LUKU 17

Hoke hau pina꞉ pu tiaasa꞉ hau

(Ma꞉tiu 18꞉6-7,21-22, Maka 9꞉42)

1 Yesuma꞉ ipika꞉ disaipolo haliweki pa꞉ta꞉ alota꞉ Wanda꞉hali hoke hau pa꞉ta꞉ pena꞉ yeke pu tiaasa꞉ haumanu opolo epolo pa꞉la꞉pate kutu piki haumanu pina꞉ pu tiaasa꞉ someta꞉ paala꞉e. Hoke yenki milieke. 2 Kutu pita꞉la꞉ someta꞉ ipika꞉ make pa꞉ta꞉ toopi tieke aneke mea endiao oni dawala ikali pa꞉ta꞉ lopaaso yoluta꞉ epolo pia꞉me. Ekipeke. Ipiki pa hata꞉ta꞉ do hosiki wekiwandiki sunu ma꞉nda꞉ hondo hoke hau pina꞉ pu tialieke. 3 Koto ekina꞉ta꞉ ika꞉ piteleme haumanu wotu handeteke hapa꞉peke leekeme.

Naka꞉ kamema꞉ neke pa꞉ta꞉ hoke hau pia꞉ka꞉na꞉ta꞉ kota꞉ nakana꞉ma꞉ta꞉ honkopu hake mana꞉ pimanu la hala꞉peke. Kutupa ipikana꞉ma꞉ paa hande ipika꞉ pia꞉ hoke hau manuna꞉ hone la꞉ka꞉la mina꞉pa꞉laeya꞉ka꞉na꞉ta꞉ kota꞉ nakana꞉ma꞉ hone ma꞉nda꞉ na wiki paa paeyaapeke. 4 Ipikana꞉ma꞉ neke pa꞉ta꞉ nate homekena꞉ kone hoto watake hata꞉ hoke hau pea paa hoto watake hata꞉ kone neke pa꞉ta꞉ a꞉ta꞉e lolo epea꞉ka꞉na꞉ta꞉ kota꞉ nakana꞉ma꞉ta꞉ hone ma꞉nda꞉ na wiki ipika꞉ hoke hau paa paeyaapeke leekeme.

Hone tulaasa꞉eki

5 Aposolo haliwekima꞉ mo Tekehali pa꞉ta꞉ alota꞉ Nika꞉ hone tulaaloma꞉ ekita꞉ nakana꞉ma꞉ mea daeyawae lemekeme. 6 Tekehalima꞉ ika꞉ pi hombo peaaso alota꞉ Ika꞉ hone tulaalemeeki a꞉nda꞉ mo (ki̱mi̱le̱ma꞉ handeke ale) masidadi kiliki sikima꞉ handena꞉ yeke ikana꞉ma꞉ daena꞉ lemeka꞉na꞉ta꞉ kota꞉ do kiliki nala꞉ ti hombeleke biki molobeti pa꞉ta꞉ alota꞉ Naka꞉ kone naka꞉ piki yokaata꞉ oni dawalana꞉ pua noka꞉pee lemeka꞉na꞉ta꞉ ika꞉ pi ota꞉ opua pilieke leekeme.

E pokaasa꞉ halina꞉ pea꞉pekeeki

7 Iki ma꞉nda꞉ hondoma꞉ naka꞉ e pokaasa꞉ halima꞉ naka꞉ ena꞉ kenke lu wiaena꞉ o naka꞉ sipisipi ma꞉na꞉ handeteke haena꞉ leka꞉na꞉ta꞉ kota꞉ koto some paa la꞉ka꞉la naka꞉ da a꞉pa꞉tiki pia꞉ka꞉na꞉ta꞉ a̱i̱ ne a꞉pa nae pita꞉ lo halepe. 8 Dia꞉me. Kotoeki na leketa꞉ nakana꞉ma꞉ta꞉ dupa lo haleme. Yaka ne ambi wamo peaota꞉ ne pana꞉ puluekema꞉ yamo hala꞉ aka꞉ mea pambaota꞉ yaka ne ikali nono yu wia pitaata꞉ wetepena꞉ta꞉ naka꞉ ne nelipikie lo haleme leekeme. 9 Mo e pokaasa꞉ halima꞉ ipika꞉ aneke halima꞉ pea꞉peke la꞉la꞉eki opua paeyao pia꞉ka꞉na꞉ta꞉ kota꞉ ipika꞉ aneke halima꞉ ta꞉na꞉ma꞉ homolo keiyae lena꞉ yu wia hapeke ya꞉la꞉pe. Dia꞉me. 10 Koto ekina꞉ta꞉ iki make koto tupa꞉ konee. Iki pa꞉ta꞉ pea꞉pa꞉peke lelimi ekimanu a꞉nda꞉ pu paeyaemeka꞉na꞉ta꞉ kota꞉ ikana꞉ma꞉ do tupa꞉ lapa꞉peke. Nikita꞉ epeke e pokaasoma꞉ wanda꞉hali dia꞉me. Nikita꞉ nika꞉ pea꞉pa꞉peke la꞉la꞉ haumanu homeke pu paeyaaloma꞉me lapeke ya꞉la꞉me leekeme.

