Dota꞉ Yesu Ketisoma꞉ Dioni pa꞉ta꞉ peneme yaeyekeeki

1 Do bukata꞉ mo Yesu Ketisona꞉ peneme yaeyeke haumanu lao ula꞉ bukae. Koda꞉ma꞉ do peneme yaasa꞉ haumanu haleeke ekita꞉ ipika꞉ e pokaasa꞉ wanda꞉hali pa꞉ta꞉ koto kone pulu piekeeki waluekema꞉ piekeme. Ketisoma꞉ta꞉ ipika꞉ e pokaasa꞉ hali Dioni pa꞉ta꞉ ipika꞉ enisolo tapao dupiki haumanu walena꞉ leekeme. 2 Kutupa Dionima꞉ta꞉ ipikana꞉ma꞉ handeeke haumanu paeyao la꞉la꞉me. Do lao ula꞉ pita꞉ mo Koda꞉ma꞉ la꞉la꞉ pi make Yesu Ketisoma꞉ ota꞉ tupa꞉ peneme yaala꞉ pie.

3 Ma꞉nda꞉ epima꞉ do buka pa꞉ta꞉ la꞉ ula꞉ ekimanu ipula꞉ ekita꞉ Koda꞉ma꞉ ota꞉ epeaasa꞉me. Kutupa make epi amedama꞉ do la꞉ ula꞉ pimanu opitolo hata꞉ ika꞉ puki tukiki nane mendimika꞉na꞉ta꞉ ikita꞉ Koda꞉ma꞉ ota꞉ epeaasa꞉me. Pa ekipeke do haumanu pulu pa꞉la꞉ nateta꞉ teke pa꞉ta꞉ ya꞉leke loa꞉me.

Watake hata꞉ siosi pa꞉ta꞉ wape tapaeyekeeki

4 I̱ta꞉ Dionima꞉ mo Eisia kenke nane hala꞉ watake hata꞉ a꞉ta꞉ alome. Ame do make hala꞉ amba꞉ make hayeke wetepena꞉ make epolo pa꞉la꞉ Koda꞉ma꞉ a꞉ta꞉ma꞉ homolo tamba꞉ mina꞉la꞉eki pita꞉ puki lopa꞉niaasa꞉eki yaapota꞉ iki pa꞉ta꞉ kina꞉e. Koto tupa꞉ mo Koda꞉na꞉ handeteke pila꞉ sea tikitikina꞉ haleme watake hata꞉ sipitidi manuma꞉ make kina꞉e. 5 Kutupa make mo Koda꞉na꞉ pi ota꞉ tupa꞉ laasa꞉ hali mo hande homa꞉la꞉eki bepolao tiaeyeke titina꞉ hali make do kenke honiki paeyaona꞉ kini haliwekina꞉ handeteke hala꞉ hali Yesu Ketisoma꞉ make homeke hau kone pina꞉e.

Ipikana꞉ma꞉ta꞉ niki pukima꞉ homo hala꞉me. Ipika꞉ a꞉ka꞉tei wape piki tina꞉ lopeeke wema꞉ta꞉ nika꞉ hoke hau pa꞉ta꞉ niki ka꞉la꞉pa꞉ tapaala꞉me. 6 Kutupa ipika꞉ Apa꞉ Koda꞉na꞉ e pokomono nikita꞉ ipika꞉ kilu tombuao hala꞉ ekina꞉ yeni peao haleme wanda꞉hali hamono la꞉la꞉me. Yesu Ketiso pa꞉ta꞉ta꞉ pa̱a̱ pita꞉la꞉eki make wele pita꞉la꞉eki make hoto paeyao pa utia pu haena꞉e. Kutu pina꞉e.

7 Ipikita꞉ ya hapi manda oli ipula꞉ handa꞉e. Paeyaoma꞉ handilimikie. Mo ipiki ikoko lia doloma꞉ awemeke haliwekina꞉ make loa꞉me. Kutupa do kenkena꞉ hala꞉ wanda꞉hali paeyaoma꞉ta꞉ ipiki handolo hata꞉ e̱ tieke lelimikie. Koto ekina꞉ta꞉ kutu pilieke.

8 Mo Aneke Tekehali Koda꞉ma꞉ alota꞉ I̱ta꞉ ota꞉ titina꞉ ota꞉ wetepe sale nane makee laa I̱ta꞉ ame do halo make amba꞉ haowa꞉ make wetepena꞉ make epolo polo halie ala꞉me lea꞉me.

