1 Kutupaka꞉na꞉ handoa꞉pate mo hande Sipisipi Ma꞉na꞉ Ikikita꞉ mo ipika꞉ biki make ipika꞉ Apa꞉na꞉ biki ika꞉ wenokona꞉ laemeke 144 daoseni wanda꞉hali ame̱le̱ mo Saioni potena꞉ haememe. 2 Kutupa oli ya nanema꞉ ikali do̱u̱ tiekema꞉ handa make tutu tieke liki nonopiki pi ho̱la̱꞉make opua꞉me. Mo pi ho̱la̱꞉maketa꞉ kidama꞉ handeke ale lita꞉la꞉ haliwekima꞉ liki nonopiki ala꞉ ekima꞉ handeke nono pia꞉me. 3 Mo 144 daoseni wanda꞉halita꞉ mo hande Koda꞉na꞉ kini seana꞉ make mo deto hala꞉ tonkopu ale manuna꞉ make mo you haliwekina꞉ puki tikitiki pua haememe. Ikita꞉ panake emeli ikana꞉ma꞉ homeke moka꞉la hande hande pea lapeke emeli homeke lememe. Kenke wanda꞉hali paeyao pa꞉ta꞉ta꞉ koto tapake homeke pa꞉ta꞉la꞉ mea epeaalo pia꞉ tapakee. 4 Ikita꞉ wanda꞉weki hakopu na tunkulimieki yaalo yakopiki haliweki haememe. Ikana꞉ma꞉ta꞉ mo Sipisipi Ma꞉na꞉ Ikiki pea꞉ pa꞉ta꞉ta꞉ telipaleke ombu haememe. Ikita꞉ kenke wanda꞉hali paeyao anka꞉lopuna꞉ epeaala꞉ tapakee. Ikita꞉ Koda꞉ pa꞉ta꞉ make mo Sipisipi Ma꞉na꞉ Ikiki pa꞉ta꞉ make titina꞉ halo pa꞉la꞉ tapakee. 5 Ma꞉nda꞉ma꞉ ikita꞉ yayapiki pi lelemeeki na opua make ala꞉ta꞉ ma꞉nda꞉ ata꞉ka꞉ na pealeme haliwekie.

6 Kutupa enisolo ma꞉nda꞉ oli ya manda a̱e̱nolo hata꞉ do kenke wanda꞉hali paeyao pa꞉ta꞉ mo pa u hala꞉ Pi Seliapo laluekema꞉ pia꞉me. Mo wanda꞉halita꞉ tutu ta꞉ta꞉ ta꞉ta꞉ make tapake ta꞉ta꞉ ta꞉ta꞉ make kapomani eleke elekema꞉ handeteke hala꞉ kenke make paeyao pa꞉ta꞉ loluekema꞉ pieke handoa꞉me. 7 Ipikana꞉ma꞉ anekema꞉ alota꞉ Koda꞉ paala꞉ma꞉ homaaso hata꞉ ipika꞉ tieke hala꞉ ekina꞉ biki mina꞉liape. Pa ekipeke ipikana꞉ma꞉ mo hande wanda꞉hali pi yokaalu pulu pa꞉la꞉ nate a꞉pa꞉leke loa꞉me. Do kenke make oli ya make dawala make opa꞉la꞉ ikalimanu make koto ale paeyao wa꞉pa꞉la꞉ Koda꞉ pa꞉ta꞉ panda꞉puniao yeiya꞉ laaso hata꞉ yeni pea꞉pa꞉peke lea꞉me.

8 Kotoeki hoki naneta꞉ enisolo ma꞉nda꞉ma꞉ teliolo alota꞉ Mo wanda꞉ta꞉ lopa꞉la꞉me. Aneke Ba꞉bilonita꞉ lopa꞉la꞉me. Mo wanda꞉ma꞉ wanda꞉hali paeyao ipika꞉ waini ikali nena꞉ lea꞉me. Mo honkopu hake waini ikalita꞉ ipika꞉ lokena꞉ hoke hone pa꞉la꞉eki manue lea꞉me.