Yesuma꞉ kiki yaapo halina꞉ kindi yeni mea epeaeyekeeki

11 Yesuta꞉ Diutuseleme da nane poluekema꞉ yeke Ka꞉lili make Sametia kenke yaapo tombona꞉ peekeme. 12 Ipikita꞉ da ma꞉nda꞉ pa꞉ta꞉ polueke alo pulu haena꞉ kiki yaapo haliwekita꞉ ika꞉ lokena꞉ kindi yeni hayeke haliwekima꞉ Yesu a꞉pa manda꞉hande pimikime. Ikita꞉ hosiki siki papate hata꞉ 13 Yesu wi la do lemekeme. Yesu Aneke Halio. Nakana꞉ma꞉ niki a꞉ta꞉ma꞉ homa꞉e lemekeme.

14 Yesuma꞉ iki handa alota꞉ mo yeni peao hala꞉ haliwekima꞉ iki handena꞉ pupe leekeme. Kutupa mo haliwekita꞉ mo pota꞉na꞉ pulu haena꞉ kone mea epeaeyekeme. 15 Koto haliweki tukiki pa꞉ta꞉ hali homeke ma꞉nda꞉ma꞉ta꞉ ipiki mea epeaeyekeeki hando haota꞉ paa la꞉ka꞉la ipulu hata꞉ Koda꞉na꞉ bikita꞉ anekema꞉ mea a꞉meiyatia 16 a꞉pa Yesuna꞉ leke popelekena꞉ puki yama peliolo hata꞉ ta꞉na꞉e pi leekeme. Kutu pieke halita꞉ Sametia hali yeekeme.

17 Kotoeki handaata꞉ Yesuma꞉ dupa leekeme. I̱ma꞉ mea epeaowa꞉ haliwekita꞉ kiki yaapo mea epeaowa꞉me. Mo mandane kiki paeya mandane kikina꞉ tonkopu haliwekita꞉ ekipeke na la꞉ka꞉la a꞉pa pelemepe. 18 Pa ekipeke do da yu ma꞉nda꞉ hali ipiki homeke la꞉ka꞉la a꞉pa Koda꞉ pa꞉ta꞉ ta꞉na꞉e lolo epeekepe 19 laata꞉ Yesuma꞉ mo hali pa꞉ta꞉ alota꞉ Naka꞉ hone tulale ekima꞉ neke mea epeaala꞉me. Tiao pue leekeme.

Koda꞉na꞉ Kilu Tombuao Hala꞉eki epolo pa꞉la꞉eki

(Ma꞉tiu 24꞉23-28,37-41)

20 Mandane Pa꞉tisi haliwekima꞉ Yesu pa꞉ta꞉ lota꞉ pitolo alota꞉ Koda꞉na꞉ Kilu Tombuao Hala꞉eki epolo pa꞉la꞉ ekita꞉ handima꞉pe lemekeme. Yesuma꞉ alota꞉ Koda꞉na꞉ Kilu Tombuao Hala꞉eki epolo pa꞉la꞉ ekita꞉ wanda꞉halima꞉ handolo pa꞉la꞉ tupa꞉ na ipilieke leekeme. 21 Ma꞉nda꞉ma꞉ alota꞉ Do pa꞉ta꞉ do handa꞉e o Mokoto pa꞉ta꞉ mokoto handa꞉e pi na lelieke. Pa ekipeke. Koda꞉na꞉ Kilu Tombuao Hala꞉ ekita꞉ iki ame̱le̱ haleke loa꞉me leekeme.