Dionima꞉ Ketiso handeekeeki

9 I̱ta꞉ ika꞉ kame Dioni Yesuna꞉ hoki nane teliolo halie. Ipika꞉ Kilu Tombuao Hala꞉eki pa꞉ta꞉ haleme ekina꞉ ki hone na wiki Pina꞉e laa tanda mineleme ekina꞉ putupoloma꞉ yankekema꞉ loa꞉me. I̱ta꞉ Koda꞉na꞉ pi walaawa꞉ ekina꞉ make Yesuma꞉ ota꞉eki peneme yaeyekeeki walaawa꞉ ekina꞉ I̱ta꞉ mo dawalama꞉ dupake Pa꞉timosi kenke siki pa꞉ta꞉ hano lelememe. 10 Mo Tekehalina꞉ natena꞉ta꞉ hande Sipitidima꞉ I̱ handeteke hata꞉ e pokea꞉me. Kutupa bu kanakena꞉ e̱ma꞉ handeke pi ho̱la̱꞉make tiekema꞉ yaka hoki nane pi lea꞉eki opua꞉me. 11 Dupa lea꞉me. Nakana꞉ma꞉ do handolo peleeki manuta꞉ wape laaniao kutupa mo bukata꞉ mo watake hata꞉ daoni manuna꞉ siosi pa꞉ta꞉ tapaapeke. Epesese Semena Pekamamo Daetaeda Sadisi Pila꞉delepia make Leiodisiamanu pa꞉ta꞉ loa꞉me lea꞉me.

12 I̱ pa꞉ta꞉ pi ala꞉ta꞉ epima꞉ ala꞉pe laa la꞉ka꞉la꞉ moneawa꞉pate handeta꞉ watake hata꞉ koloma꞉ wepiki ola꞉pake keo panka꞉la꞉ alemanu handoa꞉me. 13 Kutupa koto alemanu anka꞉lopuna꞉ta꞉ halima꞉ handeke nono piki alema꞉ hake piki dau hokulu oni ipika꞉ anke ana꞉na꞉ wataapekeeki yameekeme. Kutupa make koloma꞉ wepiki beleke ipika꞉ hakokona꞉ adoto pia꞉me. 14 Ipika꞉ you pita꞉ itiki yaapota꞉ mo hake pupapeke sipisipi itikima꞉ handa o hake pupapeke yahapima꞉ handeke alema꞉ handa make ipika꞉ leketa꞉ ti to hala꞉ ti haaleke ekima꞉ handea꞉me. 15 Ipika꞉ anketa꞉ mo epeke tupa꞉ wamo pea mulamula kitao wiki koloma꞉ handeke nono piki ale batasima꞉ handa leke yale yale peata꞉ ipika꞉ pi ho̱la̱꞉maketa꞉ mo u tieke laa lopa꞉la꞉ ikali do̱u̱ma꞉ handea꞉me. 16 Ipika꞉ popeke nane kikina꞉ta꞉ watake hata꞉ hombulanka꞉manu miniki hata꞉ ipika꞉ kake pa꞉ta꞉ta꞉ mo ne hake kake yaapo hake bainasi opolu baeya꞉me. Ipika꞉ leke popeleketa꞉ mo you tikekena꞉ tala꞉ natema꞉ handeke pa̱a̱ tieke pia꞉me.

17 I̱ma꞉ ipiki handoa꞉ dina꞉ta꞉ amba꞉ homeke halima꞉ handaa ipika꞉ anke teke pa꞉ta꞉ lopoa꞉me. Kutu pueketa꞉ ipikana꞉ma꞉ ipika꞉ popeke nane kiki I̱ manda witolo hata꞉ alota꞉ Paala꞉ma꞉ na homa꞉pee. I̱ta꞉ ota꞉ titina꞉ make ota꞉ wetepe sale nane makee. 18 I̱ta꞉ deto hala꞉ halie. I̱ta꞉ homoa꞉pate ameta꞉ tiao hoto paeyao pa hatia pu hala꞉ hali halome. I̱ma꞉ta꞉ homa꞉la꞉ ekina꞉ make mo homo hala꞉ kenkena꞉ pota꞉ ki handeteke halo halie. 19 Koto ekina꞉ta꞉ do handele alemanu paeyao make wetepe nane pulu pa꞉la꞉ ekimanu make paeyao laaniae. 20 Do yaka popeke nane miniki halo watake hata꞉ hombulanka꞉ manuna꞉ make do watake hata꞉ koloma꞉ wepiki ola꞉pake keo panka꞉la꞉ alemanu yaapona꞉ a꞉mbao ula꞉ teketa꞉ dupae. Do watake hata꞉ hombulanka꞉ manuta꞉ mo hande watake hata꞉ siosi manuna꞉ enisolomanue. Kutupa do watake hata꞉ ola꞉pake keo panka꞉la꞉ ale manuta꞉ mo hande watake hata꞉ siosimanue lea꞉me.

PENEME YAEYEKEEKI 2 ->