1 Mo hande Senkitia siosi wanda꞉halina꞉ e pokao hala꞉ wanda꞉ nika꞉ ana꞉ Pibita꞉ I̱ma꞉ iki pa꞉ta꞉ ipika꞉ pi laaso loa꞉me. 2 Koda꞉na꞉ wanda꞉halima꞉ta꞉ ika꞉ ika꞉ kone handa꞉ mu alualu pulu peleme tupa꞉ ikana꞉ma꞉ Tekehalina꞉ bikina꞉ ipiki handa꞉ meata꞉ kutupa ipikana꞉ma꞉ eki hau puluekema꞉ hone wia꞉ka꞉na꞉ta꞉ ikana꞉ma꞉ ipiki tamba꞉ mea꞉pa꞉peke. Ipikita꞉ wanda꞉hali wopu pa꞉ta꞉ make I̱ pa꞉ta꞉ make homu pea hata꞉ nika꞉ yankeke haya꞉ ekina꞉ loa꞉me.

3 Nika꞉ mandakena꞉ hata꞉ Yesu Ketiso ipika꞉ e pokao haloma꞉ tooli Pisila Akuila yaapo pa꞉ta꞉ a꞉taloe pi make la꞉niaasome. 4 Ipilikita꞉ yakaeki peaaso homolo pipieki kone paala꞉ma꞉ na homepeme. I̱ma꞉ homeke na loa꞉me. Diendaili siosi wanda꞉hali paeyaoma꞉ make nikana꞉ma꞉ ipiliki pa꞉ta꞉ keiyae pi aloma꞉me. 5 Ipilika꞉ da pa꞉ta꞉ mombolo haleme siosi wanda꞉hali pa꞉ta꞉ make a꞉taloe pi la꞉niaasome. Ota꞉ yaka yankeke Epenitasi pa꞉ta꞉ make a꞉taloe pi la꞉niaasome. Ipikita꞉ mo Eisia nane wanda꞉hali paeyao ame̱le̱ hata꞉ titina꞉ Ketiso biki ipikana꞉ma꞉ amba꞉la mia꞉me. 6 Mo hande ika꞉ e honkopu hao pokaeya꞉ wanda꞉ Meti pa꞉ta꞉ make a꞉taloe pi la꞉niaasome. 7 Hande nika꞉ mandakena꞉ dipula pituma꞉ Diu hali yaapo A꞉ndotonaikusi pita꞉ Diuniasi yaapo pa꞉ta꞉ make a꞉taloe pi la꞉niaasome. Mo hande aposolo haliwekima꞉ta꞉ koto hali yaapo wotu handa wilimime. I̱ta꞉ pi a̱i̱ na miki hano kone ipilikana꞉ma꞉ amba꞉la Ketiso haliweki haepekeme.

8 Mo hande Tekehali yaapo ta꞉ma꞉ni pea hala꞉ hali A꞉mbiliatusi make ota꞉ yaka yankeke pa꞉ta꞉ a꞉taloe pi la꞉niaasome. 9 Nika꞉ mandakena꞉ hata꞉ Ketisona꞉ e pokao haloma꞉ hali Ebanusi ipiki pa꞉ta꞉ make ota꞉ yaka yankeke Sitakusi ipiki pa꞉ta꞉ make a꞉taloe pi la꞉niaasome. 10 Hande ipika꞉ Ketiso pa꞉ta꞉ ti lao hala꞉eki peneme yala꞉ hali A꞉pelisi pa꞉ta꞉ make a꞉taloe pi la꞉niaasome. Hande Atisitobulusi tapake wanda꞉hali pa꞉ta꞉ make a꞉taloe pi la꞉niaasome. 11 Ya tapake Diu hali Hetodioni pa꞉ta꞉ make mo hande Nasisasi tapake Ketiso wanda꞉hali pa꞉ta꞉ make a꞉taloe pi la꞉niaasome.

12 Tekehalina꞉ e pokao halepe hali yaapo Totaipina pita꞉ Totaiposa yaapo pa꞉ta꞉ make Tekehalina꞉ e wotu pokaala꞉ hali Pesisi pa꞉ta꞉ make a꞉taloe pi la꞉niaasome. 13 Hande ponka꞉ ponka꞉ pilo hata꞉ Tekehalina꞉ e pokao hala꞉ hali Lupasi pa꞉ta꞉ make hande ipika꞉ eiyeke handeteke hala꞉ tupa꞉ kone I̱ make handeteke hao hala꞉ wanda꞉ Lupasina꞉ inkiki pa꞉ta꞉ make a꞉taloe pi la꞉niaasome. 14 Asinkitidasi Pilekoni Hemesi Pa꞉todobasi Hema꞉si kutupa iki ame̱le̱ hao haleme Ketiso wanda꞉hali paeyao pa꞉ta꞉ a꞉taloe pi la꞉niaasome. 15 Pilolokusi Diulia yaapo pa꞉ta꞉ make Netiasi ipika꞉ ana꞉ yaapo ipiliki pa꞉ta꞉ make Olimbasi pa꞉ta꞉ make kutupa iki ame̱le̱ hao haleme Koda꞉na꞉ wanda꞉hali paeyao pa꞉ta꞉ make a꞉taloe pi la꞉niaasome.

16 Iki paeyaoma꞉ hande Ketiso wanda꞉halima꞉ pu haloma꞉ tupa꞉ hopula alualu pea꞉pa꞉peke. Ketisona꞉ siosimanu paeyaoma꞉ iki pa꞉ta꞉ a꞉taloe pi la꞉niaasememe.