22 Kutupa Yesuma꞉ ipika꞉ disaipolo haliweki pa꞉ta꞉ alota꞉ Ikana꞉ma꞉ mo Wanda꞉halina꞉ Eiyekena꞉ nate homeke a꞉nda꞉ handuluekema꞉ hone wopu ulu pelemepate ota꞉ na handilimikie. 23 Mandane tapakema꞉ iki pa꞉ta꞉ dupa lelimikie. Mo nane handa꞉pe o Doane handa꞉pe laa lolo pelemepate na weiya꞉ mea pua꞉pa꞉peke. Pa ekipeke. 24 Wanda꞉halina꞉ Eiyekena꞉ epolo pa꞉la꞉ ekita꞉ mo ti tekele pitolo hata꞉ mo ya honiki honiki paeyaona꞉ pa̱a̱ peao hala꞉ tupa꞉ kone pilieke. 25 Kutu pulu pa꞉la꞉pate titina꞉ta꞉ ipikana꞉ma꞉ tanda aneke hapu milieke. Kutupa ame do haleme wanda꞉halima꞉ make ipiki kialimikie.

26 Hande Noa hayeke natena꞉ pu haemeke tupa꞉ mo Wanda꞉halina꞉ Eiyeke ipika꞉ nate manuna꞉ make mandake haumanu pilimikie. 27 Wanda꞉halima꞉ ika꞉ ne ikali na꞉tiki wanda꞉ mea꞉tiki halina꞉ da pua꞉tiki putia a꞉pa Noa kawaso pa꞉ta꞉ honda꞉ pambeeke nate opolo epeekeme. Kutu piki haumanu pu haemekepate koto tomona꞉ kone ikali talo hata꞉ iki paeyao lu homaeyekeme. 28 Koto mandake tupa꞉ kone hande Loda ipika꞉ hayeke natena꞉ pieke tupa꞉ kone pilimikie. Koto dina꞉ta꞉ wanda꞉hali paeyaoma꞉ta꞉ ne ikali nalo anemone ale hambolo tapaaso pitolo wae alemanu pokolo hata꞉ damanu a꞉eya꞉tiki pu haemekeme. 29 Kutu pimikipate Lodama꞉ mo Sodomo da mina꞉pa꞉layeke natena꞉ta꞉ ti uleke make talo talo hake lanka꞉ ma꞉nda꞉ biki solopa oli ya pa꞉ta꞉ yama꞉ lopa꞉niaeyeke ekima꞉ wanda꞉hali paeyaosiki lu homaeyekeme. 30 Mo Wanda꞉halina꞉ Eiyeke peneme yao walia꞉ natena꞉ta꞉ homeke tupa꞉ kone ipilieke.

31 Koto natena꞉ta꞉ da holuna꞉ pitilia꞉ halima꞉ta꞉ ipika꞉ da pa꞉ta꞉ ula꞉ ala꞉ta꞉ ala꞉ta꞉ muluekema꞉ pua꞉peke na yelieke. Mandake tupa꞉ kone hali ma꞉nda꞉ epi ena꞉ haya꞉ka꞉na꞉ta꞉ ipiki pa la꞉ka꞉la da pua꞉peke na yelieke. 32 Lodana꞉ weteke niminaapa꞉peke. 33 Hali ma꞉nda꞉ epima꞉ ipika꞉ da꞉ta꞉la꞉eki miniki hao haluekema꞉ hone wia꞉ka꞉na꞉ta꞉ kota꞉ ipika꞉ da꞉ta꞉la꞉eki kone alu palieke. Kutu pilia꞉pate ma꞉nda꞉ epima꞉ ipika꞉ da꞉ta꞉la꞉eki alu paena꞉ lea꞉ka꞉na꞉ta꞉ ipika꞉ deto hala꞉ ekita꞉ paa wia halieke.

34 I̱ma꞉ iki pa꞉ta꞉ la kitolome. Koto timbaata꞉ hali yaapo pelipipate homeke hali minolota꞉ ma꞉nda꞉ta꞉ pa peli pelia halieke. 35-36 Wanda꞉ yaapota꞉ palaowa yumbuolo pitina꞉ homeke wanda꞉ hondo minolota꞉ ma꞉nda꞉ta꞉ mina꞉pa꞉lalieke leekeme. 37 Mo disaipolo haliwekima꞉ Yesu lota꞉ pitolo hata꞉ alota꞉ Tekehalio. Koto ale ekita꞉ hando pa꞉ta꞉ pilia꞉pe lemekeme. Yesuma꞉ ika꞉ pi hombo peaaso alota꞉ Ma꞉nda꞉ hando pa꞉ta꞉ ma꞉na꞉ hoteke lupa ula꞉ ale nina꞉ta꞉ kota꞉ wapukini mombolo hala꞉me leekeme.

<- LUKU 16 LUKU 18 ->