9 Pa tepo peao enisoloma꞉ mo titina꞉eki yaapo teliolo hata꞉ anekema꞉ alota꞉ Ma꞉nda꞉ epima꞉ mo sayale hombeleke make koto ale manda꞉ meao wa꞉pa꞉la꞉ ale pa꞉ta꞉ make panda꞉puniao yeni pitolo o ipika꞉ maka wenoko o popeke nane kikina꞉ ta̱lena꞉ lemeka꞉na꞉ta꞉ kota꞉ 10 koto someta꞉ ipika꞉ kone Koda꞉na꞉ waini ikali nelieke. Kota꞉ mo Koda꞉ma꞉ta꞉ ipika꞉ paala꞉piki mineke panka꞉la꞉ wele pa ula꞉ waini ikalita꞉ mo ipika꞉ mineke panka꞉la꞉ kapo pa꞉ta꞉ holo pambeekeeki loa꞉me. Dupilia꞉ wanda꞉hali paeyaota꞉ mo yakopiki enisolo titi make mo Sipisipi Ma꞉na꞉ Ikikina꞉ leke tomona꞉ mo ti uleke make mo titipu tiekepiki lanka꞉ma꞉ handeke ale pa꞉ta꞉ tanda no halimikie. 11 Mo tanda halo hala꞉ tina꞉ lumuta꞉ na paeyeke hoto paeyao pa u halieke. Koto sayale hombeleke pita꞉ ipika꞉ manda꞉ meao wa꞉pa꞉la꞉ ale yaapo pa꞉ta꞉ panda꞉puniao yeni pitolo make o koto alena꞉ bikina꞉ maka wina꞉ lea꞉ka꞉na꞉ta꞉ kota꞉ koto wanda꞉hali ika꞉ tanda no halo pa꞉la꞉ ekita꞉ nate o timba꞉ ota꞉ hosiki siki na paeyaalieke lea꞉me.

12 Koto ya꞉leke handaa mo Koda꞉na꞉ pi ula꞉ ekimanu opua Yesu pa꞉ta꞉ kima꞉ na homeke hone tulao hala꞉ wanda꞉hali lopaama꞉na꞉yeke ika꞉ pa pina꞉e laa yu wia hala꞉ ekita꞉ ana꞉na꞉ pilieke.

13 Kutupa oli hepeni nanema꞉ pi ho̱la̱꞉makema꞉ alota꞉ Doeki laaniae. Ame do kini pea mo Tekehalina꞉ e pokolo hata꞉ homeleme wanda꞉halita꞉ ta꞉na꞉ma꞉ homa꞉pa꞉peke ya꞉la꞉me lea꞉me. Koto leeke mo Sipitidima꞉ hombo peaaso hata꞉ alota꞉ Ota꞉e. Ikita꞉ ika꞉ ki hone na wiki honkopu hao pokelemeeki paeyaemeke handaa ta꞉na꞉ma꞉ homilimikie. Pa ekipeke ika꞉ e pokeleme ekina꞉ yenkita꞉ iki ame̱le̱ pa hala꞉me lea꞉me.

14 Kutupa handoa꞉pate ya hapi handoa꞉me. Kutupa mo ya hapi mandaata꞉ halima꞉ handeke ale pitia꞉me. Ipika꞉ ambokena꞉ta꞉ koloma꞉ wepiki kinina꞉ you aka꞉ pambao kutupa widi tunkula꞉la꞉ ne wopu hake kaiya minia꞉me. 15 Kutupa mo enisolo ma꞉nda꞉ta꞉ mo tembolo pa꞉ta꞉ yama꞉ a꞉pa mo ya hapi manda pitia꞉ some pa꞉ta꞉ e̱ wi tieke la꞉moneaaso alota꞉ Naka꞉ widi tunkulu hale kaiyama꞉ ne napeke mie. Pa ekipeke mo nateta꞉ a꞉pa꞉la꞉me. Kutupa kenkena꞉ ne napeke mina꞉ pota꞉leke loa꞉me lea꞉me. 16 Koto leeke mo ya hapi manda pitia꞉ somema꞉ ipika꞉ widi tunkulu hala꞉ kaiya wankeaaso hata꞉ kenkena꞉ ne napeke mu paeyaeya꞉me.

17 Kutupa enisolo ma꞉nda꞉ mo tembolo pa꞉ta꞉ pita opolu bao ipulu ne wopu hake kaiya ombu miniki epea꞉me. 18 Kutupa mo tina꞉ handeteke haya꞉ enisolo ma꞉nda꞉ta꞉ mo oloda pa꞉ta꞉ hao epea꞉me. Ipikana꞉ma꞉ mo ne wopu hake kaiya miniki haya꞉ enisolo pa꞉ta꞉ anekema꞉ alota꞉ Naka꞉ kaiyama꞉ mo waini puna꞉ kilikimanu honda꞉ poka꞉e. Pa ekipeke mo kiliki manuta꞉ pota꞉leke loa꞉me lea꞉me. 19 Kota꞉ mo enisoloma꞉ ipika꞉ kaiya do kenkena꞉ wankeaaso hata꞉ mo waini kiliki manuta꞉ talo pamba oni Koda꞉na꞉ paala꞉ piki mineke panka꞉la꞉ waini kiliki dekepo hala꞉ pa꞉ta꞉ lopaeya꞉me. 20 Mo waini kilikita꞉ mo daoni tieke hama꞉ nane mo waini kiliki dekepo hala꞉ pa꞉ta꞉ dekepea꞉me. Kutupa mo dekepea꞉ ale pa꞉ta꞉ta꞉ we ikali tieke 300 kilomida hokulu taa hata꞉ ota꞉ kendo tieke make mo hosina꞉ kake ana꞉na꞉ lombei pea꞉peke kendo wia꞉me.

<- PENEME YAEYEKEEKI 13PENEME YAEYEKEEKI 15 ->