax chuꞌm guiꞌ nat jix dhaam dɨr yaꞌ ai.

50 Jaꞌpniñ kaiꞌñkam jup jam tɨtdañ jaaduñ nach cham tuꞌ pu chuꞌm jimiaꞌ buiñor gu Dios na paiꞌ dhɨr jir gɇꞌkam nach jax chuꞌm yaꞌ oipo xib, cham tuꞌ bɨnkam dhich bakxiꞌ ni dhich aꞌoo. 51 Kani nañ xi jam aaꞌñdhaꞌ na jax jaꞌk tu duñiaꞌ gu Dios gatuuk, guiꞌ pɨx puiꞌñ jurtuꞌn nañ baꞌ aañ yaꞌ dɨr jup jam aagiꞌñdhaꞌ, cham jaroiꞌ jumaix maat gu dhiꞌ puiꞌ: Na aach nach jɨꞌk tɨ jɨɨgiꞌñdhaꞌ buiñor guch Xoiꞌkam, cham tuꞌ bɨɨx koꞌiix kaꞌ ich janoꞌ na paiꞌ dhuuk jum aayaꞌ nam gio duduadɨip baapmigiaꞌ gu koiꞌñgaꞌn, kuch ji guꞌ bɨɨx maaꞌn jimdam maakam tuꞌm jup jich dhuñiaꞌ ji, 52 jaꞌp na jax nach maaꞌnnim kupiogiaꞌ. Janoꞌ na maaꞌnnim pɨx ba tum kuichdhaꞌx dhaam dɨr, duduadɨi bhaiꞌ ji baapmigiaꞌ am bɨɨx guiꞌ nam koꞌiix kaꞌ, baꞌ dai guiꞌ nach jɨꞌk duduakaꞌ nach tɨ jɨɨgiꞌñdhaꞌ buiñor guch Xoiꞌkam, jotmodaꞌ maakam tuꞌm jup jich dhuñiaꞌ ich. 53 Gu Dios pɨx dɨɨlh jaiꞌp ja duñiaꞌ dhich chutkuꞌ nam xib kar tu koꞌdam, gio nam kar tɨ dɨꞌnbadam, pu chuꞌm jup ja duñiaꞌ nam jax chuꞌm cham jɨꞌxkat ka koꞌyaꞌ, nam pu gammɨjɨ pu ba duduakaꞌ. 54 Baꞌ janoꞌ nach paiꞌ dhuuk puiꞌ bach dhuñiaꞌ, bam aayaꞌ gu tanoolh na paiꞌ dhuuk tu aagɨt jup kaiꞌch maadɨt gu bɨjɨk dɨr kam maaꞌn kap nat paiꞌ jaꞌpni tu uaꞌnak: “Ampɨx maꞌiich jamɨt gu muukiꞌ, pu cham paiꞌ ka matgir baꞌ. 55 ¿Paa pich baꞌ jaꞌk jax jum duu xib Muukiꞌ nap kar gɇꞌkam kat? ¿Jum ɨɨkchulh jamɨt aa guiꞌ nap kɨꞌn ka tu kooꞌndat?” 56 Gu uaꞌtulhdharaꞌ pɨx kɨꞌn tu kooꞌn gu muukiꞌ, baꞌ gu uaꞌtulhdharaꞌ dhiꞌ bhaan jup tu daꞌngɨ na jɨꞌk jax tu aagix nam tuiꞌñgɨt miꞌ puiꞌ jiimdaꞌ gu jaꞌtkam. 57 Guꞌ ji na guꞌ gu Dios jir jix bhaiꞌkam jich bui, aañ taxchaabgiꞌñ, nat guꞌ guiꞌ pɨx puiꞌ tu duu nach bhaankam guch Xoiꞌkam tuꞌ pɨx biaꞌ gu muukiꞌ.

58 Baꞌ miꞌ pim puiꞌ xi jiimdaꞌ aapiꞌm jiñ jaaduñ na jax jix aaꞌ guch Xoiꞌkam. Jix ioꞌm japim bhaankam xi chu juandaꞌ, cham tuꞌr jaꞌppɨx kaꞌ guꞌ buiñor gu Dios gu tuꞌ na pim jax buadaꞌ.

<- 1 KORIINTO KAM 141 KORIINTO KAM 16 ->