17 Yaka Ketiso kame titio. I̱ma꞉ iki sutiaaso hata꞉ dupiki pi alome. Mo wanda꞉halina꞉ hone tulaasemeeki hoeyaasa꞉eki make wanda꞉hali ka꞉ta꞉ alualu peaasa꞉eki make kutupiki hau piteleme wanda꞉halima꞉ iki hoeyaama꞉na꞉ma꞉ wotu handeteke hapa꞉peke. Amba꞉ titina꞉ iki pa꞉ta꞉ walemeke handa ikana꞉ma꞉ opimiki pi manuta꞉ ame mo wanda꞉halima꞉ tombualuekema꞉ taapelememe. Koto wanda꞉halita꞉ iki ame̱le̱ mandake pa꞉ta꞉ na momba꞉la꞉pa꞉peke. 18 Kutupiki haumanu pu haleme wanda꞉halima꞉ta꞉ Tekehali Yesu Ketisona꞉ e na pokaake ika꞉ loke manuna꞉ na꞉na꞉ pa꞉la꞉ ekimanu homeke hone u halememe. Ikana꞉ma꞉ mo tendepiki nonopiki pa imeke piki pimanu aleme ekima꞉ mo hokeeki wopu na handeleme wanda꞉hali makeao halememe. 19 Pate iki Loma꞉ wanda꞉hali ikana꞉ma꞉ mo hande Pi Seliapo opu haleme ekita꞉ mo wanda꞉hali paeyaoma꞉ amba꞉ opua wilimime. Kutu pa꞉la꞉ ekina꞉ I̱ma꞉ make iki pa꞉ta꞉ ta꞉na꞉ma꞉ homolome. Yaka hone pa꞉la꞉ ekita꞉ dupae. Ikana꞉ma꞉ta꞉ hokeeki puluekema꞉ hone na wiki wanda꞉hali hata꞉ epekeeki puluekema꞉ hone wopu wilimi wanda꞉hali hapa꞉peke hone witolome. 20 Kutu pimika꞉na꞉ta꞉ hande puki lopa꞉niaasa꞉ ekina꞉ teke hali Koda꞉ma꞉ mo Sadanita꞉ ika꞉ anke teke pa꞉ta꞉ lu tombualo pa꞉la꞉ ekita꞉ teke pa꞉ta꞉ ya꞉la꞉me. Tekehali Yesu ipika꞉ pa hameke a꞉ta꞉ma꞉ homa꞉la꞉eki iki ame̱le̱ pitina꞉ lena꞉e alome.

21 Dika꞉ mandakena꞉ e pokao halopa꞉ hali Timodima꞉ make iki pa꞉ta꞉ a꞉taloe pi la꞉niaasa꞉me. Lusiasima꞉ make Dieisonima꞉ make Sosipeidema꞉ make mo mandane Diu tapake haliweki ikana꞉ma꞉ make iki pa꞉ta꞉ a꞉taloe pi la꞉niaasememe.

22 Do wape peawaaso hali Tetiasi I̱ma꞉ make Ketiso hali hata꞉ iki pa꞉ta꞉ a꞉taloe pi la꞉niaasome.

23 Hande siosi wanda꞉hali mombolo haleme do da pa꞉ta꞉ I̱ handeteke hala꞉ da teke hali Kaiasima꞉ make iki pa꞉ta꞉ a꞉taloe pi la꞉niaasa꞉me. Do daonina꞉ kapomanina꞉ mani handeteke hala꞉ hali Eta꞉situsima꞉ make nika꞉ Ketiso kame Kuodasima꞉ make ipilikana꞉ma꞉ iki pa꞉ta꞉ a꞉taloe pi la꞉niaasepeme.

24 [Nika꞉ Tekehali Yesu Ketiso ipika꞉ a꞉ta꞉ma꞉ homa tamba꞉ mina꞉la꞉eki iki paeyao pa꞉ta꞉ wina꞉e.]

25 Nikana꞉ma꞉ Koda꞉na꞉ pi laamana꞉e. Koda꞉ma꞉ mo amba꞉ kiake kone a꞉mbao wieke pa ame I̱ma꞉ walolo hande Yesu Ketisona꞉ Pi Seliapo pa꞉ta꞉ yama꞉ Koda꞉ma꞉ ika꞉ hone tulao haleme ekita꞉ ana꞉na꞉ taka꞉lao hamina꞉ lelieke. Koto walolo pita꞉ mo amba꞉ kiaake kone a꞉mbao wieke ota꞉ pie. 26 Koto pa꞉la꞉pate hande a꞉mbao wieke ota꞉ pi manuta꞉ ameta꞉ mo hande potopede haliwekina꞉ wape pelemeeki manuma꞉ peneme yaala꞉me. Kutupa hande na homeke pa hao hala꞉ Koda꞉ma꞉ dupa꞉pe laa leeke handaata꞉ wanda꞉hali paeyaoma꞉ opua pina꞉yeke koto hande pita꞉ kenke honiki honiki paeyao pa꞉ta꞉ mo tutu paeyao pa꞉ta꞉ wala꞉tia pominoloma꞉me.

27 Nikana꞉ma꞉ Yesu Ketiso pa꞉ta꞉ yama꞉ mo hande hau paeyao wotu handa ula꞉ Koda꞉ homeke homekena꞉ pi hoto paeyao laatiki pu hamana꞉e. Kutu pumana꞉e.

<- LOMA꞉ 15